Поучения о разных истинах веры, благочестия и христианской жизни П.В. Владимиров ( 4)

34. Слово Св. Иоанна Златоустого о гордении
Да яко сад потребляем от хврастия (хвороста) – не может расти, тако и человек горд не может спастися, аще не смирением гордость потребим (потребит) и покорным покаянием. Гордаго бо душа на высоту восходит, а оттоле во адскую глубину снидет. Да яко плод изгнил непотребен делателю, тако и молитва гордаго не приятна Богу. Душа гордаго не имать части с Богом, но бесом радование бывает. Гордости (гордыни) бо ради Господь ангелы с небесе сверже и в бесы претвори. Смиренная бо мудрость на небо возводит человека и со ангелы ликовати творит, а гордаго человека гордость с бесы учиняет; молитва смиреннаго приидет к Богу, а гордаго моление прогневает Бога. Якоже тягота уплода (плода) ветвь низложит, тако и гордость погубит душу добродетелну. Человек горд, яко древо корения не имея (не имуще) и скоро падется, тако и гордый во адскую пропасть снидет. Почто возносишися, человече, брение (берние) сый и попел; почто гордостию унываеши? О неразумне! Аще велик еси саном, то имей смирение, никого не похули, чюжих грехов не пытай, да славен будеши в день судный, и скорбнаго плачющася не остави, да не презрены будут молитвы твоя. О убогий человече, кто тя созда, где ли ся еси взял (взя), о чем надеяся (на кого надеяшися) и не боишися Бога, и гордишися, величанием душу си губиши? почто дмешися (надмеваться), яко водный говор (шум)? земля еси, и не помнозе в землю паки пойдеши; ныне горд, а помале (времени) червем покоище. О человече, разумей немощь свою, не гордися! Божие бо создание еси, не отметайся создавшаго тя; посети естества своего и виждь сродники, яко тии того же естества суть, и неотметайся роду своего гордости ради. Аще ты богат, а он убог, но пред Богом он выше тебе. О человече, не гордися о мнозе богатстве, печали бо его отлучают от Бога, жития богатых не блажи; силнии бо силнее испытаны будут. Якоже бо опутану несть лзе ходити, тако и печалми объятому света сего нужно (тяжело, трудно) ити на небо. О богатии, не гордитеся о имении вашем, и тлеющими не хвалитеся: един Бог богат есть, имея нетленное богатьство, а ваше имение ничто же есть. Донде же (донели же) тихо есть, устраяй на спасение себе; человеку бо избавление от муки свое ему богатьство.

35. Св. Анастасия, игумена Синайскаго, о еже не имети гнева
Много может молитва праведнаго поспешествуема, поспевает же, аще каяся трудитися начнет, плоды покаяния сотворше; сице ли же един есть созидая, а другой разоряя, то что успеет, токмо тягость? Велико бо зло есть, еже ити ко церкви, имуще на кого злобу, молитися лжею глаголюще в молитве: Отче наш, остави нам долги наша. О человече, что глаголеши и без ума трудишися, на молитве неприязненный яд в сердци своем нося и вопиеши прилежно к Богу: остави ми, яко аз оставил! Человече, молити ли ся пришел еси или лгати? Благодать ли обрести или гнев приняти, спасение ли хощеши прияти или муки? Не слышиши ли что иерей во время божественныя службы возглашает: возлюбим друг друга, рекше, вся неправды и жестокосердие отверзем. Что, человече, твориши, ангелом шестикрылатым служащим, на святей трапезе тело Христово покрывающим, херувимом трисвятую песнь поющим, серафимом с боязнию стоящим, иерею же за вся люди молящуся, Духу же Святому сходящу, ангелом же написующим имена входящих в церковь беззлобых человек? Како, любимый, не ужасаешися и како просиши прощения, а не простя: аще ли не простиши согрешьшим ти, и Господь тебе не простит, прощая бо, прощен будеши, милуя, помилован будеши. А не рци тако: яко много отпущах брату моему и паки зле досадил ми и много зла наведе на мя и не могу отдати ему. О, возлюбление, не глаголи того, но уподобися Стефану и Иакову, брату Господню, – за творящия ти зло подобает молитися, – и своему Владыке уподобися, смерть за ны приемшу, и стерпи досаду и укор от друга, да оставит ти ся согрешения многа. Бежим, братие, злопомения (злопомнения), лютого греха: всяк бо грех совершается в кратце и борзо (быстро) минуется, а злопомнение люту имать страсть палящу, ибо ходя и лежа и востая яд в сердцы имеет, и тою страстию одержим не наследит царствия Божия и прощения не сподобится. Ту (то) убо никая добродетель не успеет – ни пост, ни милостыни, вся бо злопомнение погубляет: аще принесеши дар ко олтарю и вспомянеши на кого злобу, то первие (первее) шед смирися, а тогда принеси дар и прият будет.

