Поучения о разных истинах веры, благочестия и христианской жизни П.В. Владимиров ( 6)

68. Поучение Владимира Мономаха (1099 г.)
Седя на санех помыслих в души своей и похвалих Бога, иже мя сих днев грешнаго допровади. Да дети мои, или ин кто, слышав сю грамотицю, не посмейтеся, но ему же люба детей моих (кому из детей моих), а приметь ю в сердце свое, и не ленитися начнеть, такоже и тружатися: первое, Бога деля и душа своея, страх имейте Божий в сердци своемь и милостыню творя неоскудну, то бо есть начаток всякому добру. Аще ли кому не люба грамотиця си, а не поохритаються (не подосадуют), но тако се рекуть: на далечи пути, да на санех седя, безлепицю еси молвил. Усретоша бо мя слы от братья моя на Волзе, реша: «потъснися (потщися, постарайся) к нам, да выженем Ростиславича (–чей)338 и волость их отъимем; еже ли не поидеши с нами, то мы собе будем, а ты собе», и рех: «аще вы ся и гневаете, не могу вы я ити, ни креста переступити». И отрядив я, взем Псалтырю, в печали разгнух я, и то ми ся выня: Вскую печалуеши, душе? Вскую смущаеши мя? и прочая. И потом собрах словца си любая, и складох по ряду и написах: аще вы последняя не люба, а передняя приимайте. Вскую печална еси, душе моя? Вскую смущаеши мя? уповай на Бога, яко исповемся ему. Не ревнуй лукавнующим, ни завиди творящим безаконье, зане лукавнующии потребятся, терпящии же Господа, ти обладають землею. И еще мало, и не будеть грешника; взищеть места своего, и не обрящеть. Кротции же наследять землю, насладяться на множьстве мира. Назираеть грешный праведнаго, и поскрегчеть на нь зубы своими; Господь же посмеется ему, и прозрить, яко придеть день его. Оружья извлекоша грешьници, напряже лук свой истреляти нища и убога, заклати правыя сердцемь. Оружье их внидеть в сердця их, и луци их скрушатся. Луче есть праведнику малое, паче богатства грешных многа. Яко мышца грешных сокрушатся, утвержаеть же праведныя Господь. Яко се грешници погыбнуть; праведныя же милуя и даеть. Яко благословящии его наследять землю, кленущии же его потребятся. От Господа стопы человеку исправятся. Егда ся падеть и не разбьется, яко Господь подъемлеть руку его. Ун бех и сстарехся, и не видех праведника оставлена, ни семени его просяща хлеба. Весь день милуеть и взаим даеть праведный, и племя его благословлено будеть. Уклонися от зла, створи добро, взищи мира и пожени, и живи в векы века. Внегда стати человеком, убо живы пожерли ны быша; внегда прогневатися ярости его на ны, убо вода бы ны потопила. Помилуй мя, Боже, яко попра мя человек: весь день боряся, стужи ми. Попраша мя врази мои, яко мнози борющиися со мною с выше. Возвеселится праведник, и егда видить месть; руце свои умыеть в крови грешника. И рече убо человек: аще есть плод праведника, и есть убо Бог судяй земли. Измий мя от враг моих, Боже, и от встающих на мя отьими мя. Избави мя от творящих безаконье и от мужа крови спаси мя; яко се уловиша душю мою; и яко гнев в ярости его, и живот в воли его; вечер водворится плачь, а заутра радость. Яко лучши милость твоя, паче живота моего, и устне мои похвалита тя. Яко благословлю тя в животе моемь, и о имени твоем въздею руце мои. Покры мя от соньма лукаваго, и от множьства делающих неправду. Възвеселитися вси праведнии сердцемь. Благословлю Господа на всяко время, воину хвала его, и прочая. Якоже бо Василий учаше, собрав ту уноша, душа чисты, нескверни, телеси худу, кротку беседу и в меру слово Господне: яди и питью без плища велика быти, при старых молчати, премудрых слушати, старейшим покарятися, с точными и меншиими любовь имети; без луки беседующе, а много разумети; не свереповати словом, ни хулити беседою, не обило смеятися, срамлятися