Поучения о разных истинах веры, благочестия и христианской жизни П.В. Владимиров( 9)

1. Слово некоего христолюбца. ревнителѧ по правои вере. Господи благослови
Якоже Илья Фезвитянин. заклавый ерея жерца идольския числом 300. и рече. ревнуя поревновах по Господе вседержители тако. и сеи (крестьянин) не мога терпети крестьян. во двоеверно живущих. и верують в Перуна. и в Хорса. и в Мокошь. и в Сима. и в Рьгла. и в Вилы. ихже числом. г҃ ѳ҃ сестръниць. глаголють (бо) невегласи и мнят богинями. и тако покладывахуть им теребы (требы). и куры им режють. и огневе молятся. зовуще его Сварожичем. и чесновиток. богом же его творять. егда же у кого будеть пир. тогдаже кладуть в ведра и в чаши. и (тако) пьють о идолех своих. веселящися не хужьши суть еретиков. ни жидов. иже в вере и во крещеньи тако творять. не токмо невежи но и вежи. попове и книжници. ащели не творять того вежи да пьють и ядять. моленое то брашно. ащели не пьють ни ядять да видять деяния их злая. ащели не видять да слышать и не хотять их поучити. о таковых бо пророк речеть. окамене сердце людии сих. ушима тяжко слышать. очи свои сомжиша. Павел к Римляном рече. открыеться гнев божий с небесе на все бещестье. и на неправду человечю. скрывающим истинну в неправде. сам Господь рече. мнози пастуси погубиша виноград мой. пастуси суть книжници. а виноград вера. человеци в вере погибають. лихими пастухи. учители безумными. аще не лишаться проклятаго моленья. и службы дьяволя то достоини огню негасимому. си же учители будуть им подъгнета. аще их необратять от дела того сотонина. глаголеть бо пророк от лица неверных. людии приходящих во крещенье. и ученью добрых дел. да обратять ны. боящися тобе. и ведущи свиденья твоя. се же молвить книжником. Павел рече. горе человеку тому. имже соблазниться мир. рече Господь иже добре научить хто. то велик нарется во царствии небеснем. Павел рече к римляном. аще многи наставники имате о Христе. но немноги отце о Христе бо Иисусе аз вы родих. еувангелием. молю же вы ся. подобници ми будите. и попове книжници будитеж. вы подобници Павлу великому учителю. учите ж люди на добро. и обращайте их от ле ти дьяволя. к вере истеннеи. служити истинному Богу. да и вы речете пред Богом пророческим гласом. се аз и дети моя яже ми дал еси Господи. и аз я родих ученьем. того ради пьете ясте и дары емлете от них. ащели нехощете учити их. то не примешаитесь им по еуангельскому слову. аще имаши око свое лукаво. то истъкни е вон. ащели руку то отсеци ю. лучше бо один уд погибнет. нежели все тело. не можетбо погибнуть праведник. про беззаконника. кое причастье Христу с бесом. такожь и служащих Богу. кое причастье к служащим бесом. и угодья дьяволя творящим. Павел бо коренфеем рече. братия писах вам посланья не примешаитесь. к блудником. ни к резоимцем. ни грабителем. ни корчьмитом. и к служащим кумиром. но долъжни есте от мира сего изыти. рекше умрети. ныне же писах вам с таковъм ни пити ни ясти. но изверзите таковаго. таковии бо царства Божия не наследят. окамене бо сердце их в неистовом пьяньстве. и быша слуги кумиром. якож бо пишет седоша бо людие пити и ясти. не в закон но во упои и быша пьяни. и въсташа играти и соблудиша со ближники своими и того дни погибе их 620 за свое неистовое пьяньство. того ради неподобае крестьяном игр бесовских играти. еже есть плясанье. гуденье. песни мирьския. и жертвы идольския. еже моляться огневе подвином. и Вилам. и Мокоши. и Симу. и Рьглу. и Перуну. и роду. и рожанице. и всем тем иже суть тем подобни. се же ученье нам вписася на конець века да не во лжю будем рекли. крещающеся отрицаемъся сотоны и всех дел его. и всех ангел его и всего студа его. да обещахомъся Христови. да аще ся обещахом Христови. то чему ему не служим. но бесом служим. и вся угодья им творим. на пагубу душам своим. не також зло творим просто. но и смешаем. некии чистыя молитвы. со проклятым моленьем. идольским. иже ставять лише кутья. ины тряпезы. законнаго обеда. иже нарицаеться безаконная тряпеза. менимая роду и рожаницам. и в прогневанье богу. сам бо Господь рече не всяк внидеть во царствие мое. рек ми Господи Господи но творяи волю отца моего. Павел рече видех облак. кровав распростерт над всем миром. и воспросих глаголя Господи что се есть. и рече ми се есть молитва человеческая. смешена с безаконьем. того ради рече Господь не можеть раб работать. 2 ма господинома. одиного возлюбить а другаго возненавидить. тако и мы братия возненавидим дьявола. а Христа возлюбим. во ибо хрестихомъся. его хлеб ямы. и чашю его пьем. умираем здрави бываем о нем. рече слава тобе о всем даным нам. тобою. не токмож зде но и в будущем веце. рече же Павел что убо требы кладуть страны бесом. а не Богу. не велюж вам обещником быти бесом. и не можете бо пити чаши Господня. и не можете бо причаститися тряпезе Господни. да не розъгневаем Бога. аще кто повесть вам. яко се требно кумиром не ядите того. ащели пьете или ясте то все в славу Богу творите. Господня бо есть земя и конци ея. все ми леть есть но не все на ползу. аще чрево брашно. и брашно чреву то Бог празнит. рече же Павел братия очистим собе от всякия скверны. плотьския и душевныя. но творящи святыню в страсе Божии. всем бо нам подобаеть стати пред судищем Христовом. да приимем кождо по своим делом. якоже есмы створили. или добро или зло. ведуще убо страх Господень. почто убо не воспримаем разумна глаголющая ны во спасенье. умным ученьем. виде бо яко обретенье хощет быти моего спасенья и вашего. аще быхом ся осужали. не быхом осудими от Господа были. братия не велю же вам не ведати беседы сея. но и инем будите на ползу хотящим спастися. истерьгнитеся от сети дьяволя. да придем к пречистому свету Господа нашего Иисуса Христа. безаконным же непокоривым. противящимъся здравому ученью. нечестивым хулящим отца и матерь. славы Божия не наследят. в чистоте Божиеи а не в мудрости плотнеи. молю вы имянем Бога нашего Иисуса Христа. хвалю Бога моего и вас о благодати Божиеи данеи вам яко свиденье Христово известися в вас. яко вам не лиховати никоегоже дара. чающе пришествия Господа нашего Иисуса Христа. иже посадить вы во дворех жизни вечныя. со всеми служащими ему. всегда и ныне.