36. Св. Иоанна Златоустого о зависти
Любимии, аз долг свой по вся дни отдаю, еже есть учение, а ваше есть, еже внимати и творити; аще бо слышавше сотворите, то спасени будете, а не сотворите, осужени будете. Слышите, како супротивна сия жизнь духовней любви. Яко же имать кто един детищ и велми любит его, а иже многи имать, то любы хуждьши бывает; тако и душа бывает не может в миру Богу угодити. Тем же не отнюд похотем прилежите, паче же всего зависти бегайте, и не можете радоватися, егда на друга найдет печаль, но скорби о нем и утеши его. Ничто бо тако от Бога отлучает, яко же зависть; всех бо зол злее есть зависть, подобен бо бесу завидивый, егда в напасти кого видит, тогда радуется. Почто бледееши (бледнеть) завидливый? – аще славен брат и обилен, то подобает ти радоватися и Бога хвалити. Почто глаголеши завидливый, яко имения не имам, – аще бых имел, то и убогим давал бы? О брате, не веси ли, аще бы еси богат был, то паче бы еси обидник или лихоимец был; се бо ныне в скудости глаголеши, а богатым дьявол насевает нрав скупости и Бога ради не давати. О, завидливый! сия глаголя, Бога хулиши; аще бо и богат кто, то кто весть, что кому поручит, то колми паче Бог, сведый вся преже бытия нашего, но токмо кождо нас будем о гресех печалуя. Но мы таковы убо вси. Егда убо будем сыти, тогда мним ся, яко можем поститися, и паки, егда трезвы, тогда мним ся, яко можем удержатися от пития, – (а потому) не глаголи сего завистивый, яко аще бых богат был, то много бы давал и щедр бых был к неимущим, и аще бых учитель был, то многих бы наказал. О, брате, аще бы еси учитель был, то на большее бы ти осуждение, или бы ти зависть или леность поучала бы тя покрыти (съкрыти) талант слова Божия. Аще бо и не священник еси, не потай данныя ти (тобе) благодати и разума от Бога; аще ли накажеши несмысленыя, честнейши бо есть сокровища многоценнаго, еже душу приведеши от погибели на спасение, и со святыми учители в день он будеши. А иже имения кто хощет, то первие и малое свое с правдою сотвори и от того участие (часть) Богови подай, да подаст ти обилно. Аще бо в мале будете податливы, а егда богатети начнете, тогда будете и скупы. Мнози бо человецы, имения желающе, душа своя погубляют; аще бо кто и многи добродетели творит, а будет завидлив, то горши татя и разбойника осудится с жиды: тии бо завистию пророки и апостолы избиша и самого Сына Божия крови сотвориша излиятися.