старейших, к женам нелепым не беседовати, долу очи имети, а душю горе; пребегати, не стрекати учить легкых, власти ни в кую же имети, еже от всех честь; аще ли кто вас можеть инем услети, от Бога мьзды да чаеть и вечных благ насладится. О Владычице Богородице! отъими от убогаго сердца моего гордость и буесть, да не възношюся суетою мира сего. В пустошнем сем житьи научися, верный человече, быти благочестию делатель, научися, по евангельскому словеси, очима управленье, языку удержанье, уму смеренье, телу порабощенье, гневу погубленье, помысл чист имети, понужаяся на добрая дела, Господа ради; лишаем – не мьсти, ненавидим, любо гоним – терпи, хулим – моли, умертви грех, избавите обидима, судите сироте, оправдайте вдовицю; придете, да сожжемъся, глаголет Господь; аще будут греси ваши яко оброщени, яко снег обелю я, и прочее. Восияеть весна постная, и цвет покаянья; очистим собе, братья, от всякоя крови плотьскыя и душевныя, Светодавцю вопьюще рцем: слава тобе, человеколюбче! По истине, дети моя, разумейте, како ти есть человеколюбець Бог милостив и премилостив; мы человеци, грешни, суще и смертни, то оже ны зло створить, то хощем и пожрети и крови его прольяти вскоре; а Господь нашь, владея и животом и смертью, согрешенья наша выше главы нашея терпить, и пакы и до живота нашего, яко отець, чадо свое любя, бья, и пакы привлачит е к собе. Такоже и Господь нашь показал ны есть на врагы победу, 3-ми делы добрыми избыти его и победити его: покаяньем, слезами и милостынею; да то вы, дети мои, не тяжька заповедь Божья, оже теми делы 3-ми избыти грехов своих и царствия не лишитися. А Бога деля не ленитеся, молю вы ся, не забывайте 3-х дел тех: не бо суть тяжка; ни одиночьство, ни чернечьство, ни голод, яко инии добрии терпять, но малым делом улучити милость Божью. Что есть человек, яко помниши и? Велий еси, Господи, и чюдна дела твоя, никакъже разум человеческ не может исповедати чюдес твоих; и пакы речем: велий еси, Господи, и чюдна дела твоя, и благословено и хвалимо имя твое в векы по всей земли. Иже кто не похвалить, ни прославляеть силы твоея и твоих великых чюдес и доброт, устроеных на сем свете; како небо устроено, како ли солнце, како ли луна, како ли звезды, и тма и свет, и земля на водах положена, Господи, твоим промыслом! зверье розноличнии, и птица и рыбы, украшено твоим промыслом, Господи! И сему чюду дивуемъся, како от персти создав человека, како образи разноличнии в человечьскых лицах, аще и весь мир совокупить, не вси в один образ, но кый же своим лица образом, по Божии мудрости; и сему ся подивуемы, како птица небесныя из ирья339 идуть, и первее в наши руце, и не ставятся на одиной земли, но и силныя и худыя идуть по всем землям, Божиим повеленьемь, да наполнятся леси и поля; все же то дал Бог на угодье человеком, на снедь, на веселье. Велика, Господи, милость твоя на нас, яже та угодья створил еси человека деля грешна. И ты же птице небесныя умудрены тобою, Господи, егда повелиши, то вспоють, и человекы веселять тобе; и егда же не повелиши им, язык же имеюще онемеють. А благословен еси, Господи, и хвален зело! Всяка чюдеса и ты (те) доброты створив и сделав, да иже не хвалить тебе, Господи, и не веруеть всем сердцем и всею душею во имя Отца и Сына и Святаго Духа, да будет проклят. Си словца прочитаюче, дети моя, божественая, похвалите Бога, давшаго нам милость свою, и се от худаго моего безумья наказанье; послушайте мене, аще не всего приимете, то половину. Аще вы Бог умякчить сердце, и слезы своя испустите о гресех своих, рекуще: «якоже блудницю и разбойника и мытаря помиловал еси, тако и нас грешных помилуй»; и в церкви то дейте и ложася. Не грешите