2. Сеже изложенно от многословесных книг. некымь христолюбьцемь. ревнителем по правеи вере. на раздроушение лсти неприязнине. на укор творящим таковая. на поучение правоверным. и на причастье боудоущаго века. послоушающим книг сих. святых. и творящих делом повеления в оставление грехов
Якоже Илия фезитенин. заклав иерея и жерьце идольскыя. числом яко до триисот. и рече ревнуя поревновах по Господе Бозе моемь вседержители. тако и сыи не мога тьрпети. хрьстьян двоверно живущих. иже суще христьяне. и верують в перуна. и в хърса. и в сима. и в рьгла. и в мокошь. и в вилы. ихже числомь тридесяте сестрениць. глаголють оканьнии невегласи. и то все творять богы. и богынями. и тако кладуть им требы. и короваи им молять. куры режють. и огневи молять же ся. зовуще его сварожичьмь. и чесновиток. богом же творя. и егда будеть у кого пир. тогда кладуть в ведра. и в чаше. и пьють веселящеся. о идолех своих. и егда же у кого их будеть брак и творять с бубьны. и с сопельми. и с многыми чюдесы бесовьскыми. и ино же сего горее есть. устроивьше срамоту мужьскую. и въкрадывающе в ведра. и в чаше и пьють. и вынемьше осморкывають. и облизывают и целують. не хужьше суть жидов. и еретик. и болгарь. иже в вере и в хрьщении суще. а тако творять. не токмо же то творять невеже. нъ и веже. и книжници. аще ли не творять того веже. да пьют и ядять моленое то брашно. аще ли ни пьють ни ядять. да видять деяния та их злая. аще ли не видять да слышать. и не хотять их поучити. о таковых бо пророк рече. окамене сердце людии сих. и ушима тяжко слышаша. и очи свои съмежиша. и Павел. к Римляном. рече. открыется гнев Божии с небесе. на все бещестье. и на неправду человечю. съкрывающим истину в неправьде. имьже разумение Божие. яве есть в них. Бог бо им яви. нъ си не хотят учити. и сам Господь рече. мнози пастуси погубиша виноград мои. пастуси суть учители попове. а виноград вера. а сущее в винограде в вере человеци. и погыбають лихыми учители. безумными невегласы. да аще тако творящии. и не ошибутся. проклятаго того моления. и службы тое дьяволе. то достоини будуть огню негасимому. и смоле присноврющии. си же учители под ними будуть. аще их не обратять. от дел тех сотонин. пророк бо глаголеть. от лица невежьствьных людии приходящих в хрьщение. да обратять ны боящиися тебе. и ведущии сведенья твоя. сеже молвить попом. ти бо ведять сведения Божия. а не ведающим сведенья. недостоить попом быти. тако бо и в заповедех глаголеть. аще невежа будеть поставлен попом. да извержется. Павел бо рече горе тому имьже съблазна приидеть. нъ се ё пришла. и расплодялася всюду. и пакы рече. иже кто добре научить. тъ велик наречется. аще бы кто хотел научити. да прочии невегласи не дадять. зависти ради. и на убииство попущаются. яко же на Исуса. жидовьстии архиереи. и книжьници. и пакы Павел рече к Римляном. аще и многы наставникы имате о Христе. нъ немногы о отце. о Христе бо Иисусе Еѵангильем аз вы родих. молю же вы ся. подобьници ми будете. то се вам попом молвить Павел моля. будете же вы попове подобници Павлу. великому учителю. учите же люди на добро. и обращаите от льсти тое дьяволе. к вере истиньнеи. служити единому Богу. да и вы речете пред Богом. пророческым гласом. се аз и дети и аз родих ученьем. аще ли ни то что имаши отвещати. а слышиши. ему же буде дано много. много от него и истяжют. И пакы рече. связавши ему руце и нозе. въверзете лениваго раба. в тьму кромешнюю. скрывшаго талант. талант есть ученье. а прочее и петье. и пьете. и ясте. и дары емлете у них. а поучити их не хочете. и аще тако деюще есте. да не примешаитеся к ним. ни дружьбы с ними держите. по еѵангельскому слову. иже рече. аще имаеши око твое лукаво. истъкни е. аще ли руку то отсеци ю. луце бо есть да один уд погыбнеть. неже все тело. не можеть бо погибнути праведник. про безаконьника. кое причастье свету к тьме кое ли причастье Христосу с бесом. тако же и служащиим Христосу. кое причастье к служащиим идолом. и угодья дьяволом1224 творящиим Павел Коренфеом рече. братие писах вам в посланемь писании. не премешатися вам к блудником. и к лихоемьцемь. рекше к резоимьцемь. и к грабителем. и к коръчьмитом. и к идослужителем. Коеже суть идолослужители. то суть идолослужители. иже ставять тряпезу рожаницям. короваи молять. вилам. и огневи. под овином и прочее их проклятьство. и пакы рече ныне писах вам. не примешаитеся аще ти есть брат так. ли блудник. ли резоимець. ли коръчьмит. ли пьяниця. ли служитель кумиреск. с таковыми. ни ясти. ни пити. изверзете злаго ни самех вас. таковии бо не наследять царства Божья. положи бо их окамененью неистовное пьяньство и быша слугы кумиром. якоже пишеть. седоша бо людие ясти и пити. не в закон. и въсташа играт. и съблудиша. и том часе падоша. 2900 и погыбоша за свое неистовое пьяньство. того ради не подобаеть хрьстьяном. в пирех. и на свадьбах. бесовьскых игр играти. аще ли то не брак наричется. нъ идолослужение. иже есть пляска. гудьба песни бесовьскыя. сопели. бубьни. и вся жертва идольска. иже молятся. огневи. вилам. мокошьи. симу. рьглу. перуну. хърсу. роду и рожаницям. и всем проклятым богом их. се же учение нам написася на конець век. темже мьняися стояти. да ся не падеть. темже възлюблении. бегаите жьртвы идольское и требокладенья. и всея служьбы идольскыя. да не в лжю будемь рекли крьщающеся отрицаемъся сотоны. и всех дел его и всего студа его. и всех ангел его. и всех служеб его. и всего студа его. такоже и обещахомся Христови. Да аще ся обещахом Христови служити. то чему не служим ему. нъ бесом служим. и вся угодья им творим на пагубу души своеи. не такоже простотою зле служим. нъ смешаем с идольскою тряпезою трьсвятыя богородиця. с рожаницями. в прогневание Богу. сам бо Господь рече. не всяк вънить в царствие. река ми Господи Господи. нъ творяи волю отца моего. и Павел рече видех облак. простьрт надо всем миром. и въпросих глаголя. Господи что есть. и рече ми. се есть молитва человечьска. смешено с безаконьем. того ради рече Господь. не можеть раб один работати двема господинома. единаго възненавидить. а другаго возлюбить. тако и мы братие. дьявола възненавидим. а Христоса възлюбим. вонь бо хрьстихомся. и его хлеб ямы. и его чашю пьемь и умираемь и здрави бываемь о немь. рекуще. слава тобе Господи о всемь. данем нам тобою. не томко в сесь век. нъ и в будущии паче. И пакы рече Павел. что убо требы кладуть страны бесом. не велю же вам обещником быти бесом. не можете бо пити чаше Господне и чаше бес. не можете бо причаститися тряпезе Господни и тряпезе бес. да не разъгневим Бога. таже рече. аще кто повесть вам. яко се требьно кумиром. не едите. того деля поведавъшаго. аще бо пьете и аще есте. все в славу Божию творите. Господня бо есть земля. и конци ея. таже рече. все ми леть есть. нъ не все на пользу. аще чрево брашну. и брашьно чреву. и тъ Бог да упразни. и пакы Павел рече. братие очистим себе от всякыя сквьрны плътьныя. и душевныя. творяще святыню в страсе Божии. всемь бо намь подобаеть стати пред судищом Христосовым. да приимемь кождо нас. противу деломь. яко же есмы створили. ли добро. ли зло. ведуще убо страх Господень. почто въспираемь. разумно глаголющая. и ведущая ны богоумьным ученьемь. в спасенье. надеюжеся на ваше спасение. и на сведенье. яко не вътще глаголю. веде бо яко приобретенье хощеть быти. вашего же и моего спасенья. аще бо быхом сами ся осужали. не быхом осужени были. судими же от Господа наказани есмы. да не с ненаказаными осужени будемь братье не велю вам не ведети беседы сея. нъ и инемь будете на пользу. хотящиим поучитися в спасение да бысте многы исторгъше. от сетии дьяволь. привели к пречистому свету. Господа нашего Иисуса Христа. и прияли милость. неже ти они. нъ и вы. и к Тимофею рече. вемь яко добр закон. аще кто законьне творить. яко правьдиву закон не лежить. безаконьныимь же. и непокоривым. и противящимся здравому ученью. и нечьтивыим. хулящим святая писанья. и раздрушающим заповеди святых отець. славы Божия не наследити. хвала си есть съведения нашего. в простыни и в чистоте Божии. а не в мудрости плътнеи. молю же вы именем Господа нашего Иисуса Христа. да то же глаголете вси. да не будуть в вас которы. да будете свершени в томже уме. и в томже разуме. възвести бо ми ся о вас. и пред вами. благодать и мир. от Бога Отца. Господа нашего Иисуса Христа. хвалю Бога моего о вас. и о благодати Божии данеи вам яко вам не лиховати никоего же дара. яко сведение Христово известися в вас. чающе пришьствия Господа нашего Иисуса Христа. иже посадит вы в дворех жизни вечныя. с всеми служащими Ему. о Христе.