37. Слово св. Анастасия еже не осуждати
Не осуждайте, рече, да не осуждени будете (Лк. 6:37). Се многи (многыи) слышах глаголюща: «горе мне, како могу спастися! поститися не хощу (не могу), а еже не спати не бодр есмь, девьствовати не терплю, мира отлучатися не могу (не тръплю), милостыня не имам, и не вем, како спасуся!..» Аз бо ти глаголю: остави, оставит ти ся, прости, прощен будеши; сими делами можеши спастися. Аще имения не имаши зде, ни телеси трудити, – аще оубо и своима очима видиши кого согрешивша, то не осуди: един есть судия Бог, иже воздаст комуждо по делом его. Судяй бо кто чужия грехи Христу противник есть и антихрист наречется, яко суд Христов восхищает. Да не судим, братие, всякому согрешившему, да прощение нашим согрешением приимем от Бога. Аще еси видел кого согрешша (согрешивша), но не веси, как житие преидет. Разбойник бо он, иже со Иисусом распятый, человекоубийца бе, а Июда апостол бе Христов, – разбойник же вниде в царство, а ученик в пагубу. И аще ли видеши кого согрешша, но не веси добродеяния его: мнози бо яве грешиша, а отай покаяшася. Тем же, братие, не осуждаем никого же, да сами не осужени будем; паче же да не осужаем иереев (священников). Аще видел еси (его) что сотворша, то не рцы, яко грешен есть и недостоин служить, но приступи к нему с чистою совестью и причастися божественных тайн, да святыню получиши. Аще бо и ангел есть приносяй безкровную жертву, а ты недостойне приходиши, то никако и ангел от грех не очистит тебе. Истина бо о Июде послушествует (свидетельствует), яко от пречистыя руки Владыки Христа хлеб прият и абие вниде вонь сатана за недостоинство его; се бо известно вы есть, яко аще не осуждает кто, не осужден будет. О сем бо мнози послушествуют.245 Муж некто черноризец, в лености житие прейде, разболев же ся к смерти и пришедшу ему к последнему издыханию, и никако же не стужи си (не печаловался), но благодаряше Бога. Един же от седящих у него от великих отец глагола ему: брате, ими ми веру, яко отнели же мнихом еси и вси видехом тя, яко в лености и в небрежии житие свое скончал еси; но откуду таковое беспечальство в страшный час имаши? – Брат же отвещав и рече: воистину, честнии отци в лености житие мое скончах; но отнели же отвергохся от мира и бых мних, не осудих никого же от человек и никому зла не сотворих. И ныне принесоша ангели Божии рукописание грехов моих, и свершилося на мне слово Господне, еже рече: не осужайте, да не осужени будете, оставите, оставлю вам, – и растерзано бысть рукописание грехов моих. И се радостно иду с беспечалием к Господеви Богу моему. И яко изрече се брат отцем и в том часе предаст дух, многу пользу всем сотворив. Да се слышаще, братие, потщимся не осуждати, ни зла помнити, да Господь Бог не осудит ны и не воспомянет прегрешений наших.

38. Св. Иоанна Златоустого о клятве
Егда убо видиши кого живуща в озлобнем богатстве (в богатстве, неправдою приобретенном)247 и ничего зла неприемлюща, не блажи его, но плачи и скорби: онамо (там) бо лютыя муки приимут таковаго. Иже бо зде кленущеся во лжу и ротящеся (ротящися во лжу), мздоимцы же и грабители, во обилии живут, таковии (сице) бо питоми, яко свиния на заколение, и во отреченныя (погибельные) муки с неверными осуждени будут. Аще речеши, мнози ротятся и кленутся, то како зла не приемлют, не мстит бо им вскоре, якоже при Анании и Самъфире? Не чюдися, брате, иже бо велики грехи творят, а беды ни малы не приемлют: тем много готовится за терпение Божие, люты им муки будут, и на большую беду щадими суть, а иже бо добродеяния приемлем, а во злобе живуще, то болши достоит нам скорбети. А иже зде за злыя наша грехи ничего люта не приемлем, егда же противу нашим согрешением, наводит бо казни, то легчае нам суд творит. Велика бо согрешения есть рота и клятва, иже преступити крестное целование и целовати накриве Пресвятая Богородица, или иного святого (образ) многих грех тяжчае есть. Недостоит бо клятися именем Божиим, или в правду или безправды, да не (о) нас сбудется, иже Господь, рече: человецы сии токмо ротою