ни одину же ночь, аще можете, поклонитися до земли; али вы ся начнеть не мочи (вам будет не в мочь), а трижды; а того не забывайте, не ленитеся, тем бо ночным поклоном и пеньем человек побежаеть дьявола, и что в день согрешить, а тем человек избываеть. Аще и на кони ездяче не будеть ни с кым орудья (дела), аще инех молитв не умеете молвити, а «Господи помилуй» зовете безпрестани, втайне: та бо есть молитва всех лепши, нежели мыслити безлепицю ездя. Всего же паче убогых не забывайте, но елико могуще по силе кормите, и придавайте сироте, и вдовицю оправдите сами, а не вдавайте силным погубити человека. Ни права, ни крива не убивайте, не повелевайте убити его; аще будеть повинен смерти, а душа не погубляете никакоя же хрестьяны. Речь молвяче, и лихо и добро, не кленитеся Богом, ни хреститеся, нету бо ти нужа никоея же; аще ли вы будеть крест целовати к братьи, или к кому, али управивше сердце свое, на нем же можете устояти, тоже целуйте, и целовавше блюдете, да не приступни погубите, душе своее. Епископы, и попы, и игумены с любовью взимайте от них благословленье, и не устраняйтеся от них, и по силе любите и набдите, да приимите от них молитву от Бога. Паче всего гордости не имейте в сердци и в уме, но рцем: смертни есмы, днесь живи, а заутра в гробе; се все, что ны еси вдал, не наше, но твое, поручил ны еси на мало дний; и в земли не хороните, то ны есть велик грех. Старыя чти яко отца, а молодыя яко братью. В дому своемь не ленитеся, но все видите; не зрите на тивуна (судья), ни на отрока, да не посмеются ириходящии к вам и дому вашему, ни обеду вашему. На войну вышед, не ленитеся, не зрите на воеводы; ни питью, ни еденью не лагодите, ни спанью; и стороже сами наряживайте, и ночь, отвсюду нарядивше около вои, тоже лязите, а рано встанете; а оружья не снимайте с себе вборзе, не розглядавше, ленощами, внезапу бо человек погыбаеть. Лже блюдися и пьянства и блуда, в том бо душа погыбаеть и тело. Куда же ходяще путем по своим землям, не дайте пакости деяти отроком, ни своим ни чюжим, ни в селех, ни в житех, да не кляти вас начнуть. Куда же поидете, идеже станете, напойте, накормити унеина (просящего); и боле же чтите гость, откуду же к вам придеть, или прост, или добр, или сол (посол), аще не можете даром (подарком), брашном и питьем; ти бо мимоходячи прославять человека по всем землям, любо добрым, любо злым. Болнаго присетите; над мертвеця идете, яко вси мертвени есмы; и человека не минете, не привечавше, добро слово ему дадите. Жену свою любите, но не дайте им над собою власти. Се же вы конець всему: страх Божий имейте выше всего; аще забываете всего (чтобы вам не забыть), а часто прочитайте: и мне будеть без сорома, и вам будеть добро. Его же умеючи, того не забывайте доброго, а его же не умеючи, а тому ся учите, якоже бо отець мой, дома седя, изумеяше 5 язык,340 в том бо честь есть от инех земль. Леность бо всему мати, еже умееть, то забудеть, а его же не умееть, а тому ся не учить; добре же творяще, не мозите ся ленити ни на что же доброе, первое к церкви: да не застанеть вас солнце на постели; тако бо отець мой деяшеть блаженый и вси добрии мужи свершении; заутренюю отдавше Богови хвалу, и потом солнцю въсходящю, и узревше солнце, и прославити Бога с радостью, и рече: просвети очи мои, Христе Боже, иже дал ми еси свет твой красный, и еще: Господи, приложи ми лето к лету, да прок (остаток) грехов своих покаявъся, оправдив живот, тако похвалю Бога; и седше думати с дружиною, или люди оправливати (править, судить), или на лов ехати, или поездити, или лечи спати: спанье есть от Бога присужено полудне, от чина (чин – час) бо почивает и зверь и птици и человеци...
