Поучения о разных истинах веры, благочестия и христианской жизни П.В. Владимиров ( 7)

1. Неделя о мытари и о фарисеи, слово святаго Иоанна Златоустаго, патриарха царяграда, поучение
Придете убо днесь, братие; послушавше божественнаго глагола Христова, бодрииши будем. Притчю бо о мытари и фарисеи нашего ради спасенья глаголать, не бо сниде праведных ради, но грешных на покаянье. Человека, рече, 2 внидоста в церковь помолитися – един фарисей, а другой мытарь. От начатка словеси познаем: кождо нас в себе оба имуще. Церковь разумеем составленье своего телесе, якоже апостол глаголеть: церквы есмы Бога жива (2Кор. 6:16). Человека же 2 сердце и душа, в ней же правда и грех; но правда убо высокомысльем низпадаеть, грех же смерениемь потребляется. Рече Давид, яко не (о) правдиться пред тобою всяк живый (Пс. 142:2), и пакы: смерихся и спасе мя (Пс. 114:5). Сердце убо есть фарисей, иже не храни добродетелей, но исправлении величаеться, на ленивейшая възносится; не бо весть о себе написанаго: не хвалитеся, ни глаголете высокый в гордыни, да не изидеть велеречье из уст ваших (1Цар. 2:3). Душа же сама показаеться мытарь, понеже чиста Богом створена бысть, в телесе оскверньшися: на небо възрети не хощеть и, бьющися свестью злых дел, бежерельными въздыханьи ивопиеть: Боже, помилуи мя даром, еже есть: не въсхощи со мною створити словеси испытаниа; тем и приемлеть покаянием оправдание; сниде бо, рече, мытарь оправдан паче, нежели фарисеи. Но да никто же о сем блазнится, помышьляя разделяема на двое человека, но мысль от словеси отсекаем; воюет бо, рече, присно плоть на душю; два супостата не престаета борющася, въстает бо несытость на пост и величание на смереномудрье и блуд на чистоту душевную. Два коньника быста мытарь и фарисеи; спряже фарисеи два коня, да постигнеть жизнь вечную: един конь добродетель и молитву, а другии конь гордость и величание и осужение; запя гордость добродетели, и разбися законьная колесница, и погыбе самомнимыи всадник; никто же бо о себе честь приемлеть, но званыи от Бога; рече бо апостол Павел: не хвалися седя на ветви, не ты бо корень носиши, но корень тебе (Рим. 11:18). Спряже же и мытарь два коня: един конь злая дела и грабление и нечистота и несытость, а другии конь укоризна и смирение и неотчаяние; и спасе всадника смереная надежа; единем бо словом мытарь обретеоправдание, рек: Боже, оцести мя грешнаго и помилуи мя! Добре рече пророк: близь есть Господь всем призывающим его истиною (Пс. 144:18). И преможе слово делу, фарисеи бо праведници нарицахуся. Тем, слышаще Христа глаголюща: аз придох взискать заблужьших, но укоряюще и глаголаху: еда кто от князь верова во нь или от фарисеи? (Ин. 7:48) и не хотяху бо прияти во общение кающихся. Тем и в церкви осужаху мытарев и, своя добродетели щитающе, величахуся. Се же слышав мытарь, аки не имея дерзновенья,не хотя ни очью възвести на небо, но бъяшеся в перси, да подвигнеть душю на покаяние, сердце на умиление; оттуду бо исходят злии помысли и глаголаше: Боже, милостив буди мне! Боже, оцести мя грешнаго и помилуи мя! Тем же и мы, братье, подражаемь сего мытаря; велико добро смерение, имже сам Христос смерися и спасе ны и всех учить смереномыслити, глаголя: научитеся от Мене, яко кроток есм и смерен сердцем (Мф. 11:29) и: яко всяк возносяися смерится и смеряяся вознесется (Лк. 14:11), и: егда сътворите вся повеленая вам, глаголите, яко ненадобнии раби есмя, и, еже должни бехом створити, и створихом (Лк. 17:10) и: яко Господь гордым противится, а смереным дает благодать (1Пет. 5:5). Богу нашему слава в векы.