3. Слово святаго. Григорья. изобретено. в толъцех о том. како первое погани суще языци. кланялися идолом. и требы им клали. то и ныне творят
Видите окаянную сию скверненую службу. стваряему от скверных язык. елени окаяннии. блядивыя жертвы ученьем дьяволим. изобретено потвореньем темнаго беса и кощюннаг. злым кладом. зловернии мняще суету истинную. служаще и кланяющеся идолом. некое ухищренье творят. мыже сих чада отметаемъся нечестивых жертв. и дыева служенья. и кладенья треб. критьскаго окаяннаго учителя. и мамеда проклятаго. срациньскаго жерца. еленьския любви. бубеинаго плесканья. свирелнаго звука. плясанья сотонина. фружьския слонница. и гуслеи. мусикеиския. и самара. иже бесяться. жруще матери бесовьстеи. афродите богине. и коруне. и артемиде. проклятеи. деомиссе. и недоношеныи пород. и финеиское безумное пьяньство почитают. яко бога. и семелино. требокладенье грому. и моланьям. и вилу. иже есть был идол. нарицаемыи вил. егоже погуби Данил пророк в ваилоне фаликаци же и фюфули. чтуться срамныя уды. и кланяються им. и требы им кладут. от них же болгаре научившеся. от срамных уд истекшюю скверну. вкушают рекуще сим вкушеньем. оцещаються греси. таверьская деторезанья. идолом от первенець. лаконьская требищьная кровь просяжаемая ранами еюже мажют. екадью богиню сию же деву вменяют. и мокашь чтут и малакию велми почитают. рекущи буякини пелепеловое темное мясо. имже насыщают боги. делфичьская ворожа. или кастелино запоиство. и волшебная проповедь. наузи смраднии. халдеиская остронумея. и родопочитанье и иеврачьския сны. и чары. извыкше. ефроновы скверныя басни. и кощюны. митрофа мука. нарицаемая праведная. проклятаго же осирада рожен. мати бо его ражающи и того створиша богом собе. и требы ему силны творяхут окаяннии. от тех извыкоша халдеи. начата требы им творити великия. роду и рожаницам. пороженью проклятаго бога осира. сего же осирида. скажют книги сорациньския. яко не лепым проходом проиде. но смердящим. того ради сороцини мыют оход. и болгаре. и терканнии холми. оттудуж извыкоша елени класти требы. атремиду. и артемиде. рекше роду и рожанице. тацииже егѵптяне. такоже и до словен доиде се слов. и ти начаша требы класти. роду и рожаницам. преже перуна бога их. а переже того клали требу. упирем и берегиням. по святом же крещеньи перуна отринуша. а по Христа Бога яшася но и ноне по украинам моляться ему проклятому богу перуну. и хорсу. и мокоши. и вилу. и то творят отаи. сего не могуть ся лишити. проклятаго ставленья. 2. я тряпезы нареченыя роду и рожаницам. велику прелесть верным крестьяном. и на хулу святому крещенью. и на гнев Богу. а се егѵптяне честь и требы кладут. нилу и огневе. рекуще нил плододавець. и раститель класом. огнь творит спорыню сушить. и зреет того ради окаяннии. полуденье чтуть. и кланяються на полъднь. обратившеся. сиже повесть велика есть. но мы лености ради. от многа мало избрахом.

4. Слово святого Григория Богословця. изъобретено в тълцех его. о том како пьрвое погани суще языци служили идолом и иже и ныне мнози творять
Видите ли окаяньную сию и сквьрньную служьбу стваряемую от сквьрньных язык. едини окаяньнии. блядевыя жьртвы. ученьемь дьяволемь. изъобретено потвореньем темьнаго беса. и кощунам злым кладомы требы. зловернии. мняще суету истиною. служаще кланяющеся идолом. некое ухыщение бесовьско творяще. мы же сих чада отмьщемся. нечестивыя жьртвы. дьяволя служения и кладения треб. критьскаго оканьнаго учителя. моамеда. проклятаго срачиньскаго жерца. и елиньскыя любве. бубеньнаго плескания. свирилнии звучьи. плясания сотонина. фряжьскыя слоньниця. и гусли. мусикия. и замара. иже бесятся жруще. матери бесовьстеи. афродите богыни. коруне. коруна же будеть и антихрисщя мати. и артемиде. проклятеи. диомиссе. стегноражанию. и недоношеныи пород. и бог мужежен. и фивеиское безумное пьяньство. почитают яко Бога. и семелино требокладенье. грому. и молъньи. и вилу. богу вавилоньскому. его же разби Данило пророк. тем же богом требу кладуть и творять. и словеньскыи язык. вилам. и мокошьи. диве. перуну. хърсу. роду. и рожаници. упиремь. и берегыням. и переплуту. и верьтячеся пьют ему в розех. и огневи сварожицю молятся. и навьмь. мъвь творять. и в тесте мосты делають. и колодязе. и ина многая же утех. фаликады. и в образ створены и кланяются им. и требы им кладут. словене же. на свадьбах въкладываюче срамоту. и чесновиток в ведра. пьють. от фюфильских же. и от аравитьскых писании. научьшеся болгаре. от срамных уд. истекающюю сквьрну въкушають. и суть всех язык. сквьрнеише и проклятеише. тавьрьская. деторезанья. иже от пьрвенець. лаконьская. трьбищная кровь. просажаемая ранами. то их епитемья. и тою мажють екатию. богыню. сию же деву творять. и мокошь чтуть. и кылу. и малакыю иже есть ручьныи блуд. пелопово. темное мясотворье иже насыщае богы творя е алъчьны. ли трипода. дьлфичьскаго. ворожа. и розгометания. и афинейския метания писаная в книгах. ли калуистово запоиство. чьтуть яко бога и елиньское волъхвование и волъшебную проповедь. и на узи смрадьнии. от них же никыиже язык гоньзнул. и халдеиская астрономия. и родопочитание. еже есть мартолои. и фряжьскыя сны. и чяры и усряче. и къшь. ефреновы. сквьрньныя басни. яже и всюда суть. и кощюны. митрофа. мука. нарицяемая праведная. проклятаго же осирида. рожение. мати бо его ражающи оказися. и того створиша богом. и требы ему силны творяху оканьнии. и от тех извыкоша древле халдеи. и начаша требы творити своима богома. роду. и рожаници. по того рожению. проклятаго. и сквьрньнаго бога их. осирида. того же осирида скажет книга лъживая и сквьрньная. срачиньскаго жьрца. моамеда. и бохмита проклятаго. яко нелепым проходом проиде. рожаяся. того ради и богом его нарекоша. и от толе начата мыти гузице. срацини. и болгаре. и тьркмени. и олико их есть в вере тои. и омытье то въливають в рът. оттудаже начата елини. ставити тряпезу. роду и рожаницям. таже егюптяне. таже римляне. даже и до словен доиде. се же словене начали тряпезу ставити. роду. и рожаницям. переже перуна бога их. а преже того клали требы упиремь и берегыням. по святемь крещении. перуна отринуша. а по Христа Господа Бога яшася. нъ и ныня по украинам их. молятся проклятому богу. их перуну. хърсу. и мокоши. и вилам. нъ то творять акы отаи. сегоже не могут ся лишити. наченше в поганьстве. даже и доселе. проклятаго того ставления. вторыя трапезы роду и рожаницям. на прельсть верным христьяном. и на хулу святому крещению и на гнев Богу. по святемь крещен. и череву работни попове. уставиша трепарь прикладати. Рождества Богородици. к рожаничьне тряпезе отклады деюче. таковии нарицяются кармогузьци. а не раби Божьи. и недели день и кланяются. написавше жену. в человечьск образ тварь. пакы же и се и еще егюптяне требы кладуть. нилу. реце. и огневи. рекуще. нил. плододавець бог. и раститель класом. а огнь бог егда съхне жито. тогда спорыню творить. того ради оканьнии. полуденье чтуть. и кланяются на полъдне обративше. досюде беседа си бысть. досюде могох написати. даже несоша книгы ты Царю граду. а мы выседше ис корабля. идохом в святую гору. нъ то бяше велико слово нъ дотуде написах.