Да не зазрити ми, дети мои, ни ин кто, прочет, не хвалю бо ся ни дерзости своея, но хвалю Бога и прославляю милость его, иже мя грешнаго и худаго селико лет сблюд от тех час смертных, и не ленива мя был створил худаго на вся дела человечьская потребна. Да сю грамотицю прочитаючи, потъснетеся на вся дела добрая, славяще Бога с святыми его. Смерти бо ся, дети, не бояще, ни рати, ни от звери, но мужьское дело творите, како вы Бог подасть; оже бо яз от рати, и от звери, и от воды, от коня спадеяся, то никтоже вас (никто из вас) не может вредитися и убити, понеже не будет от Бога повелено; а иже от Бога будеть смерть, то ни отець, ни мати, ни братья не могуть отъяти, но оче342 добро есть блюсти, Божие блюденье леплее есть человечьскаго. О многострастный и печалны аз! много борешися сердцемь, и одолевши, душе, сердцю моему, зане, тленьне сущи, помышляю како стати пред страшным Судьею, каянья и смеренья не приимшим межю собою. Молвять бо иже: Бога люблю, а брата своего не люблю, ложь есть; и пакы: аще не отпустите прегрешений брату, ни вам отпустить Отець вашь небесный. Пророк глаголеть: не ревнуй лукавнующим, ни завиди творящим беззаконье; что есть добро и красно, но еже жити братьи вкупе!

69. Сильвестра послание и наказание от отца к сыну
Благословение от Благовещеньскаго попа Селивестра возлюбленному моему, единородному сыну Анфиму.
Милое мое чадо, дорогое! Послушай отца своего наказание, рождьшаго тя, и воспитавшаго в добре наказании и в заповедех Господних; и страху Божию и Божественному писанию изучену, и всякому закону християньскому; и промыслу доброму во всяких торговлех и во всяких товарех наказану; и святительское благословение на себе имеешь, и Царское Государево жалование, и Государыни Царицы, и братии его, и всех Боляр; и с добрыми людми водишися; и со многими иноземцы великая торговля и дружба есть: все еси доброе получил, и умей еси совершити о Бозе: яко же начато при нашем попечении, и по нас тако же бы Бог соблюл по тому жити.
И законному браку сочтах тебе у добру родителю благодарную дщерь; и благословил есми тебя всякою святынею, и честными кресты и святыми образы, и благословенным стяжанием, якоже мню от праведных трудов, а в неведении Бог правитель.
И ныне убо, сыну Анфим, предаю тобе и поручаю и оставляю Создателю нашему, доброму блюстителю, Иисусу Христу, и Его Матери, Пречистыя Богородица, и Заступнице нашей, Помощнице, и всем Святым: якоже рече писание: потщися дети оставити наказаны в заповедех Господних, лучше неправеднаго богатества, аще и в праведнем убожестве, неже бы в неправеднем богатестве. И ты, чадо, блюдися неправеднаго имения, а твори добрая дела. Имей, чада, великую веру к Богу; все упование возлагай на Господа: ни кто же, надеяся на Христа, не погибнет. Прибегай всегды с верою ко святым Божиим церквам; заутрени не просыпай; обедни не прогуливай; вечерни не погреши и не пропивай: павечерница, и полунощница, и часы, в долу своем всегды, по вся дни, пети: то всякому християнину Божий долг. Аще возможно, по времени, прибавишь правила: на твоем произволении: бóлшую милость от Бога обрящеши. – А в церкви Божии и дому, на правиле и на всяком молении, и сам, и жену, и детей, и домочатцов, стояти со страхом; Богови молитися, и со вниманием слушати, отнюдь в те поры ни о чем не беседовати, ни обзираться, разве ли кия нужда. А говорити правило келейное и церковное единогласно, чисто, а не вдвое. – Священнический чин и иноческий почитай: те бо суть Божии слуги: теми очищаемся от грехов; те имеют дерзновение молитися Господу о гресех наших, и Бога милостива сотворят. – Повинуйся, чадо, отцу духовному, и всякому священническому чину, во всяком духовном наказании; а жена тако же. В дом свой их призывай молитися о здравии за Царя и Государя, и за Царицу и чада их, и за братию его, и за священнический чин и мнишеский, и за вся христиане; и о своем согрешении и о своих домочадцев молебная совершай: и воду бы святили с животворящаго креста и со святых мощей, и с чюдотворных образов; аще болезьни ради, за здравие и маслом свящают. И в церквах Божиих тако же твори: приходи с милостынею и с приношением, за здравие, и по родителех преставльшихся память твори, со всякою чистотою: и сам воспомяновен будеши от Бога. – Церковников, и нищих, и маломожных, и бедных, и скорбных, и странных пришелцов, призывай в дом свой, и по силе накорми и напой и согрей; и милостыню давай, от своих праведных трудов, и в дому и в торгу и на пути: тою бо очищаются греси, те бо ходатаи Богу о гресех наших.