2. Неделя о блуднем сыну, поучение святаго Иоанна Златоустаго, сказание евангелия от Луки
Възлюблении, послушаите самого Христа, о покаяньи учаща нас и глаголюща притчю: человек, рече, некто имея два сына. Кто есть человек? Человеколюбец Бог. Кто ли два сына? праведници и грешници. Рече же меншии сын ко отцю: отче, даи же ми достоиную часть именья. Добре убо испроси самовластье, никого бо не нудить Бог не хотящих ему работати. Именье же се есть небо и земля; море и реки и всю тварь на работу нам Бог дал есть; закон и пророки нас ради послал есть. Но меншии сын, приим от отца имение, и погуби зле, створи собе в твари боги. Стареи же сын Бога и творца твари не уступи. Меньшии же сын отиде на страну далече. Страна далеча есть о телеси попечение, похоти греховныяи лукавное миродержание; близь бо сущии  Бога тех  не творять. Аще ли отступим от Бога,  то погубим Божии д ар, пишет бо ся: се удаляющиися  от Тебе погибнуть (Пс. 72:27), и пакы рече: глад бысть  на стране тои, не глад хлеба, но еже не приимати святого причящениа;  и нача лиховатися.  Боящии же ся Господа не лишатся всякаго блага, яко несть лишения боящимся Его (Пс. 33:10).  Лишающю же ся ему и гладом гибнущю, и шед прилепися к единому гражданину земля  тоя, еже  суть беси. И  посла его на село свое  свинеи  пасть, сиречь учить иных  злым делом; якоже бо  свинья не может вверх  смотрити,  тако и  согрешаяи не можеть помыслити  о  небесных. Свиные же пастухи си суть разбоиницы и блудници и лихоимци иже  инех на  злое  учать; и хотяше, рече, сытитися  от рожець,  яже ядяху  свиньи.  Рожци  суть греси; не имать же сыти  грехолюбець, но в мале насладится и  в веки  мучен будеть. Тех бо рожков  вкус бридок. В собе  же быв,  рече: о  колико у наимник отца моего избываются  хлеби; аз же ныне  с голода  умираю;  въстав убо иду ко отцю моему и реку ему:  отче, согреших на небо и  пред тобою, и несмь достоин  нарещися сын твои; но створи мя яко единого от наимник твоих! Не токмо же помыслив и изрече, но и делом створи;  не словом бо есть  покаяние, но и  делом. Наимници же суть оглашении и  анагности церьковнии; егда убо  грехи  обѧт, и  видя хужьших, иже  божественных наслажающася  таин, собе же видя воне  церкви стояща, тогда в покаяние  умилився помыслить:  створи мя яко единого от наимник твоих.  Еще же ему делече сущю, срете и отець и ухапи  выю его, и облобыза и, и повеле рабом,  да облекуть  іего в первую одежу,  и дати  перстень злат  на руце  его, и сапоги  на ноги  его; и  повеле заклати телець упитаныи,  да ядше, рече, възвеселимся. Тако ти Божье милосердье не ожидаеть кающагося труда, но усретаеть  и  прощения  подавая.  Что  же суть раби? иереи служащии Богу; а первая одежа оцещение от греха,  перстень же обручение есть Святаго Духа; сапоги же заповеди учения евангелскаго;  телец есть причащение  святых таин, его же ядше праведници со ангелы ликовствують. Бе же стареи сын на селе и  слышав о сем, и подиви  на отца. Село есть закон, его же не отступають праведници терпяще; не завидять же грешных спасению, но дивятся Божьи благости. Того ради Давид глаголаше: доколе грешници, Господи, доколе грешьници  въсхвалятся? (Пс. 93:3) и пакы:  почто путь грешных спеется? насадил я еси, и  укоренишася (Иер. 12:1–2). Что же, рече, мне ни козлища дал еси, да с други  моими  въозвеселилъся бых? Козлища суть грешници, иже гонять  праведников  и не попущаеть Бог зле погибнути  им, да объвеселятся  о них; козлищь  бе  Саул, иже гоняше Давида:  Илью же  Ахав, иже искаша пророка. Рече же ему отець его: чадо, вся моя твоя суть,  рекше:  закон и пророци и небесное царство; брат же твои сесь  мертв бе и оживе, изгибл  бе и обретеся. Мертва же  глаголеть работавша  диаволу, языки поганыя неведуща5  Бога. Погибшая же  иже по крещеньи во многия грехи впадают;  вси же кающиися  прияти  суть Богом. Тем же и мы покаемся грех  своих, да Божью милость получим, о Христе Иисусе Господе.

3. Неделя мясопуст. Слово святого Иоанна Златоустого, поучение о втором пришествии Господа нашего Иисус Христа на страшном суде
Се приближися,  братие, время покаанию; се настають днь оцещению; се бо словеса страшна и грозы исполнена изрицаема  усты божьими о страшьном дни, вонже придеть с небесе  судии праведныи, сын божии, Спас наш Иисус Христос, въздати  комуждо по делом их, царемь и княземь,  богатым и нищим,  рабом и господином, праведным и грешным. В правду  суд приемлеть;  сам бо  любя ны и жадая нашего спасенья, приде на землю и в плоть нашю облечеся, и собою образ житья чиста показа нам, и муку показа  грешником; и  изрицая им, не веля никому же влести в та места мучения. Того ради и сия дни постныя на оцещение грехов наших положи, да елико есмы  во лето согрешили,  то сими деньми постьными да очистимся,  тружающе  телеса своя постом и бдением  и молитвами к Богу приближающеся, слезами обмывающе своя грехи  и милостынями  двери царствия небеснаго  отверзающе, мир и любовь межю  собою имеюще,  вьздыханьем скрушающе сердца своя, якоже рече пророк: раздрете  сердца ваша, а не ризы ваша (Иоил. 2:13). И паки Исаием пророком глаголеть: егда постишися, раздробляй алчющим хлеб свои, и нищая и безпокровныя введи в дом свои (Ис. 58:7); и аще тако створиши, то с радостию Господеви предъстанеши в страшныи день, егда придеть в славе своеи Господь и вси святии ангели его.  