5. Слово Святаго Григориа Богослова. изъобретено в толци его о том како первое погании языци кланялися идолом и требы им приносили. иже и ныне то творят мнози
Видители окаанную сию и скверную службу. створяему от скверных язык. еллини окаании. блядивыа жертвы. учением диаволим изобретено. потворением темнаго беса. и кощунам злым кладомы требы. зловернии мняще суету истиною. служще и кланяющеся идолом. некое ухищрение бесовское творяще. мы же сих чада отмещемся нечестивых жрътв диева служниа и кладениа треб. критскаго учителя окааннаго и мамеда проклятаго срачинскаго жерца. еллинскиа любви. бубеннаго плесканиа сверелнии звуци. плясаниа сатанина. фряжскиа слонница. и гусли мусикиа. и замара. иже бесятся жруще матери бесовстеи афронит. и богини коруне и артемиде и проклятеи диомисиа. стегноражению. и недоношеныи пород. и богомужен. и фивейское безумие пианственое почитают яко бога. и сьмелино требокладение грому и молниам и вилам. иже се был идол вил нарицаем. егоже погуби Данил пророк в вавилоне. фаликациже и фафули чтут срамныа уды и кланяются им. и требы им кладут. от нихже писании болгаре научшеся. от срамных уд истекшую скверну вкушают. рекуще яко тем вкушением очищаются греси. таверскаа деторезаниа идолом. иже от первенец. лаконскаа требищная кровь просажаема ранами. юже мажуть екадию богиню. сиюже деву менят. и мокошь чтут и малакию. и килу велми почитают. рекуще буакини. пелепово темное мясотворение. имже насыщаа идолы творя их боги. ли трипода дфличскаго ворожа. ли касталино запойство. и волхвование и волшебнаа проповедь. и наузи съмраднии и халдеискаа острономиа. и родопочитаниа. и фрачскыя сны. и чары и устряча и къшь. ефреновы скверныа басни. и кощуны. митрофа мука. нарицаемаа праведна. проклятаго же осирида рожение. мати бо его ражающи и оказися. и того сотвориша богом и требы ему силны творяху окааннии. от техже древле извыкше халдеи. начаша требы творити велики роду и роженицам. по рожению проклятаго и сквернаго бога осирида. тогоже осирида скажеть книга срацинская. яко нелепым проходом пройде смердячим. того ради срацини мыють оход и болгаре и тьркмени. и комли. отнудуже извыкоша еллини класти требы. роду и роженицам. таче египтяне даже и до словен доиде. сеже словени начаша требы класти. роду и роженицам. преже перуна бога их. и преже того требы клали упирем и берегиням. по святом же крещении перуна отринуша. а по Христа Бога яшеся. но и ныне по украинам молятся ему. проклятому богу перуну. херсу мокоши. вилом и то творят отай. сегоже немогут ся лишити. проклятаго ставления вторыа трапезы. нареченныа роду и роженицам. на велику прелесть верным християном. и на хулу святому крещению и на гнев Богу. Паки же и еще и се египтяне честь и требы кладут нили реци и огневи. рекуще нил плододавець. и раститель класом. а огнь творят рекуще. спорыню суща егда зреет. того ради оканнии чтут полудние и кланяются на полдень обратившеся. Сеже повесть велика есть. мыже лености ради мало написахом.

6. Слово от Святаго Евангелия
И пакы речь Господь. Аще хощеши помолитися Отцю твоему в таине. И отець твои видя тя в таине молящася въздасть тобе яве пред аньгелы свои и пред всеми святыми. Чтоже есть в таине. Иже кто кается душевных грехов и телесных. И епитемью дьржить. поститься не исходя ис поста. до исхода душа своея. и молитву емлють. егда душа ис телеси исходити начнеть. Телеснии бо греси инаци и душевнии инаци. такоже и пост инак душевныи. а инак телесныи телесныи бо грех телесьскы. а душевныи душевьск. Телесныи пост постившеся тажеясти. а душевнаго поста николижепрестати. Но оли в будущем вече опочинути. Телеснииже суть греси. убииства. блуди. чародеиства. Потвори. волшьба. наужи. идолослужение. требы идолом бесом. по мьзде лихоимание. еже есть всему злу пияньство. и всего  нужно писати. А се душевнии греси. хула. злии помышли. ереси. злопоминание. зависть. клевета ненависть.  прозорьство уныние отчаяние. неупование еже к Богу. иноверье еже чюжю веру хвалити. и примешатися к инои вере  и лгати. не право глаголати. росокы деяти облыговати правыя и клятися. и инаго клятвы догонити и роте водити. и к инои вере поганои приступати. и по кривемь прю деяти. и учитися острономии.  и веровати в метание.  и в лживая писания. и в елиньскыя книгы  в баснотворья. и в устряцю и в мокошь.  и в сносудець.  птиции чарове. В громник. и в колядник. и в всь мартолои проклятыи. и иже творят злы дни и часы. да будет пьрсть и нужа велика писати. Да тих грехов не вси каются. ни за то епитемия приимуть темьже не вси спасуться но избрании. Кое то суть избрании. Покорливии. послушливии. Ти бо волю Божию деють. а своих воль отметавшеся и Божию деють. Ти суть раби Божии. Господь бо рече иже суть духомь водими. то суть сынове Божии. Се же мало написахом. о телесных гресех и о душевных. нужа бо есть много писати да сами паки расъсмотрите.