Имей, чада, истинную правду и любовь нелицемерную ко всем; не осужай никого ни в чем: свои грехи разсужай, како избыти их. – Чево сам не любишь, того и другу не твори, и храни чистоту телесную паче всего; да наступи на совесть свою, яко же на лютаго врага: и возненавиди, якоже милаго, душетленнаго друга, хмельново питья. Господа ради отверзи от себе пияньство; в сем убо недуге, и вся злая ражаются обычаи от него. Аще от сего сохранит тя Господь, вся благая и полезная от Бога получиши, и от человек чесьтен будеши, и души своей просвет сотвориши на вся добрая дела. – Воспомяни, чада, Апостольское слово: «не прельщайтеся: ни пьяница, ни блудник, ни прелюбодей, ни содомленин, ни тать, ни разбойник, ни клеветник, ни хищник, царствия Божия не наследят». – Аще которою страстию победился еси, чадо, или в которое грехопадение впал, о сем прибегни к Богу, с теплою верою, и ко отцу духовному с горкими слезами; и плачися о гресех своих, и кайся истинне, еже таковая не творити; и заповедь отца духовнаго храни, и эпитемью держи: милостив Господь, праведных любит, грешных милует, всех зовет ко спасению. И, паки, храни и блюди себе в християньском жити праведном законе: удержи язык свой от зла, и устне свои еже не глаголати льсти; храни себе от лжа, и от похвалы, и от клеветы; и сам ни в чем не величайся; уничижи себе паче всех человек, узриши славу Божию. – И всякого, чада, не презри во всякой нужи; памятуй, чадо, како мы жихом: век никто же изиде от дому нашего тощь или скорбен; по силе, вся потребная, всякому человеку, Бога ради, давано; и скорбново словом ползовано; аще кому, в чем возможно, и мы помогали, Бога ради, и ссужали всячески; а нам, невидимо, Христос изобилно посылал милость Свою, всяких благ. А не помыслихом никогда на зло, ни кому, разьве недоразумия, а без лукавства.
Чадо, люби мнишеский чин, и страннии пришелцы всегда бы в дому твоем питалися; и в монастыри с милостынею и с кормлею приходи; и в темницах и убогих и больных посещай; и милостыню по силе давай.
А домочадцов своих одевай, и корми доволно. А жену свою люби, и в законе живи, по заповеди Господни. В неделю, и в сред, и в пяток, и в празники Господни, и великий пост в чистоте пребывайте, в посте и молитве, и в покаянии, и во многих добродетелех. Законное жительство в славу Богу и в жизнь вечную; а иным... судит Бог.
Да сам, чадо, что твориши, того жену учи: всякому страху Божию, и всякому вежьству и промыслу и рукоделью, и всякому рукоделью и домашнему обиходу; и всякой порядне. Умела бы сама и печи и варити; и всякую домашнюю порядню умела, а всякое женьское рукоделье знала; коли сама все знает и умеет, ино умеет и детей и слуг всему научити, и наряжати, и наказати во всем; и сама бы хмелново питья отнюдь не любила, и дети и слуги у ней того не любили же. – А всегда бы жена без рукоделия сама ни на час не была, разве немощи, а слуги у ней тако же. А в гостех будет, или у ней гости, отнюдь бы сама пьяна не была; а с гостьями беседа бы была о рукодельи, и о домашней порядне, и о законном християньском житии, а не пересмеивайся, и не переговаривала бы ни о ком ничево. В гостех и в дому песней бесовских, и всякого срамословия, сама и слуги, не говорила и не творила бы того; ни у кого бы не слушала. И волхвов и кудесников, и всякого чарования не знала бы; и в домы не пущали ни мужиков, ни женок. Аще не внимает сего, всячески наказуй, страхом и спасая; а не гневайся на жену, а жена на тебе; наказуй наедине; да наказав примолви: и жалуй и люби ея. Тако же и детей и домочадцов своих учи страху Божию и всяким добрым делом; понеже тебе о них ответ дати в день страшнаго суда. Аще по нашему наказанию и по сему писанию учнете жити, велию благодать от Бога обрящете, и жизнь вечную наследите, и с домочадце своими.