мя знают. Сего ради Захария пророк виде серп огнен сходящ с небесе на землю, и моляшеся Богу, да проявит ему; и сниде к нему глас, глаголя: сей серп гнев Божий насылается от руки Господня на тех, иже ходят к роте на криве, да сожжет домы их, а душа их огню негасимому предаст (Зах. 5:1–4). Да отнюд, братие, не можем клятися, ни друга клятвы догнати. Сам бо Господь Бог учит ны глаголя: не кленитеся ни небом, ни землею, ни иною коею клятвою, ни церковию: кленыйбося церковию, то живущим в ней Богом кленется; ни главою своею не кленися: не можеши бо ни единаго власа бела или черна сотворити; но да будет слово ваше, еже в правду: ей ей, а невправду: ни ни, а лише сего от диавола (от неприязни) есть (Мф. 5:33–37). Ныне же чрез (вопреки) повеление Божие крестом кленетеся, его же даде нам Бог начесть велику и оружие напротивнаго врага. Без того бо крещение и литургия не бывает, ни ина кая духовная вещь, име же мы знаменающеся бесовския силы побеждаем. Мы же тем ово волжу, ово вправду кленемся, и велми паче гнев Божий на ся подвизаем. Заповедаша бо нам апостоли и святии отци, рекуще: ни кленитеся никакоже инако: аще вправду рещи: ей ей, а невправду: ни ни, а лише того, Господь рече, все от неприязни есть. Того ради Бог казни многи посылает на ны, овогда же дождя не пустит, а овогда пожаром и болезньми тяжкими и прочими бедами, зане ротятся человецы и друг друга клятвы доводит (догонять), и святую церковь ротою оскверняют. Богу нашему слава.

39. Слово Святых Отец о славе мира сего
Уподобися слава мира сего пламени огнену, иже подгнещен дровы велик бысть и потом во углие преложися и потом (бысть) попел, и паки развеет (ветр) и место необрящется. Велицыи же святии: Григорий Богослов, Василий Великий, Иоан Златоустый, Ефрем преподобный рекоша о видимом и нарекоша жизнь сию – (овии дымом) – овии прахом, друзии же яко ничтоже суще. Многих бо безумных лстит свет сей богатством, селы, конми (коньми), пищами и одежами когождо нас и до гроба. Власть бо очи смысленных ослепляет. Рече бо Иоан Златоустый: велик человек есть пред Богом, иже во власти не изменится страха Божия (страхом Божиим и) яко Кирил философ рече: Бог созда человека между двух животну, между ангел и скота; кроме (вне) бо ангел гневом и похотию, кроме же скота словом и смыслом, да яко же кождо нас сам что изволит: рай или муку; самовластни бо есмы. Ум убо положи Бог человеку во главе между мозгом и теменем, яко (акы) яблоко в сосуде некоем. Яко же князь во граде владеет людми, тако и ум владеет душею и телом. Добрый бо ум душу спасет, и яко же пред князя всяка пря приходит, аще ли же князь смышлен и добр, то правым помогает, а виноватыя казнит; тако и ко уму от сердца приходят благая же и злая помыслы. Понеже человек смертен и безсмертен, тело смертно, а душа безсмертна, тело поучает на грехи, а душа на добродетель. И прятся мысли: неверие с верою, нечистота с девством, пост с невоздержанием (пьянство с целомудрием) и прочая. Приставлении же человеку ангели во святом крещении соблюдают и до дни исхода, ожидают покаяния; любят бо ангели род человечь, яко тех деля видеша Бога во плоти, а преже того не видели николиже. Сам бо Господь во Евангелии рече, яко радость бывает на небеси о едином грешнице кающемся (Лк. 15:7, 10), глаголю бо вам, ако ангели их на небеси предстоят пред неизреченною славою Божества Его, но не видят лица Его; а егда на земли грешник покается, тогда слава Божества открывается, и видят ангели лице Господне и радуются. Святии же отцы жизнь сию ни вочто вменили. Вся бо вскоре погибают, яко прах и пепел, и яко цвет травный увядает. Вся бо света сего прелестна: богатство, и слава, и власти – вся погибает. Та вся тленна быша Адамова ради преступления. Не на сию бо жизнь сотворени быхом, но на райскую; не того ради пусти нас Бог в мир, да грехи творим, чужая грабяще и насилующе; но да взыщем раю и царства небеснаго, идеже радость безсмертна и нетленна, веселие и красота некончаема, идеже Херувими и Серафими, Силы небесныя со всеми святыми радуются, о Христе Иисусе.