И во мьгновеньи  ока въстанеть  от земля все естьство человеческое,  любо ли звери  снели,  или рабы раздробили, или птици  разънесли; ни влас един не  погибнеть  от них. Тогда Господь разълучить я друг от друга,  якоже пастух разлучаеть овца от козлищь и поставить  овца одесную себе, сиречь кротъкия  и доброплодныя  праведники, иже кротостью своею вся възвеселиша, а козлища ошююю;  козлища  нарицаеть, иже скверными делы житье свое  препроводиша,  беснующеся и скачюще во пьяньстве и во всякои неправде и немилосердьи. Тем и  отвратить  Господь от них очи свои, и поставить я ошююю себе. Тогда речеть царь сущим одесную его: придете, благословении отца моего, придете, сынове света и моего царствия  наследници! приимете  уготованое вам царствие  преже сложенья миру!  Алках бо, и накормисте мя;  вжадах, и напоисте мя; наг,  одесте мя; болех, посетисте мя; в темници, придосте ко мне; странен бех, въведосте мя. Отвещають ему праведници, глаголюще: Господи, когда тя видехом алчьна, или  жадна, или нага, или болна, или странна, или в темници, и послужихом тебе? Отвещав царь речеть им: право глаголю вам: понеже створисте сим меншим братъм  моим, мне створисте.  Того ради  приимите уготованое вам царство небесное; видех бо вы милостивы и щедры, и странноприимци.  Тогда речеть сущим олевую:  отидите  от Мене, немилостивии! идете от Мене, проклятии, в огнь вечныи, уготованыи дияволу и ангеломь его; понеже  вы своею скупостью  и нечистотою, и леностию дни своя препроводисте; идете в огнь негасимыи  противу делом вашим. Алчен  бех, и не дасте ми ясти; жаден,  и не напоисте мене;  наг и не одесте  мене;  странен и болен, и в темници, и не посетисте мя. Тогда отвещають ему убозии ти, иже  сами ся скупостью лишиша  вечных благ: Господи, когда тя видехом алчьна, или жадна, или нага, или странна, и  болна, и  в темници, и не послужихом тобе? Отвещав царь  речеть им: право глаголю вам: понеже не створисте единому от сих менших и маломощных брат моих,  мне не створисте; того ради отидете  во уготованое вам место мучения, еже сами собе уготовасте, небрегше о своем спасеньи. Темже уже слышасте, братие, осужение то страшное, еже приимуть нечестивии они, скупии, немилостивии во тъ час,  идеже не поможеть ни отець сыну,  ни сын отцю, ни мати дчери  ни брат брату, ни раб господину, но кождо свое бремя понесеть и прииметь мьзду противу своим  делом; да того ради молю вы, братие, не ленитеся, ни льститеся телесная угодия творяще, а душю  си погубляюще; слышасте бо, каку  славу и веньци  приемлють милостивии, питавшии  нищая и телеса своя въздержавшии  от всякоя сласти и постом тружавшиися; таковым бо  уготовано есть царство небесное;  и паки слышасте льстивых и грешных  страшное осужение и муку вечную. Темже подвигнемся постом  и молитвами и милостынями очистити  душа и телеса наша, и очистимся  до воскресения Христова, мир и любовь межю  собою имуще,  духом горяще, Господеви работающе, сердцем съкрушеным молящеся всегда  и милостынею  просвещающе  душа и телеса, чающе божественаго  възданиа, поминающе второе пришествие христово, страшныи суд, егда придеть судити живым и мертвым и въздати комуждо по делом его; яко тому подобает всяка слава, честь и покланяние с безначальным его отцем и с святым.

4. В неделю сыроястную слово святого Иоанна Златоустаго, поучение о посте, сказание от евангелиа
Братие, послушаите, умныя двери отверзъше и слуха душевная открывше. В сласть приимемь  святого поста,  како ти ныня легким путем ведет Господь Бог в бесконечное свое царство, глаголя: аще отпустите человеком согрешенья их, то и отець вашь небесныи отпустить вам согрешениа ваша; аще ли вы не отпустите, то и отец небесныи не отпустить вам согрешении ваших (Мф. 6:14–15);  в нюже бо, рече,  меру  мерите, отмериться вам (Мф. 6:2); глаголеть бо апостол Иоанн богослов: аще кто речеть: Бога люблю, а брата своего ненавижю, ложь есть; брата бо,  его же  по вся дни видя, не любить, а Бога не видя како можеть любити? (1Ин. 4:20). Яве есть, яко и Бога не любить таковыи,  ни  словес божиих хранить, и без успеха таковыи влазить в церковь и тъщими словесы молится, глаголя:  отче наш, остави нам долгы наша, якоже и  мы оставляемь  должником нашим (Мф. 6:12) Таковыи в  милости место гнев божии наносить на главу свою; безлепа  таковыи постится, рече бо Господь