7. Слово святаго Отца нашего. Иоанна Златоустаго. Архиепископа Костянтина града. о томь како пьрвое погании веровали в идолы. И требы им клали. И имена им нарекали. яже и ныне мнози тако творять. и в крестьяньстве. суще. а не ведають что есть крестьянство
Апостол Павел рече имьже разумевше Бога. а не акы Господа прославися. и похвалишася и истощишася в помышлех своих, и отемне несмышленое сердце их. и почтоша и служиша твари паче творца. сего ради предасть я Бог в страсти нечестия. Жены бо их все премениша. вещное требование не в вещное. Такоже и мужи их разгордевшеся. на блуд похотением своим. Мужи с мужи студ сдевающе. злая дела творяще. Яко тако деюще достоини суть смерти. Не точию то творять сами. Но и волю дають творящим. тако рекше попове деють. повинующеся им. и не хотяще их поучити. Молчаниемь заградиша уста своя. На пагубу малоумным. угодная им творять. чреву работають а не Богу. якоже и апостол глаголеть. имже Бог чрово и слава. в студе лица их. Како станете у престола Божия дрождгями воняюще и трясущеся аки каин, и Господь рече. Горе вам вожеве слепии. яко обходите море и землю. И творити и единаго пришельца сына дьбри огненеи сугубеиша вас. Горе вам вожеве слепии. ни сами въходите но и хотящим внити не даете. человечи забывше страха Божия небрежениемь и крещения отвергошася. и приступиша к идолом. и начата жрети молнии и грому. и солнцю и луне. А друзии перуну. хурсу. вилам и мокоши. упираемь и берегиням. ихже нарицають три ѳ҃ сестрениць. а инни в сварожитца верують. и в артемиду. имже невеглаши человечи молятся. и куры им режють. О убогая курята. оже не на честь святым породишася. ни на честь верным человеком. Но на жертву идолом режються. и то блутивше сами ядять. И инеми в водах потапляеми суть. А друзии к кладязем приходяще моляться и в воду мечють велеару жертву приносяще. А друзии огневи и камению и рекам. и источником. и берегыням. и в дрова. не токмо же преже в поганьстве. Но мнози и ныне то творят. А крестьяны ся наричающе. мосты. и просветы. и бделникы. и черес огнь скачють. мнящеся крестьяны а поганьская дела творять. навем мовь творять. и попел посреде сыплють. и проповедающе мясо и молоко. и масла и яица. и вся потребная бесом. и на пець и льюще в бани. мытися им велят. Чехол и убрус вешающе в молвици. Беси же злоумию их смеющеся. поропръщются в попелу томь. и след свои показають на пролщение им. Они же видевше то отходять. поведающе друг другу. и то все проповеданье сами ядять и пиют. ихже недостоит ни псом ясти. О злая дияволя прельсть. иже ни погании того не творять. А друзии веруют в стрибога дажьбога. и переплута. иже вертячеся ему пиють в розех. забывше Бога створившаго небо и землю. моря и рекы и источникы. и тако веселящеся о идолех своих. Не помняще слова реченаго солнце сияеть на грешныя и на праведныя. дожгь дожгить на праведныя и неправедныя. и давшаго нам всяко обилие от плод земных. Мы же оставивше животодавца Господа. А к диаволу бежим. иже не хощеть никомуже спасения. но с собою хощеть в дно адово въвести. Апостол рече исбираеши собе гнев в день гнева явления праведнаго суда Божия. иже отдаст комуждо по делом его. якоже иван златоустыи рече. Послушаите глаголемых крестьяни. Но токмо именемь наричаются крестьяни. то льстяться нагым нароком. Словом. бо и слытьемь  мнози суть  крестьяни. а образомь  мало их. Образомьже аки и ученики Христови. а делом предатели.  Словесемь богобоязниви. а деломь  нечестивии. Словесемь милосерди а образом елини. Нарокомь крестьяни а деломь страньници. Съсмесишабося с странами  и навыкоша дела их. По истине в нас ся сконца пророчество. Каци бо суть крестьяни. а послушающе. кощюн елинскых. и басини жидовьских. и рождество и почитании звездъных. и птица гласа. и чарове. и волхования. и заскопня душевнии. и лет и снов. и над источникы свеща вжагающа. и кумирьскую жертву ядять.  и кровь и удавленину. и зверемь уядено. и птицами угнетоно. Многа ина подобная сим. Како крестьяни нарещися имуть. а сице творяще. Кимьли дьрзновениемь. смеють наричатися крестьяни. Каколи смеють к святым таинам прити. а горше суще елин. Послушаите бо паки. каци убо крестьяни. а поганых образ носяще.  и прокужающе лице. или поглашения или плясания. Или плескания руку сотонину. или утварь женьскую на мужех си творяще. И несть им никоеяже ползы наричатися крестьяном. Якоже бо девица донележе хранить девство. то по истине взываеться и есть. ащели прельстится ким плотным. и девство погубить. то несть уже девица. тако и наричаемыи крестьянин. Аще завет преступить. и обеть попреть а еѵангельское слово. отвержеть. а поганых дела делати начнеть. никиже успех наричатися крестьянину. Якоже и выше рекохом. Разумеите же вси възлюбльнии. Яко малыми словесы всех сих отвергохомся глаголюще. Отметаемся сотоны. и всех дел его. и рече же при всех да помышли что всех дел его да блюди и помышли кому ся обеща. ни ангелу земному. ни царю. ни князю века сего. Но царю царствующим. и князю князьствующим. тому же ся и обеща и исповеда пред многыми послухы. да уже в руку его ты и словеса твоя. Или к томужди его приходяща с небеси ждеши его. несущая написаныя книгы твоя. имже почестися есть пред ангелы и человекы. Темже брате схранися поне ныне от поганых стран писания. Послушаите апостола глаголюща. се же глаголя о послушаю. не ходити вам еще. якоже и другыя страны ходять. в пустоши ума своего. отемневше разумом а вы не тако навыкосте. Но разумеите Христомь глаголемая возлюблении. не смешаитеся. с деющими тако. Мнози учители изгыбели. и еще умножитися имуть. Но блюдитеся яко денье зли суть. и время слуги си избирають. Но не почюдися аще и пастуши волци будуть. К епископом бо и попом беседуя апостол Павел глаголаше. Яко от самех вас въстати имуть мужи глаголюще разъвращеная. темже да не льстит вас никтоже. извну имыи образ ангелскыи. А изнутрь диявольскии. Темже и Господь глаголаше блюдитеся да никтоже вас не прельстить. И аз тоже глаголю да никтоже вас не прельстить. ни от внешних ни от утрьних. ни епископ ни поп. и ни дьякон. ни дьяк. ни наагностянин1258 ни ин. аще кто будеть глаголяи развращеная. Ниже приходять к вам в одежах овцах. Из утриже суть волци грабители. иже имуть образ благочестья а силы и его отмещются да вы любимии не прельститеся. Но якоже и приясте Господа нашего Иисуса Христа. в томьже и ходите и Бог мира да будеть с вами. амин.

8. Поучение Новгородского архиепископа Луки-Иоанна (XII в.)
Се Богови, братие, тако изволшу и святей Богородице и вашей молитве, оже мне худому немощно вы отречися сего (священного) и великааго сану, егоже несмь достоин был. Нъ то Богови съведущю и пресвятей Матери Его, яко не сам его възисках, нъ оубоявся (оубояхся) соуда Божиа и вашей любви, иже до моей худости. Да якоже изволили мя есте и приноудили на се дело, такоже вы пакы достойно есть и послушати. Не рците тако: «(с)вой ны есть, да что ны хочеть створити?» Нъ оже, братие, погодится что телесное, тъ надеюся на Бога и на святоую Богородицю, яко всяко не хощу озлобити вас, своей братии: ни на то бо есмь въшел, а то Бог весть и вы. Аже что либо погодится душевьная вина, ано того не лга преступити, ни речи тако: «свой есмь им, да того деля оумлъчю, не хотя братии своей досадити», то по то вы ся не поручаю, да не моимь небрежениемь внидет в вы слабость, а от вас в чьловечьство, и аз боудоу вина всему отчьству своемоу, и вы в моем неродстве погыбнете душами: то за что ся боуду и родил? И вы вътъще трудилися, ищюще мене. Да о сем ся, братие молю: еже хощу рещи от худооумья моего, приимите с любовью. Нь (не) о себе бо се глаголю, нъ нудить мя святое писание, еже нарекшися пастоуху не мълъчати. И пастоух бо овчий, оже и мълъчить, тъ въсхытаемо овча вълъком от стада его, и платить è соугоубо господиноу овчате: тъ колъма аз оже оумлъчю в своем неродстве, боудеть пакость стаду Христовоу, еже есте вы и дети ваша духовныя.