Да держися, чадо, добрых людей, во всяких чинех, и ревнуй добрым делом их; внимая словеса добрые и твори я. Почитай часто Божественное писание, и влагай в сердце, себе на пользу.
Видел еси, чадо: како в житии сем жихом, во всяком благоговении и страсе Божии, и в простоте сердца и церковном прилежании со страхом, и Божественным писанием ползуючися всегда; и како был Божиею милостию, от всех почитаем, и всеми любим, и всякому, и в потребных, уноровил: и рукоделием и службою и покорением; а не гордынею, ни прекословием; не осужах никого, не просмеивал, ни укаривал никого, ни бранивался ни с кем; и пришла от кого обида, и мы, Бога ради, терьпели, и на себя вину полагали; и тем враги други быша; и аще которою виною, душевною или телесною, согреших пред Богом и предо всеми человеки, и вскоро о том плакахся к Богу греха своего; и у отца своего духовнаго каяхся со слезами, и умилне прощения прося, и заповеди его духовныя с любовию хранях, яко же повелит ми; и аще кто мя в моем прегрешении, или в какове невежьстве обличит, или кто духовне накажет, или кто в посмех поносит мя и укоряет, вся сия с любовию приимах, и себе внимах; аще по делом, о всем о сем каяхся, и от таковых дел удаляхся, Богу поспешествующу ми; аще что и не повинно, и не по делу, молва или поношение, или посмех каков, или укоризна, или ударение, – во всем в том винихся, и не оправдахся пред человеки: Бог сие праведным Своим милосердием исправит. Воспоминах Евангельское слово: любите враги ваша, добро творите ненавидящим вас, благословите кленущия вы, молите за творящая вам пакости, изгонящая вы; биющему тя в ланиту, обрати ему и другую, и от взимающаго ти ризу, и срачицу не возбрани; и всякому просящему у тебе дай; от взимающаго твое, не изтязуй; аще кто тя поймет поприще едино, иди с ним и две. И паки еще вспоминая причастную молитву: Господи, даждь ми милость, ненавидящим ми и враждующим ми и поношающим ми, тако же и оклеветающим мя: да никто же, ни како же, от них, мене ради нечистаго и грешнаго, зло некако постражет, ни в нынешнем ни в будущем веце; но очисти их милостиею Своею, и покрый их благодатию Своею, Благий!
Тем всегда утешах себе.
Не погреших никогда же церковнаго пения, от юности своея и до сего времени, кроме немощи.
Ни нища, ни странна, ни убога, ни скорбна, ни печална, никогда же презрех, кроме невидения.
И в темницы болна и пьленена, и из работы должьна, и во всяких нужах, по силе окупих, и гладных, по силе кормих.
Работных своих всех свободих и наделих; и ины окупих из работы, и на свободу попущах. И все те работные наши свободны, и добрыми домами живут, яко же видиши, и молят за ны Бога, и доброхотают нам всегда, а кто забыл нас, Бог его простит во всем. А ныне домочадцы наши все свободны, живут у нас по своей воли.
Видел еси, чадо мое: многих пустошных сирот и работных и убогих, мужеска полу и женьска, и в Новегороде, и зде на Москве вскормих и вспоих, до совершена возраста; изучих, хто чего достоин: многих грамоте, и писати и пети, иных иконного писма, инех книжного рукоделия, овех серебряново мастерства, и иных всяких многих рукоделий, а иных всякими многими торговли изучих торговать. А мати твоя многия девицы и вдовы пустошныя и убогия, воспитала в добре наказании, изучила рукоделию, и всякому домашнему обиходу, и, наделив, за мужь давала; а мужеский пол поженили у добрых людей. И все те, дал Бог, свободны: своими добрыми домами живут; многи во священническом и во дьяконьском чину, и во дьяцех и в подьячих, и во всяких чинех; кто чево дородился, и в чем кому благоволил Бог быти. Овии рукодельничают всякими промыслы; а многия торгуют в лавках; мнози и госдьбы деют, в различных землях, всяки торговлями. А, Божиею милостию, во всех тех наших скормленицех и послуживцех, ни соромота, ни убыток, никакая продажа от людей, ни людем от нас, ни тяжа ни с кем не бывала; во всем Бог соблюл по сяместа, а от кого нам, от своих скормлеников, досада и убытки многи и велики бывали, ино то все на себе понесено, нихто того не слыхал, а нам то Бог исполнил.