пророком: аще поститеся, в сварех и в судех и в гневех,  не такого поста избра Господь;  но отверзи си себе всю неправду и слово роптиво  извращено; но  духом смеренымь  и сердцем съкрушеным възови мя и услышю тя, и дам ти  прошениа  сердца твоего. (Ис. 58:4, 6, 9). Да аще придем истиною в покаание,  не токмо от брашен въздержащеся, но и от клеветы и  зависти, от гнева и ярости, от блуда и величания, злопомнения и от всего зла уимающеся;  да аще сих останемся, то услышим Господа глаголюща  к нам: во время благоприятьно  послушах тебе и в день спасенья помогох ти (Ис. 49:8). Се бо ны ныне  наста время благоприятно,  се же пришли суть  днье спасению, сии святыи пост великыи четверодесятодневныи,  вонже входяще очистим си душю и тело  от скверных помысл и делес.  Елико же бо есмы во все лето  съгрешили или в сваре, или в блуде, или в клятве, и во лжи, и в объяденьи, и пьяньстве  и в каком  зле деле, то сими деньми постными очистимся  и  приближимся  к Богу чистотою и постом, молитвами и слезами омывающе прегрешениа наша; не человеком же являюще пощения нашего, но Господу, съведущему таиная сердец наших, дела  и мысли сердечныя, о них же отвещати ны есть в страшныи день судныи;  тем же, братье, потъщитеся створити повеленое Богом, несть бо тяжело  гнева попрати, несть люто алчущаго накормити, и нагаго одети, и страннаго прияти; сих бо милующе и приемлюще,  самого Христа приемлем,  иже нас деля  странен бысть, от небеси на землю и от славы в нищету приде, да нас,  устраньшихся от него, паки хотя възвести  в первое бытьство,  из негоже бехом  испали съветом дияволим; и противу язве исцеление нам  положи сии святыи пост.  Преже собою прообразив,  постився  первое  Моисии 40 днии, и глагола к Богу  лицем к лицю, и просветися лице его яко  и солнце от славы Божиа,  и паки Илья постися другую 40 днии и не вкуси смерти, но взят бысть на колеснице огньнеи вихром яко на небо; и Данил пророк постися, львы укроти.  Такоже и инии праведници постившеся, великая и многая ствроиша чюдеса, и в память сдеяша  прочим родом. После же  тех всех постися  сам Господь Бог нашь 40 днии, не требуя пощенья, но нам образ дая и победу на враги, и тем оцещая душа и телеса наша, многими грехи осквернена. Темъже и мы, възлюблении,  постимся, да будем  подобни онемь  святым; пост бо душю очищаеть и тело просвещаеть и на небо возводить, и ангелом равна творить, и к Богу приближаеть, и в раи святыи вводить. Темже и мы, братие, услышим  самого Господа евангелием нас учаща и глаголюща: егда поститеся, не будите,  яко лицемеры,  человеком являюще  бледы, дряхли, сетующеся,  да от человек славятся, но будите лицем светли и сердцем добрая творяще, милостыню убогим подающе  (Мф. 6:16–17). О том бо ны Господь, нудя, глаголеть: не скрываите  собе  имении ваших на земли, идеже моль и черви ядуть, и тля тлить,  и татье подкапывають, и крадуть; но скрываите себе сокровища на небесех, идеже негиблемо есть (Мф. 6:19–20); сиречь милостыню велить дати нищим;  то бо сокровище есть скрывати  на небесех, яко да дамы е в руце нищим и да анамо обрящем преумножено. Еи, братье, тем поревнуим  святым праведником и таже дела да творим;  они бо таци  же беша,  яко  же и мы, но попраша  всяку страсть, и гнев, и ярость, и страсти плотския умертвиша, и житье се лестное  презреша, а вечное възлюбиша.  Теми бо Господь  осудит ны, глаголя:  почто си тако пожиша и добрая створиша, а вы совратистеся?  но да не услышим того, братье, но буди ныне нам потрудившеся в святыя сия дни постныя и услышати святыи он глас глаголющь: придете,  благословении отца моего, придете сынове света  алкавше и жадавше, и приимете уготованое вам царство изъначала миру, яже буди всем нам получити  о Христе Иисусе Господе нашем, ему же слава в век.

5. В неделю 1-ю поста поучение Иоанна Златоустого о посте
Видесте ли, възлюблении, от самех  вещии ползу постъную?  Иже бо искусилъся  есть в  сию ноделю поста, то болма разумееть свое к Богу приближение и на прочая  недели подвизается постом; иже ли не приял есть поста, тои  не весть, яже от поста польза. Сладость бо сахара и смидалнаго брашна  како скажю невкусившим того? аще бо и много хвалю, не  разумеют слышащии.  Постную же доброту сами видите,  яко ни отъкуду  же свара,  ни досады другу  от друга; везде молчание и тишина, злому обычаю в нас постом  и молитвою преставшю. Темже не отложим, братье, начатого поста; понеже убо  первая неделя минула есть, да и на прочая недели  бодреиши  будем,  якоже достоить поспевати на благое. Послушаите. Рече  блаженыи  Апостол: задняя забывающе, а на предняя  прорающеся  (Флп. 3:13). Размыслите,  любимици: 7 недель есть поста святого, честнеиши же всех есть 7-я неделя, иже и великая нарицается;  не множьством  часов болши есть  инех недель, но иже  великы  таины в неи  быша, Господня,  глаголю,  страсти; такоже и си недели болша суть первыя;  яко же бо царь боле  есть князя, а князь воеводы, а воевода болярина,  а болярин  сотника, а сотник пятидесятника,  а пятидесятник  слуги . Размыслите, братье:  аще  бы кто хотел орудовати ко царю, то мил деется от меньших  слуг и до последних, кто бы обестил его; аще  в чем и съгрешил есть, то болма печалует, киим оправдится.  