1. Нъ о сем вы хощю первое начати слово, еже бы нам самемь не вели и пригваждатися свете сем, нъ дабы ны добро и люди оучити преже всего не вдаватися многомоу питию: сами бо сведаете (весте), оже в питии болши всего бываеть души пагоуба, оли простьцем, а оже нъ нам (али то простьцом, а оже то нам). Оже бо простьчь как любо грех створить (сице бо простьцю как любо грех сътворитъся), то до себе ему вина тъкмо; а оже мы, тъ не нам одиным (единым) пагуба, нъ и всем людем: хотять бо ны рещи: «а попи чему творять (а попове чему не творят того)?» Да не на нас събудеться пророческое слово: «пастоуси мнози посмрадиша виноград мой и оскверниша часть въжделеньноую мою». Вижю бо и слышю, оже до обеда пиете. Да оже мы до обеда пием, то ти простьчемь и черос ночь: на кого бо им зряще въстягноутися? Нам (сам) бо рече Господь: «да просветится свет вашь пред человекы, да узрять добрыя ваша дела и прославять Отца вашего, иже есть на небесех». Не едино же то, оже до обеда пиете, нъ и в вечере оупившеся, а заутра слоужбоу стваряете, человеком оугодия творите, а не Богови. И оли бо с дроугом не л̾га по пирью добре беседовати, аже нъ с Богомь. Да то ми ся мнить, яко велик грех собе приобретаем в том слоуженьи. Да молю вы ся, братие, останетеся того (тако): в мнози бо питии многа беда есть, души грех, телоу болезнь, от людий оукор, церковьнаго стоания права нетоуть. Тъ бо ны диавол въкладываеть (влагает) в оум, яко оу пианых людий добыти (побыти): съемше с Бога надежю, положили есмы на пианыя люди. И сами бо ся есмы с теми мысльми бороли, а егда же есмы послоушали их и пошли по вечернии в пир, тъгда не добыл ничтоже. А егда же съседел дома есмь, тъгда ми вдал Бог его же ни в і҃ пиров не добыти. К нам бо есть речено: «ищете преже царства небеснаго и правды его, и си вся приложатся вам».
2. А и еще слышю и другыя попы наим емлюще (намеемлюще), еже священичьскоуму чину отиноудь отречено. Пишет бо в Моноканоуне: «аже который попин, или дьакон, или клирик обрящется въземляй лихвоу, да или останется, или извержется». То мне то оу вас съведоуще, како оумълъчати? Да от сего дне останетеся того; кого ли оуведе, тъ и кун лишу, и в казни боудеть от Мене. Не дай бо Бог святых Отец оуставоу попрану быти нами. Нам (самем) бо речено, еже снабдети заповеди Его. И сам Господь в еѵангелии глаголеть: «възрите на птица небесныя, ни сеють, (ни орють), ни жнють, ни (в житницю) събирають, нъ Отець небесный зпитает аꙵ. Самем бо достойно перьвее себе въстягноути о (от) какой любо вещи, тоже людий бе-зазора оучити.
3. А егда приходят дети к вам на покаяние, моужи и жены, въпрошайте самех: ноужно бо есть человеку, еже самому начяти и молвити своя грехы, оже моужем, а женам то велми тяжко; но вам достойно съпрашивати с тихостию, ать онем легко поведывати. А иже кто покаеться, не мозите тяжки заповеди дати. Сам бо Господь глаголеть: «радость бываеть о едином грешнице кающимся»; ни пакы же отноуд на слабость свести без рассоужения, да не мы будем повинии грехом их. Сим мощьно все то оуправити, оли прилежанием, ти почитанием книжным. «Сыну, прилежи почитанию книжному: в тех живот нашь». А оже мы не почитати начнем книг, то чим есме лоутше простьцов, аже с ними же начнем ясти и пити, такоже на беседе сидети?
4. И еще дроузии лики играют, а всего того святии Апостоли и святии Отци. възбраняют нашомоу саноу. Речем бо ли тако: «попы есмы, да тем избоудем моукы». Не мни, яко избоудем, но тако болши ны есть моука всех. Сами бо весте, иже который человек ремество имый, ти его не делаеть, может ли ся обогатети? Тако и мы есме попове, а пороученных душь нам человек не правити начнем, то можем ли обрести богатество царства небеснаго и тех довести, о нихже ны есть слово отдати Богу, рекоуще: «се аз и дети, яже ми есть дал Бог?» Да блюдем, братие, себе и онех, да не на нас съблюдетъся (събоудетъся) книжное слово, еже ся глаголеть: «си пастоуси, вземлюще от овець млеко и волноу, а о стаде небрегоут и повинни соуть Богови... така честь попом, якаже сьде: такоже бы и нам пакы достойно прилежно печися душами их о спасении. Пишеть бо святый апостол Паоул: «прилежащии попове соугубей чести достойне соуть».
5. А еже о причащении, тъ блюдите велми: веде бо другых попов обычай, оже человек новопокается (аже нов человек покается), любо си в великий пост, даже и (не) скончаются 40 дней, ти дають причащение. А говение есть всем крестьаном равно, акы покаалником, тако непокаалником, да того деля не чтеться (не чтоутъся тыи дни) в опитемью; нъ оже новааго покаалника, тъкмо от церкви отлоучити на все говение (на всяко говейно), а на въскресение въвести в церковь, нъ причащениа не дайте им (а причастиа не дяти ему), да оли пакы нъ (поли) опитемью давши по расоуженью, како боудеть достойна (достойно). Да егда скончаеть и напрочь почнеть кроутитися на добро, тоже дайте причащение. Пакы ли (как ли) кто покается, а не за что боудеть опитемьи дати, а темь за 40 дней дайте, любо си томь же говеньи.
6. Аже кто больн покается, а боудеть при смерти, дайте причащение, любо си и велми грешен (хотя бы был вельми грешон); даже (аже) ся изболить, а тъгда дайте им опитемью. Пакы ли Бог поимет и, да и то ему досыти (да то емоу благо), еже покаялъся (иже ся покаял); а оже еще причащенье въ(да)дите, а то велми добро (а причастие даси я, то велми добро).
7. А сиротам не мозите великой опитемьи давати. Пишеть бо в заповедех: «соущим под игом работным наполы даяти заповеди». Да не мозите отягчати заповедию, оть вси каются. Иго бо Христово легько есть.
8. Аже пригодиться кому душегоубьство, то възбраняйте емоу церквьнаго въхода. Святый бо и великый Василий пишеть то в опитемью, еже не влазити в церковь, ни доры ясти, ни еѵангелиа целовати.
9. А еже о брашне и о питьи, а то по человеку расоудити, как (како) боудеть; оже боудеть крепок, а болшю заповедь дати ему, да нь токмо греха избудеть, но и венча добоудеть (ко спасению сподобитъся); пакы ли кто боудет слаб, а льжьшю заповедь дайте (дай лжейшоую заповедь), оть в отчаяние не въпадеть (дать в отчяяние впадет). Того бо деля нам повелено (дано нам и повелено) есть человечьскааго мятежа укланятися, да быхом ничтоже без расоуженьа створили, да и онех быхом свободили от греха, и сами быхом мьздоу от Бога прияли.