И ты, чадо, тому же ревнуй, и тако твори: на себе всякую обиду понеси и претерпи: Бог сугубо исполнит.
Живи, чадо, по християнскому закону, во всяких обычаех, без лукавства и безо всякия хитрости ко всем. А не всякому духу веруй: доброму ревнуй; лукавых и законопреступных, во всяких обычаех, отнюдь не люби... И пьяньственнаго недуга такоже берегися: в дву сих главизнах вся злая сводятся, до ада преисподняго, и дом пуст; имению тщета; и от Бога не помилован будет, и от людей безчестен и посмеян и укорен, и от родителю проклят. Аще, чадо, тебя от сего зла Господь сохранит, закон сохраниши по заповеди Господни, и от хмелного питья воздержися, и во всяких добродетелех поживеши, якоже есть богобоязнивии люди, и ты от Бога помилован будеши, а от людей честен; и исполнит Господь дом твой всякою благодатию.
И еще воспомянути: гостей приезжих у себя корми; а на суседстве и с знаемыми любовно живи, о хлебе и о соли, и доброй зделке, и о всякой ссуде.
А поедешь куды в гости, поминки не дороги вози за любовь.
А в пути, от стола, есть подавай домóвным государем, и приходящим, и их с собою сажай за стол, и питейцá тако же подавай; а маломожным милостыню давай. Аще сия твориши, то везде тебя ждут и стречают; а в путь провожают; от всякого лиха берегут, на стану не подадут; а на дороге не разобьют; того ради кормят: добраго за добро, а лихова от лиха: тот ся на добро обратит. Во всем в том убытка нет: в добрых людех хлеб-соль заемное дело, а поминки тако же, а дружба в век, а слава добрая. А на дороге, и в пиру, и в торговле, отнюдь сам брани не зачни; а кто излает, терпи, Бога ради, а от брани уклонися: добродетель злобу преодолевает: Господь бо гордым противится; смирена Бог любит, а покореному Бог благодать посылает.
Аще людем твоим лучитца с кем брань где нибудь, и ты на своих брани; а кручиновато дело, и ты ударь, хотя и твой прав: тем брань утолиши, такоже убыток и вражда не будет. Да еще недруга напоити и накормити хлебом да солью: ино, вместо вражды, дружба.
Воспоминай, сыну, великое Божие милосердие к нам и заступление от юности, и до сего времени, на поруку не давал никого, ни меня давывал никто, во всяких вещех; и на суде не бывал ни с кем: ни искивал, ни отвечивал. А видел еси сам: в рукодеях, и во многих, во всяких вещах, мастеров всяких было много: иконники, книжные писцы, серебреные мастеры, кузнецы, и плотники и каменьщики, и всякие, и кирпищики и стеньщики, и всякие рукодельники; деньги им давоны на рукоделье, наперед, по рублю, и по два и пó три, и по пят́и, и до десяти, и болши; а многи были чмуты и бражники; и, со всеми теми мастеры, в сорок лет, дал Бог, розлезенося без остуды, и без пристава, и безо всякия кручины. Все то мирено хлебом да солью, да питьем, да подачею и всякою добродетелью, да своим терпением. А сам у кого что купливал, ино ему от Мене милая разласка; без волокиды платежь, да еще хлеб да соль сверх. Ино дружба в век: ино всегда мимо мене не продаст, и худого товару не даст, и у всего не доимет. А кому што продавывал, все в любовь, а не в обман; не полюбит хто моего товару, и аз назад возму, а денги отдам: а о купли и о продажи ни с кем брань и тяжбы не бывала; ино добрые люди во всем верили, и зде, и иноземцы. Ни кому ни в чем не сьлыгивано, ни манено, ни пересрочено, ни в рукодельи, ни в торговли. Ни кабалы ни записи на себя ни в чем не давывал, а ложь никому ни в чем не бывала: а видел еси сам, какие великие сплетки со многими людьми были; да все, дал Бог, без вражды коньчалося. А ведаешь и сам, что не богатеством жито с добрыми людми: правдою да ласкою да любовию, а не гордостию, и безо всякия лжи.