И мы убо, братье, не точью явитися хотяще цареви небесному, но и в  сердци своем  прияти его причастьем святых тин, должни  есмы сими святыми неделями  постными приближатися к Богу. Хощю же вы притчю некую глаголати. Царь бе некто невкоеи стране зело  благ и благоподатлив  и всех равно любяще,  аки  своя дети, и о всех равно  промышляше, но и душами их печашеся; бе же и земля та кипящи обильем благим,  якоже рече Давид: и от плода пшеница и вина и елея  их умножишася (Пс. 4:8). Цареви-же  тому дело бе еже подавати требующим, но и заповедь  положи, да имеющии неимущим подают; яко же в деяньих  апостолскых пишется: яко все множьство бе яко  душа едина, и раздаваше  всем, чего кто требуеть (Деян. 4:32);  тако  же беяше  страна та, и так бе царь он.  Имеяше же богатыи тыи  царь 7 дщерии зело  красных и заповеда всем людем – хотяше  же я искусити, – да пришедше  почтят дщереи  его. Посадив я по естьству, меньшюю подале,  а большюю ближе у собе: етери же почтиша всех равно и угодиша цареви; неции,  же зле створиша: меньщюю почтиша добре,  а прочих, целующи их токмо, миноваху.  Видев же благии он царь, милосердие свое на гневь преложи, и повеле слугам изгнати я от лица своего; не токмо же се, но и мучителем повеле предати  я, да их мучать. Или убо не по правде сие  створи царь? Любимици, хощете ли уведати, кто есть он царь? Быстрии умом уже уразумеша,  многих же ради реку  аз. Царь есть благии всех Бог; земля же кипящия  всеми благими церкви; весте  бо вси, колико добра в неи есть, всего мира души в неи спасаются. Ту бо есть закон и пророци и сам Господь, иже  нас ради сниде и бысть человек нам подобен, распятъся за ны, умре, потом посла апостолы своя, теми  нас зова  в свое царство. Иже бо всегда святыми евангелисты  зоветь:  придете ко мне вси тружающися, обременении; аз вы покою (Мф. 11:28), и паки: грядущаго ко мне не изъжену  вон (Ин. 6:37). Что убо  сея есть благодати боле? А седмь  дщерии есть 7 недель святого поста, яже  повеле нам чтити, паче всего лета днии, постом и молитвою,  милостынею. Да аще убо первую неделю почтихом добре, а меньшюю,  яже одале отца  есть, како  инех прочих всех, минути хощемь просто?  Что отвещаем в страшныи день судныи к Господу, и како отпримся, яко ноне инех днии постных не хощем хранити чисто?  Молю же вы, яко не тако мудрьствуите,  глаголюще, яко не можем тако всех прияти. Худыи есть извет и полн вины. Аще бо от того оного объяденья и пьянства первую неделю постом прияхом,  то колми паче повыкше на благое възможем весь пост прияти,  и Богу угодити, и своя душа спасти  и освятити? Не нужю бо вас паче силы поститися и бдети, но како  кто можеть  по силе; точью житискых  печали охабитися, корьчьмы, пьяньства, зависти и клеветы, помненья злу,  блуженья и лихоиманья; и богатии  милостыню  творите паче инех днии, да с  чистою свестью христовых таин  доидем, и пречестнаго тела и вечныих  живот примете; убогим же благодаренье даите,  иже за всех молятся к Богу непрестанно.  Си же не суть тяжка, аще хощем: токмо не обленимся, ни уныем и  да не погубим труда, его же прияхом  в первую неделю. Богу нашему слава, всегда и ныня и присно.

6. Неделя 2-я поста, сказание святаго Иоанна Златоустаго, поучение о святем посте
Придете, друзи и братья,  възлюбленое стадо Христово, да мало и еще нечто  изъреку  вам о сем святом посте, егоже уже две недели преминуста. Десятина убо  всего лета сии пост есть; да подобаеть нам, братье, десятина  та всего лета чисто отдавати  Богови,  давшему нам  живот и набдящему ны своею благостью, якоже и первии они мужие  творяху, ихже в правду святыми нарицаем;  прослави я бо Господь Бог по всеи земли, понеже схраниша заповеди его. Кто же си суть? Первее  постися Енох, и взят бысть на небеса  с плотью, и до ныне жив есть; и по сем Нои постися, и от вселеньскаго  потопа спасен бысть с рожьшимися  от него детми, и от него же  нынешьнеи мир бысть; такоже постися Авраам,  и друг божии наречеся, и всем пророком и всем патриархом и отцам и инем всем отец бысть; постом бо очищься  Моисии, беседова к Богу лицем к лицу  и просветися лице его аки солнце; постися  пророк Илья, и огнь с небеси на жертву проведе,  и дождь жажющим людем испроси у Бога; и Данил пророк постом лвы  укроти, и муж желанью  наречен бысть. Мнози же и в новем закони Господни освятишася постом, и спасошася, ихже имен  ни всего мира книги не исъпишют, единому Богу сведущю своя угодники. Речеть же некто в себе:  ти святии были, крепци быша,  а мы немощни и слаби есмы. Да аще немощни есмы и слаби, то поне десятину  чисту отдадим, ея же сам Господь Бог проси у нас.  