40. Слово св. отец о правде и неправде
Оубо первие бысть правда Богом сотворена в человецех, потом же от неприязненна действа (от вражеского, сатанинского) неправда воста. И прияша человецы неправду и возлюбиша, а правду оставиша и отвергоша. И остави я правда во своей воли ходити. Самовластни бо есмы, и своею волею погибаем. Оставя бо правду, а злая творим; ведуще истину, но не творим ея: лжем бо и крадем, обидим, осуждаем грехи чужия, завидим, грабим, по мзде судим, и многи ины неправды деем, яже суть на пагубу душам нашим. Прияша бо неправду человецы от дьявольска ума, и изволиша (и остави я правда) ходити по своей воли, да погибнут, яко же сии (они сами) изволиша: всяк бо волею своею или погибнет или спасется. Самовласти (самовластнии) бо есмы, да яко изволим что, то и творим, или рай или муку обрящем себе. Возста бо (по нашему произволению) на девство блуд и погибе девство; воста на чистоту скверна, а на кротость гнев и лютость, гордость на смирение и на любовь ненависть; воста несытость на пост, а на трезвение пьянство; воста обида на братолюбство (на братство), татьба же и разбой на тихость и на милосердие; скупость воста на щедрость, неподание и несохранение закона; на Господня заповеди вся неправедная восташа, на благая дела супротивство. Тем, братие, многи нам исправление требе, еже искати правды Божией; мнози бо, неправду деюще, зле погибоша. Разумей, убогий род человечь, яко побежен (побежден) еси неправдою, увеждь, о человече, от ныне увеждь, кто сильнее, Бог ли или дьявол, всех враг, и разсмотри – что лучше есть: грех ли погубляя (нас) или закон спасаяй; добре увеждь: тело ли нетленно или душа, и что добрее, рци ми, правда ли или лжа, рай ли или мука? О несмысленне род человечь, почто неправды деля погубляетеся сами, а правду оставили есте, ею же бо спастися! Возлюбили есте злобу, пьянство, лжу, татбу, гордость, скупость и прочая неправды, а не уповаете правдою спастися. Никогда бо Бог не оставит человека в правде живуща. Правда праведнаго от смерти избавит; блажен человек во истине пребывая; лучше нищь ходя во истине, нежели богат лжив; творяй бо истину о Бозе живет. Глаголет бо Генадий патриарх: три нравы возненавиде душа: богата лжива, стара блядива, убога хупава. Тем же, братие, лепо ны есть, правду деюще, милости Божия просити. Смотрите убо, вся иже в житии сем красна, и славна, и сладка, – богатство же, и питие и различие риз, села и винограды; но вся си оставльше умрети имамы, аще ли и вельми есть любо, но ничто возьмуще, отходим от них. Тем же, братие, понудимся первие смерти в правде пожити и добрая дела творити, и милостыню даяти, да получим жизнь вечную от Бога, Ему же слава.

41. Слово Иоанна Златоустого еже неотчаятися в беде
Яко аще кто добро творя, в беду впадет или в болезни люты, или в грабление имения, или в оклеветание, или пожаром, или потоплением лишен будет имения, то немози хулы на Бога вещати. Аще ли бы злая творяще и беды не приимали быхом, но во обилии бы и в веселии и в беспечалии (были), то отнюд (отъинудь) бы зло, и забылбыся человек в богатьстве и в беспечалии и скоту бы уподобился. Давид бо пророк о том проразумев, рече: человек в чести сый неразуме приложися скотом несмысленым и уподобися им (Пс. 48:13). Исаия пророк рече: Господи, в печали помянухом тя (Ис. 26:16). В печали бо на угождение Богу добре обещевается человек, но аще обета не исполнит, то велми лют и зол ответ таковому будет. Мнози же, не ведуще, глаголют: Он си (сице) милостивец (милостивый) в беде имение погубил. Глаголю бо ти, аще хваля Бога, стерпит о сем погублении то болшу явит любовь Богу и приимет от него вечный живот и небесное царство, – се терпением многим и добрым сотворится ему тамо добро. Аще кто вас, любимии, в таковое впадет искушение, то помяни Иевлю болезнь и беду и прочих святых, да мзду такову же приимеши. Аще ли недостатки и скудостию томим еси, то помяни пророки и апостолы и вся праведники, иже алчни и жадни и нази хождаху, и обрящеши вся – не в богатстве, ни в покои бывша, но в скорбех и бедах. Сия вся помыслив, благодари Бога, дабы тем же причастника тя сотворил. Ничтоже есть сему равно, еже во искушениях Бога славити. Боящим бо ся Бога наводит диявол скорби многи. Якоже татие, не ту крадут, идеже тростие (прутья) и плевы (мякина) лежат, но стрегут всю нощ, не спяще, идеже богатьство сокровено; тако и диявол смущает боящихся Бога. Но сим побежай диявола, иже в беде благодари Бога, и уготови душу свою во искушение, сердце же свое терпети болезни. Егда бо что сотворив добро, а зло приимеши, то уповай и не отчайся, двое бо мзда ти будет. Да аще и многи пакости сотворит ти враг, то не отчайся, но паче утвержайся покаянием. Велика бо добродетель пред Богом, еже во искушениях не стужити си.