Чадо мое любимое, Анфим! Еже тя поучах и всячески наказывах о всяком добродетелном и богодуховенном житии, и грубое сие писание худаго моего учения предах ти, молю тя, чадо, Господа ради и Пречистой Богородицы, и великих чюдотворцев, почитай себе, с любовию и со вниманием, и напиши на сердци своем; и прося у Бога милости и помощи, и разума и крепости, и вся предреченная, с любовию и делом, тако же, по сему писанию, и жену поучай и наказуй; тако же и детей своих и домочадцов; всех учи страху Божию и добродетелному житию. И, аще сам вся сия твориши, и жену и детей, и раб и рабынь, и всех ближних своих и знаемых научиши, и дом свой добре устроиши, вся благая от Бога обрящеши и жизнь вечную наследиши, со всеми одержимыми тобою. Аще, сыну, моего моления и поучения не внемлеши, и по сему писанию не учнеши жити, яко же и прочии добрые люди и боязнивии мужие, и отца духовнаго заповеди не учнешь хранити, и от богодухновенных мужей не пользуешися поучением, и почитанием святаго писания, и христианскаго праведнаго закона не храниши, и о домочадцех своих не радиши, – и аз твоему греху не причастен: сам, о себе и о домочадцех своих и о жене, ответ даси в день страшнаго суда. Аще, чадо мое возлюбленное, и малыя сия заповеди худаго моего учения сохраниши, и по нашему пути пойдеши, и словес моих послушаеши, и делом творити начнеши, и будеши сын свету и наследник небесному царствию, и будет на тебе милость Божия, и Пречистыя Богородицы и Заступницы нашея, и великих чюдотворцов: Николы, Петра, Алексея и Сергия и Никона, и Кирила и Варлама и Александра, и всех Святых, и родительская молитва, и мое вечное на тебе благословение, от ныне и до века; и благословляю тебя чада своего, и прощаю, в сем и в будущем; и буди на тебе милость Божия; и на жене твоей и на чадех твоих, и на всех ваших доброхотав, от ныне и до века!
Чадо мое, единородное и любимое, Анфим! произволил Бог, и Благочистивый и Православный Царь Государь велел послужити тебе в своей Царской казне, у таможенных дел; и ныне молю тя, чадо, и со слезами глаголю: Господа ради памятуй Царское наказание, прося у Бога помощи и разума от всея душа и от всего помышления; служи верою и правдою, безо всякия хитрости, и безо всякаго лукавства; во всем Государьском другу не дружи, недругу не мсти, и волокита бы людем ни в чем не была; всякого отделай с любовию, без брани; а не поспеется, и ты добрым словом отвещай; и присрочив, не изволоча, отпусти; а в торговли прямую разласку чини: душевредная бы твоя служба не была Государю ни в чем; а сам, благословленным Государьским уроком сыт буди; и все бы у тебя Государьское было всегда в счете, и в смете, и в письме, и приход и расход; и к казначеем буди послушен, и с товарищами советен, а к подьячим и мастером, и к сторожем, грозен и любовен, и ко всяким людем приветен, и победных и скорбных и нужных, и полонеников, отнюдь без волокиды управ, и от себя, по силе, накорми и напой, и милостыню дай, по человеку смотря; а случится суд: всякому человеку, богату и убогу, другу и недругу, аще все свое дело истинно и праведно, без волокиды и безо всякия хитрости соверши; по Евангельскому словеси: не на лица судите, сынове человечестии, но праведен суд судите, им же судите судом, судится вам, в ню же меру мерите, возмерится.
Слава Совершителю Богу, ныне и в век века.
Аминь
Неделя о мытари и о фарисеи, слово...



Источник: https://www soika.pro/dok/veroispovedanie /rus samobjitnaja/
Категория: Святоотеческая литература | Добавил: сойка-soika (05.04.2022) | Автор: Сойка-Soika W
Просмотров: 12 | Теги: Поучения о разных истинах веры, благочестия и христианской жизни П. | Рейтинг: 0.0/0
Всего комментариев: 0
avatar