Съставлену бо лету 360 и 5 ю днев,  и от тех всех  нарече Господь сия постныя дни свою десятину. Сами же  весте добре, аз же детем и новопросвещеным скажю: 30 и 6  днии от 360  днии, от тех же изложим суботу и неделю; то бо суть господстии  праздници, ова покоя ради дел божии, сия  же воскресения Господня; да в тех место приложим инех 50  днии, да не погибнет от 5 днии божия десятина,  но полудни  великыя суботы да причтеться  в пост. Се убо  расмотривше, святии отци повелеша  поститися до позднаго. Вся же си 7 недель десятина есть Божиа; и  аще не отдамы их чисто, что отвещаемь Богови? Како ли  приимемь прощение грехов, аще всегда объяденье,  и пьяньство, и лакомьство держаще, и  с прочими похотми? Невъздержанья ради преступленье бысть закону; преступленьем смерть в мир  вниде. Не съхранил  бо Адам поста чиста, иже бе  заповедал ему Бог, и прият  телесную смерть. Мы же по толицех казаньих  аще не можем  чисто схранити всех постных днии, то умрем душевною смертью; смерть бо души вечная мука,  якоже рече Павел: питающияся вдова жива умерла есть (1Тим. 5:6).  Весте бо сами, коль бяху были мили Богови израильстии людье, их же сквозе Чермное  море посуху проведе, и манну с небеси посла, и тмами чюдеса в них створи, глаголя: израиль сын мои первенець  есть (Исх. 4:22). Иже тех  не пощаде  не постившихся, глагола бо им Моисии  от Бога, повеле: поститеся 40 днии, они же 20 токмо постишася, и седоша ясти и пити,  и всташа играт, и блудиша; и приде на ня гнев божии, и умроша зле В и И сот, а прочих огнем сожьже,  и ласкосердьства  ради възненавидени быша: что убо будеть нам, иже едину токмо постивъшимся  неделю, и паки о лакомьстве печетеся?  Но молю вы, братье, не прелщаитеся, видяще  етерыя в бестрашьи божии живуща и о телеси паче души  пекущихся: ти бо не работають Богу,  но своему чреву. Льстять же глаголы ложныя безлобивых сердца, их же конець пагуба. Тем же, братье, яко же начасте от перваго дни поститися, тако и до воскресенья Господня доидете.  Не нужю бо вас никого же чересь  силу держати пост,  но яко же кто можеть по силе, токмо в слабость себе не дадите. Зависти же и клеветы отынудь себе оставите, да не полом тела Бога молите, а полом телом  гневите его; но от гнева и ярости и свара и всякоя неправды удалившеся, в терпении  стяжите мьзду вашю,  о Христе Иисусе Господе нашем, ему же слава.

7. В неделю 3-ю поста поучения Иоанна Златоустаго о святем посте на поклонение честнаго и животворящаго креста
Братье, преполовльше  ныне святыя сия дн҃и постныя,  възрадуемся душею поклоняющеся честному кресту и, того насладившеся, подвигнемся на прочая дн҃и к христове страсти, чистяще си телеса и душа просвещающе пречестными  молитвами; и придемь непорочни  на воскресение господне,  се бо призываеть ны Господь Бог нашь на светлую радость, держа венца небесныя алкавшим и жадавшим  его ради и тружаюшимся  в бденьи, в подвизе духовне;  да в сем святом пощеньи не мозем лишитися  тоя радости неизъреченьныя и тех венец нетленных за малую сию леность и ласкосордья утробнаго.  Еже в мал час насладим гортань свою и последь же горьчае  золчи обрящется; о сем  възбраняя,  Павел апостол  глаголет  да неблазнить вас неприязнь яденьем и питьем паче сытости (Кол. 2:16), и паки:  не упиваитеся вином, в немже несть спасенья (Еф. 5:18). И сам Господь възбраняеть ны, глаголя; блюдитеся, да не отягьчають сердца ваша объяденьем  и пияньством  и печальми житиисками (Лк. 21:34); и святии отци от того же възбраняють,  глаголюще: аще еси был вчера  многотрапезник, то днесь постник крепок  явися; аще вчера плотиугодник был еси,  то днесь души просветник  явися. Не мозите, братье, словом точью крестьяне быти, но и дела покажем, да не речеть к нам  Господь Бог: си людье усты точью  чтут мя, а сердца их далече мене  отстоят (Ис. 29:13). Поистине же тако видимь  вас; аще бо от земнаго князя како любо  придеть слово  к подручным его гражаном, то вси, с страхом пришедше,  послушают его и, слышавьше,  творять повеленая  им. А Богу по вся дн҃и зовущю нас к собе пророки и апостолы и святыми отци, паче же и своими усты святыми евангельи на свет немерцающии, на радость бесконечную и на царство небесное, еже уготова творящим волю его; то же несть его, кто послушаяи и притекии к нему, ни воля его творя. Видите,  братье, любовь божью, еже к нам;  яко не терпе  нас зрети поработившихся бесу, бездушным кумирам требу полагающа;  тако бо бяху ослеплена сердца их дьяволом, да ови сыны своя жряхуть  им, ови  же дщери своя. И того всего не терпя, Господь Бог наш приде на землю, да земныя обожить,  и паки  на небо възведеть; того ради и крестися, нам дая образ обращенью и се паки понавляя крещение сим святым постом. Еже есмы по крещении съгрешили, да сим очистимся;  темже, препоясавшеся крепко удержаньем, подвигнемся преполовльше  сия дн҃и постныя. Аще ли и леностию преидосте, но поне богоугодно отъселе скончаите; не тяшько вы буди к церкви ити на божие дело и слышати в неи святое писание и творити добрая дела, да освятиться вы душа и тела соблюдеться Богом.  