10. А еже о крещеньи детиньмь, то держите оу себе оустав блаженаго Нифонта, якоже и в Молитвьнице (Монокануне) кажеть: в первый день, егда зовоуть вы в перьти, творите молитву, юже творите над (с) соудом оскверньшимся: «Господи Боже нашь, рекый Петрове: в (с)соуде плащаничь(нь)мь», а имени не наричайте тъгда. В 8 день принесоуть младеньць к дверьмь церковнымь, и тоу молитву створше, имя нарещи, а за 40 дний по рождестве крестити и, а 4 молитвы по 10-ю глаголите (молвити) запрещальнеи (запрещеньнеи), якоже оуказываеть. Не лоуче бо (вы) съседети в пиру или на оулице (–кощунами смеющеся). Аже ли вы ноужно все дроуг крещение (священие), а измълъвливайте переди днем те (тем ти) 4 молитвы по 9-ю, а коли хрестяче, то все по одиною: тако вы и аз творил (–се). Пакы ли болно боудеть, а по одиною (или болен боудет, ино по одною). А егда оуже крестивше, а тъгда пакы исплъните запрещальныя молитвы. Не мозите обливати детий, нъ погружайте, а съсоуд чист дръжите на то. А водоу относять опять на рекоу. А до 8 дний не решите, а причященье давайте в тоу 8 дний, коли нъ слоужаче.
11. А кто детя доить, мати или коръмилица, оть не едять мяс, ни молока, и до обеда говеють, до осьмого дни.
12. А се ми ся годило ведати и слышати оу прьвых попов, оже рано мывшеся, а на обеднии слоужать: а то вы братие, велми грубо, не мозите того створити. Не рците тако, яко слышали есме и видели есме оу прьвых попов. Вы сами ведаете, оже наша земля недавно хрещена, а передняго вы не лга поминати. Сами бо ведаете (и сами бо весте), оже и святии Апостоли, егда оучахоу люди на веру, то не тяжкы заповеди заповедахоу людем, нъ токмо глаголаху: «хранитеся, братие, от кровоядениа, и от мертвьчины, и от давльнины, и от блоуда, егоже и вы бороните детемь своим.
13. А се слышу же, оже преже 40 дний хрестите дети, оугодия человеком творяще. То ти двое зло творите: да и Божий закон преступаете, и детя нечистоу матерь съсеть, а оуже хрещено. А сами ведаете, оже всяка жена преже 40 дний не очищается. Нъ оже будеть болно детя, то ноужа и закон преступаеть; а оже сдорово, тъ наша вина. А добро творяще, въстягайтеся и от того, да не боудем в той вине пред Богомь.
14. Нъ и се вы хощу, братие, мълвити, нъ не зазрите ми: не бо осужая вас глаголю, нъ любя вы, якоже вы мене възлюбисте, дабы никтоже вас не погыбл душею; да чи кто вас, братие, имееть какоу вину душевную, яже отлоучаеть от поповьства, а Бога деля и своего спасениа, не мозите оутаити мене. Аз бо ялся по се великое дело не себе деля, нъ вас не смея ся отрещи. Ныня же чи кака кому вина, а не рците тако: «аже останемся поповьства, а помирати ны боудеть гладомь». Не дай Бог того, оже быти тому на моей братьи. Святая бо София не оубога есть, да мочно ми есть и в церковь въвести, и хлеба даяти. Мне бо некому добытка копити, ни жене, ни детем, ни в-ыноу землю слати, нъ вы моа братия, вы же дети мои, да не бы что (не)добро было душам вашим мною хоудым, да бысте не вътще троудилися, ищюче мене. Да не мозите ми поречи что, еже о том въпрошах вас, ищя вашим душам спасения.
15. Некогда ми приде в оуши вещь, яже есть отречение иерейскоу чиноу; нъ аз мню, яко то лжа есть. Нъ обаче не ангел есмь, нъ человек хоуд, да ноужа ми есть млъчати (не млъчати) о том. Не веде бо то лжа ли есть, истина ли, да того деля глаголю. Аз бо бых рад, да бысте вси бес прирока были, аче и сам в гресех живоу. Святый бо Иоан Златооустый глаголеть: «аз тачех епископ не мню, иже всем оугодьа творять, и акы на покоище на епископъскый стол приходять; нъ тех блажю, иже паче своего спасения о вашемь спасении пекутся». Тому же словоу аз поревновав, понудихся на беседование се. И вы бо, братие, сами весте, оже аз не свою волю створих, нъ вашю. Оже ли кто, дееть, хотя отричался, а вътай не хотел, а прости и Бог, яко неправдоу есть молвил; нъ и от сего вы възбраняеть в Манакануне.
16. Егда жена носить в оутробе, не велите ей кланятися на коленьхь (до земли), ни роукою до земли, ни в великый пост: от того бо (в том) вережаются и изметають младеньца. Даже (да еще) мы от того не възбраним, то ти наша вина; нъ токмо велите с 8 на день, или боле, как боудеть человек, нъ толико малое поклоненье, а не на коленьхь, ни роукою до земли. Нъ повелите милостыню вдати за поклон по силе, како кто мога; или пакы кто оубог, тъ где взяти?
17. Пакы же възбранивайте женам, оть не ходять к волъхвом: в том бо много зла бываеть; в том бо и доушегоубьства бывають разнолична, и иного зла много, егоже не дай Бог ниединомоу крестьаниноу того створити. Нъ аз бо есмь дължьн все вам въспоминати, а вы правите.
18. А се пакы пришел есть великы пост, в ньже бы достойно первее нам въстягнути(ся) самемь от питьа отиноудь, такоже и от коръмле по силе, да быша и людие такоже створили, на нас зряще. Нъ всяко сами ся въздержите от всего, и детем не дайте медоу пити по все говение, ни сами его пийте такоже. Видите бо обычай в граде семь, оже насиливо пьють; даже (да аже) любо си и ныне не возбороним им, то како говение оуправять? А вы сами ведаете, оже сий пост крестьяном всем оуправлен есть десятина от всего лета. А и сам бо Христос постися, образ нам дая; даже оуже любо и ныне не пепечалуемся о гресех своих, тъ како и наричаемся крестьяны? Нъ и се слышю, оже другыя попы по чистей недели дають в вторник и четверток двожды днемь ясти и великым людем, а того нету в уставе: нъ аче кто хочеть и рыбы ести в та два дни, нъ обаче одиною днемь: тъкмо в соуботу и в неделю двожды днемь ясти повелено. А то есть повелено старым и немощным, и сиротам, и молодым детем, иже то и еще не могоуть говети; аже съврьшеным и свободным, а темь не дайте двоици днемь ясти, разве в соуботу и в неделю. А от жен не отлучайте по нуже, оже сами не изъволять по советоу подроужьих своих. А нам повелено есть тако, еже чистей недели и страстней и въскресней до конча (еже чтити дни страстьныя и въскресенья до конца), тъ тех трьи недель възбраняйте. А се слышал же есмь, оже дроузии попы глаголють детем своим: «оли все говенье не лежите с женами, тъже дадим причастие», тъ того нетоуть. А вы, попове боудуче, оже въсхощете слоужити коли, тъ чина много дний отлоучаетеся от пападий своих? И оли то попом боудя, аже нъ простьчи, то любо си боудоуть и в говеньи (съблюлися) не оублюлися от жен, дайте причащение: в своей бо жене нетоуть греха; но оже боудоуть достойни и исправлени (достойно исправили), тоже дайте причащение им (то давайте им). Слышите святаго апостола Паула глаголюща: «аще кто причащается тела и крове Христове, недостоин сый, тъ грех собе приемлеть». Блюдитеся, братие, того, и еже даяти без исправления (не давати без исъправы), да не мы будем повинне в том. Аже холостым, то не дайте отиноудь иже блоуд творять; оли нъ при смерти, тъже дайте.
19. Аже кто покается оу вас, ти боудеть не венчался с женою, нъ любо боудеть в вечере привел, или оумчал, или положил девку жене, любо сьблялъся, то не мозите того тако оставити, нъ испытавше добре, оже хочеть ю водити жене, въведше в церковь, венчайте же, аче и с детми. Нъ преже глаголите молитву, на оброучение девице: «Господи Боже нашь, оброучивый себе язычную церковь девоу пречистоу», и потом глаголи молитвы венча(н)ию до конча. А потом вдати опитемью за то, занеже не по закону Божию съчеталася.