42. Слово Иоанна Златоустого – его же любит Господь, того и казнить (наказует)

Аще кого видиши неправдива и злобна человека во здравии и в обилии живуща, то не чудися тому; нечто бо мало добра сотворили Богу, и того ради мзду свою зде восприемлют, а онамо (там, за гробом) услышат, яко богатый он (евангельский богач): ты благая в животе своем восприял противу малой добродетели (Лк. 16:25). Аще ли кого видеши много беды и скорби приемлюща, а в правде живущи – блажи убо его и позавиди ему, яко таковый зде очищается от грех, а онамо к великой радости пойдет: его же бо любит Господь и наказует (Евр. 12:6). Человече, почто смущаешися, зря святых в печальне житии? Иже бо кто зде скорби терпит, тии бо в небесное царство водворяются радостно; а иже злии лихоимцы, татии же и грабители и клеветницы во обилии живут, – таковым вечныя муки готовятся, яко же и богатый он (Лазарь – Кир. сп.) во пламени жгом сый и моляше Авраама, к нему же Авраам рече: ты, чадо, благая своя приял в животе своем, Лазарь злая, да сего ради зде утешается, а ты стражеши во пламени жгом. Слышите, кая благая приял богатый: богатьство, здравие, питание, власть и славу и питиа многа, вино драгое и от всех честь. Что убо Лазарь ничто же ли согрешив? Ей убо и той (богатый) мало име согрешения, но егда богатый благая приимяше в животе за малое свое добро, тако же и Лазарь прият зде злая за малыя грехи своя, того ради ныне мучится зле, а убогий Лазарь ныне утешается на лони Авраамли. Тем же, братие, сице зде и правдива кого видите болезни и беды приемлюща, блажи таковаго: зде бо грех избыв, а онамо чист к Богу отъидет, аще ли беды продолжаются, то множае паче прибыток плодится. Ибо Иов правдивый, непорочно бяше заповеди Божия творя, и колико зде страстей тело его прият, да онамо преболшую честь приим. А инии, зле будуще, во здравии живут, то никто, братие, позавиди грешнаго человека славе, но паче плачися о нем, мечь бо судный готовится нань (на него). Понеже Исав богатеяше свърник сый (Тр.-Сер. скорбник), Ияков же, правдив сый, и многи прия скорби, Давид же, пророк сый, и все время живота в бедах и в трудех поживе, а сын его Соломон царствова 40 лет, мир имея велик и славу и честь, последи же бо отступль от Бога и во идолобесие впаде. Что же бо Июде успе господне учение и многая чудотворения? Тем же не иже добре начен, но зле творя, но аще кто добре совершит, той и праведен есть. Неци бо яве согрешиша, а отай велми покаяшася, от нас убо мнятся грешни, а у Бога праведни. Того ради недостойно есть согрешающих осуждати.