Стоящи  же; братие в церкви да небеседуите ничто же ни с ким; да не погубим мьзды своея; иже бо аще  бестраха беседуеть в церкви друг о друзе,  то радость  неприязни творить.  От сего бо разумеите: егда стануть пред земным царем, то  ни кто же смеет рещи простаго  слова, ни очима инамо зрети и осязати;  да еще тех чтем  и боимся их тацех же суще человек, не паче ли подобаеть сугубь с страхом и трепетом Бога почтити и волю его творити? Тои владееть душею и телом нашим,  могыи  умертвити и оживити, и  убожити  паки обогатити, якоже глаголет Соломон: от лица божия мнози цари царствують и силнии держать землю,  и аз венчаю славящих мя  и почетьших мене (Прит. 8:15–17). Того убоимся, Того с  страхом прославим и трепетом. Поразумеем  службу церковную: что сего есть пристраннее, егда видиши  сына божиа закалаема и тело свое хлебом претворяюща и кровь свою изливающа в  оставление грехов? Темь же с страхом приступим к святым таинам и примем я чистыми усты и сердцем светлым, всяку вражду поправши, да доидем светлаго  воскресения христова и тоя радости насладимся. Сия же святыя дни постныя отъселе чисто схраним. Не буди же  вам тяжко послужившим  Богу; понужаем бо вас на добр подвиг, да на воскресение услышим святыи он глас Господа Бога нашего, зовуща праведныя и глаголюща: придите, благословении отца моего, приимите уготованое вам царство (Мф. 25:34). О Христе Иисусе Господе нашем, емуже слава в веки, аминь.

8. В неделю 4 поста поучение святаго отца Иоанна Златоустаго о святем пощеньи и молитве
Придите  ныне, церковная чада, да обычное  поучение створю о алчбе и о молитве и о милостыне  к вашему собранию; се бо  уже болшая часть поста преминула есть, и кождо вас весть свои труд, ниже ся подвизали есте в день и в нощь  святого поста и чаете  прияти  мьзду от животворныя десница Христовы. Бес подвига бо  никтоже венчается; да аще в лености пребысте  доныне, то на прочая дни подвигнемся постом и молитвою, творяще милостыню,  да постигнете  искони трудившихся постом; велико бо есть к Богу присвоенье молитва, тою бо исправляется всякая добродетель,  аще от тепла сердца будеть, яко благоухание к Богу въсходить; рече бо Давид: да ся исправить молитва моя, яко и кадило пред тобою (Пс. 61:2). Аще бо  не створиши крилу молитве, не възлетить к Богу, криле же еста алчьба и милостыни. Алчьбы же добрыя устав не отложение брашьном токмо,  но отверженье злых дел и разрешение всякого съуза неправеднаго.  Остави ближнему скорбь и отдаи же ему долг; не на суды и на которы алчете; мяса ли не яси, но брата своего клеветами  яси;  питья ли осталъся еси, но от свара не удержишися;  вечеря ли остался еси, но и до позднаго седиши в беседе, всех осужая. Не сицеваго  поста изъбрах аз, глаголет Господь. Кая бо есть полза телом алкати, а душею безъчисленыя злобы исполнятися?  но притеци светло к дару алчьбному  и буди собе  токмо судья и обличитель; поищи крепльшаго устава  о молитве и  о алчьбе, и буди ему делом свершитель. Добра бо съветьница  человеку алчьба; аще бы алкала от древа Евга, не быхом алкали сея ныне алчьбы. Не бо требують здравии врача, но болящии;  елма бо не алкахом, из рая испадохом  алчем ныне,  да к нему паки възвратимся. Алчьба закону свершитель, алчьба пророкы силны створяеть, и души хранилище благо,  телу сдержательница  крепка, на враги оружье непобедимо, страстотерпцем обрученье;  си искусы отгонить бесовьскыя; си помогаеть на благочестье; си целомудрию сужитница, иереем свершитель;  несть бо мощно на святую службу бес тоя дерзнути; алчьба молитву на небо възносить, аки криле еи бывающи к горнему шествию; алчьба и слуги  в сан въводить, и рабы в честь полагаеть;  алчьба здравью мати, а уности вожь, старцем красота, благоспутнице путником  и вкупе живущим безьблазньныи сужитель; муж же, в алчьбе видя жену свою  пребывающю, добре хранится,  и жена, видящи мужа своего приемлюща алчьбу, ревностью уподобится ему. Кто свои дом ухуди пребывая в алчьбе? алчьбою упразнишася поварови ножи, ибо тряпезы довольны бывають  габьзиною; не работають дети алчебника, осиревше заима ради отча; милостынями  и верою очищаются  греси; алчьбою же и молитвою спасется от всякого зла. Елико бо алчьбою уимаеши плоти, толико  же твориши силну душу к Богу. Тем же, братье, послушаите  глаголемых  и потъснетеся  свершити постное течение, да и сде с чистою свестью насладимся божественых таин, а  в будущем веце вечных благ улучим,  о Христе Иисусе Господе нашем, емуже слава с отцем.