20. Аже вы позовоуть в святый день к боли (в свят день к болю), или детяти крестит, тъ любо си и слоужбоу оставите, нетоуть вы в том греха, нежели оумреть человек бес покаяния, или детя не хрьщено: то велми тяжко есть; подобно бо то душегоубьствоу, оже нашим (небрежением) тако оумреть.
21. Бороните же людем крестнаго целования: вы бо сами ведаете, оже в нашем граде мнози гыбять в том.
22. Наипаче же всего понужайте на милостыню. Сам бо Господь в еѵангелии глаголеть: «блажени милостивии, яко ти помилованы боудоуть». И пакы пророк глаголеть: «блажен разумеваяй на нища и оубога, в день лют избавить и Господь». И блаженый митрополит оучашеть мя: «Чадо, прилежи милостыни; зри Христа оу нищаго в роубех седяща и к тобе руку простирающа». Вы сами весте, оже слабость ны постиже, даже и еще ктому милостыни не боудеть! А от неправеднаго събраниа велми възбраняеть (възбраняйте), занеже не требе есть ничемоуже неправедный добыток. Аще бо и хощеть от него милостыню створити, а ни во чтоже вменяется пред Богомь. Святый бо Филарет Милостивый пишеть: «аще кто от неправеднаго богатьства (добытка) даеть милостыню, то подобен (подобно) есть семоу, якоже бы отець зрел сына своего зарезаема пред собою, тъ кольма есть емоу зло: такоже и Богоу на неправедноую милыстыню зрети зло» (есть). Оже (иже) творять ся милостыню творяще, а зъданьа роукоу Божию (роукою Божиею) обидяще, да велми того бороните (браните). От праваго бо (а от праведнаго) имения, аще и мало что створять милостыню, то велико въменяется (мниться) пред Богомь, якоже и она вдовица, две меднице (цате) въвергьши в темницю, боле всех (–много) въметавших похвалена бысть от Бога.
23. А и се же веде, оже дроузии попове в алътаре за святою трапезою ставляете каноун и хрьстите ту и пиете в олтаре, ли заупокойное борошно вношиваете, а и еще скоромно. А и в сь олтарь, идеже просфуръмисанье есть, никакого каноуна вносите, аже нъ в великый: третий бо олтарь на то оучинен есть. Ни под святою тряпезою ставляйте чего: велми бо то гроубо есть, да от того боле възборонитеся.
24. А о церковномь стояньи сваритеся на люди, оть мълчать, наипаче же на жене: отиноудь бо не ведаем ся (сия), почто ходяче.
25. А покаяльныа дети часто прозывайте к собе и въспрашивайте, како живоуть: дроузии бо соромяжливы бывають (срамляющеся), а дроугым диавол запрещаеть, а того ловя, негли быша неисправлени оумьрли (а того деля, ци бы не исправившеся померли).
26. И о тоурех, и о лодыгах, и о колядницех, и про беззаконный бой вы, попове, оуимайте детий своих; или кого оубьють, а вы над ними в ризах не пойте, ни просфоуры приимайте. И сами бо ведаете, оже всего есть лоуче, оже имееть человек житие свое чисто, в покаяньи: тъ бо есть бесоу злодей, а Господоу раб (а сами бо весте, оже всего лоутьче есть, что человек чисто покаяние имеет; а бесоу то есть злее всего).
27. А дети тако оучите, от чьстять родитьль своихь (родителя своя). Самого Господа (Бога) заповедь, иже рече оуноши: «чести отца и матерь».
28. А от гневодрьжанья сварите и вельми. Глаголеть бо писанье: «гневлив моужь правды Божиа не съведаеть (не свесть)». Ангели бо никогда же не имеють ни гнева, ни свара: бесплотни бо соуть. И мы есмы человеци, да много ся в нас (на нас) издеваеть всего зла; нъ Бог положил покаяние и прощение по своей милости. А беси пакы никогдаже не имеють мира (милости, ни мира), нъ всегда в своемь зле соуть. То ти мы есмы человечи, тъ (но) ангельскы не можем жити, абы нам человечецкы, еже которовавшеся (аже превшеся), а пакы прощенье взяти; а бесовьскы не дай Бог жити ниединому христьаниноу, оже бес прощения жити: тако бо и наречеться сердит человек храмина есть диаволу. Да достойно бы от того възбраняти вельми.
29. А от гордости такоже претите (претит вы). Вы бо (ибо) сами весте, якоже (яко) гърдость в ангеле бе (бес оучини), и отлоучен бе чину своего (и оумрачи я). На кротость понуживайте. Сам бо Господь глаголеть: «блажени кротци, яко ти наследять землю». Оучите же и на се дети, еже не осоужати никогоже о гресе. Глаголеть бо святое еѵангелье (святый Иоан в еуангельи): «не осоужайте, да не осоужени боудете».
30. Да и о сем вы ся, братие, молю: не мозите на мя пожалити, чи кого ся годило коли озлобити словом. Вы бо сами весте, оже я переди имел вас акы братию и отци, и надеюся на Бога, яко и ныне такоже имею. Нъ оже ся съключить кака любо вещь неключима, да мне от того будеть възборонити, и вам не послоушати, акы «на(м) свой» рекше: тъ то есть, братие, грубо, а в том родиться кака любо душевная вина. Яз надеюся на Бога и на святоую Софию, яко не имею той мысли, оже бы что на вас замысливше, абы оу кого что взяти: тъ того ми не дай Бог; но токмо блюду души своей и вашей, абы что не по чиноу ся створило в вас.
31. А простите мя, братие, еже любо си мало слово изрекох от хоудооумья моего, а вам бо се добре ведущим. Но вы сами ведаете, оже яз не который книжник. Аже что боудоу нестройно изрекл, и не зазрите ми, зане нищь есмь моужь, невежа, и не оумею, по что (ся) имоу. Да и еще вы бых мълвил, нъ да луче (не далече) есть малое се исправити, а не многааго в забытьи положити, и да имев святоую вашю молитвоу.
Аминь.
В Археологическом Музее при Киевском университете, среди вещей, выкопанных из Полянских курганов, обращает на себя внимание небольшое металлическое изображение человека, в виде маленького идола – божка.
Странно, что еще в XVIII в. академик Георги в известной своей книге «Описание всех обитающих в Российском государстве народов» (С.-П.-Б. 1799 г.; первое издание этой книги по-немецки, французски и русски в 1776 г.) заявлял, что «суеверия народные Россиан («смешные загадывания глупые странности», и проч.) были некогда, а ныне (то есть, во второй половине XVIII в.) больше почти не существуют, со времени благотворительного введения народного просвещения науками, художествами и истинными правилами нравоучения и богословия» (ч. IV, стр. 192 «Россианы»), Очевидно, или последние были еще очень незначительны, или Георги еще и не предполагал, какие открытия последуют в этой области в XIX веке.
Ср. Über Totenverehrung bei einigen der Indogermanischen Völker von Dr. W. Galand, Amsterdam, 1888 г., стр. 79: конец зимы – конец года у индо-европейских народов было по преимуществу времен воспоминания о мертвых (душах предков, и проч.), жертвоприношений в память их и проч.
По Паисьевскому Сборнику XIV в., – Тихонравов, Летописи Литературы, т. IV. М. 1862 г. Это и следующие поучения издаются по сличении их печатного текста с подлинным рукописным.



Источник: https://www soika.pro/dok/veroispovedanie /rus samobjitnaja/
Категория: Святоотеческая литература | Добавил: сойка-soika (05.04.2022) | Автор: Сойка-Soika W
Просмотров: 19 | Теги: благочестия и христианской жизни П., Поучения о разных истинах веры | Рейтинг: 0.0/0
Всего комментариев: 0
avatar