9. В неделю 5-ю великого поста, поучение святого отца нашего Иоанна Златоустого, сказание от евангельских словес
Понеже убо по мале  пост сии  сконьчатися  хощеть и  по мале дн҃ии господни страсти приходять,  того ради еже о страстех чтеться, да ся к ним приготовим; яко да възможем кождо нас глаголати с божественым  Давидом:  уготовихся и не смутихся (Пс. 118:60).  Понеже и  по страстех  распятье и погребенье  и по погребеньи  воскресение, а по воскресении святых  таин причастие,  то должьни  есмы готовитися. Но прикоснемъся евангельскых словес. Во оно время  поят Исус оба на десять ученика своя и начат имь глаголати хотящая  быти: яко се въсходим в Ерусалим (Мк. 10:33), рече, и прочая. Что ради преже поведаеть им  хотящая ему быти? да быта преже слышавше, последи не съблазнилися  о господни страсти, яко  да уведять.  Кроме же отвед ученики,  обаче аще и скоръбная вся поведает им, но они  имяху 3 и дн҃и воскресения  его; и идоста к нему  Ияков и Иоан, сына зеведеева, глаголюще: учителю, хощева, да егоже просива,  створиши нама. Он же  рече: что хощета, да створю вама? Она же  глаголаста  ему: хощева, да един одесную тебе, а другыи  ошюю тебе сядева  в славе твоей. Иоан же евангелист глаголеть, яко мати ею приступи к Исусу; достояше бо апостолма  предъставити матерь, потом же и самема  прити в таине.  Что же бяше, егоже просиста? мняста бо, яко царства ради грядеть  в Ерусалм и по царствии  пакы и постражеть; яко же рече: пострадати ми (Лк. 17:25). Сих  бо мысляще, просиста одесную и ошюю  сѣдания.  Тем Господь запрѣти им, яко не разумно,  что просяща:  вы бо мнита земное царство быти; не ведяста  бо, яко та вся паче ума суть; а еже сести одесную мене, и  ангелскых преходить чинов; вы бо  на славу тщитася  аз же зову  на смерть. Чашю бо и крещение распятие нарицаеть,  чашю убо яко на сон абье бдящю,  крещенье же яко оцещение творяше  душам нашим. Она же, не разумевша  что глаголать, обещастася  чашю испити и крещением креститися, мняща глаголати Господу о чювьственеи чаши и крещении. Исус же рече има: чашю, юже аз пию, испиета и крещением креститася, а еже сести одесную и ошюю мене, несть мое данье, но им же уготовася. Се двое нечто искома есть: едино – уготовано, кому же сести; другое же – аще всех владыка не можеть  седания  дати. Никто же бо одесную его  сядеть или ошюю, но аще и  многажды в писании седалище слышиши, то не седалище разумеи, но честь пребольшю;  а еже несть мое данье – тако разумеи: несть мое, но  праведнаго судии, дати вама  по благодати честь; подвизавьшимся онем  уготована честь та  яко же бо царь некто право судяи прибрани приступльшим к нему  другом его и рекшим: даи же нам венца, то  речеть: подвизаитеся; иже бо одолееть,  тому уготоваеться венець; тако  же и вы, зеведеова сына, мучение приимита за мя; аще ли кто обрящеться по ваю с мучением ину добродетель  имея, и тъ паче ваю будет. Слышавше же 10 начаша негодовати на Иякова и на Ивана  Исус же призвав их и  глагола им: весте ли, яко же мняться области языком,  обладают ими; не такоже у вас, но иже хощет быти стареи,  и буди  всем раб; ибо сын человечь не приде, да ему послужать, но да послужить и дасть душю свою избавление за многия.  Ученици, иже  не приимше святого духа, человечьски  роптиви бяху  на обою брату; но последь разумеши вси, яко болии  есть служаи; егда бо кто умреть, за негоже служить, то сии боле  всех есть, но обаче служба та  и смирение,  высота и слава бысть тому и всем; преже бо въчеловечнья ангелом бе точью знаем, а понеже человек быти  изволи и распятье, не точью ту славу имееть, но и другую приятъи всей вселенеи царствуеть. Смеримся  убо и мы и  прославимъся. Аще бо не смириться кто, не можеть ктому прославитися. Понеже сына божия слава смерения ради бысть, тыми како можем иным путем высоци быти?  не высоко убо мыслим, възлюблении, ни судим судьям, ни законоположници будемь  законоположником; но покоряитеся стареишинам вашим и повинуитеся (Евр. 13:17), якоже рече блаженыи  апостол, да обещаных благ  улучим, о Христе Исусе Господе нашем, емуже слава во веки, аминь.
Поучения против древне-русского язычества и народных суеверий



Источник: https://www soika.pro/dok/veroispovedanie /rus samobjitnaja/
Категория: Святоотеческая литература | Добавил: сойка-soika (05.04.2022) | Автор: Сойка-Soika W
Просмотров: 16 | Теги: благочестия и христианской жизни П., Поучения о разных истинах веры | Рейтинг: 0.0/0
Всего комментариев: 0
avatar