43. Слово Св. Иоанна Златоустого о берущих многа имения
Ныне убо, братие, благо время есть возгласити к вам пророческое слово и рещи чюдесная дела, а душа моя свесть я зело; ибо аз днесь пирник (устраивающий пиршество) вам, аще бо и не свое раздаваю, но взаим взем от пира Златоустаго. Тем же (молю) вы дадите ми днесь слухи ваша, да в них изъглаголю, да не отъидете алчуще, но насыщающеся духовнаго пира святаго сего учения. Речем убо ныне с Давыдом, немощь человеческую обличающе, яко всяк человек без ума мятется и собирает, а не весть кому собирает, мятет бо ся, яко не быв, погибает, яко (акы) цвет увядает, и яко дым расходится, яко огнь угасает. Мятет бо ся собирая богатство, а отходит сего света не взем ничтоже. Тому токмо мятежь и скорбь, а инем богатьство и слава дому его; той бо алчет, а инии добра его (богатства) насыщаются; тому проклятие, а инии негуются (веселятся) во имении его; тому стонание, а инии имением его чтятся; тому слезы, а инем радость; той во аде мучится, а инии во имении его упивающеся воспевают. Воистину, впустошь (всуе) мятется всяк человек, собирая много, а Бога ради не подавая; умрети бо есть и оставити вся, а никто от нас не безсмертен есть. Тем же (братие) которое себе изволим, рай или муку, самовластни бо есмы. О колико нашего безумия плакатися имамы! Аще зде неостанемся покаянием и добрыми делы, то ничтоже успеет нам (обретохом) добрее пророча гласа, яко безума мятется всяк богатый. Виждьте (видите), любимии, яко вся нестройна суть в миру сем и яко во тме семо и овамо преходит сей: иному имение исхити, а ин другому (ѧ) землю отняв (отъят), ин же на ближняго в сердцы злая мыслит, (тои) словом точию любятся (любовь только на словах), а инии предела для земнаго (для земных целей и видов) бьются и тяжутся; сей, ему же не дал, взяти хощет, а иже взял, то не дати хощет, и прится (и запирается – отказывается – чужое взяв), иному же ум имением не сыт, имения не насыщается; а ин, истоваго (истинного, надлежащего) долга хотя лишитися, крепится (усиливается, старается получить свое); иней же не имый имения, плищует (вопит) и тужит, а иже имея много помышляет на отнятие, величается и гордится, упивается и которается (спорит, ссорится) со многими, лжами возносится, истинны не любит. Богатых бо ради жизнь сия (мятежом) испровержется (рушится), имения бо деля свободныя человеки порабощают и продают. Богатии мыслию растаяваются (блуждают), должнии печалию увядают, златолюбцы на судище часто ходят, клеветницы лжами продают, имуще имение на прикупление желают, а Богови части не отделяют, друг на друга лжу и клятву скончевают, – клятвою токмо Бога знают. Тем же пророк зле живущая обличает, глаголя: всуе бо мятется всяк человек живый неправедно, собирает, а не весть кому собирает. Возмущаются бо ся воды, и паки уставляются, возвеют ветры и паки утишают, возгорится огнь и паки угаснет; а человек, иже мятися о имении своем и никогдаже не почиет, собирая (собирает), а иного зрит и неправдами желает (жадает) собрати. И душу си погубит, жадая (жадаючи) имения, а не помышляет, яко вся та оставльше, умрети есть, а с собою не взяти ничтоже.

44. Слово святых отец еже не обидети вдовы и сироты
Царь ли еси или князь, или воевода или судия, – то помысли, от кто еси власть приял, или кто давый ти власть, и сан, и ум, и мудрость; да умеете месть гонити. Сице глаголет Господь: слышите князи и судия человеческия, да не оправдиши виноватаго мзды ради, ни устыдися лица силнаго, избави обидимаго, да сам будеши избавлен в день страшнаго суда. Всякоя же (всякие) вдовы и сироты не озлобите, да не яростию разгневается на вы Господь. Глаголет бо пророком Исаием: аще неправдою озлобиши сироту или вдовицу, они же в горести душа их воздыхающе возопиют ко Мне, Аз же скоро услышу вопль их, и пущу на вы гнев свой и погублю вы напрасно; и будут жены ваша вдовы, а чада ваша сироты и никто их не помилует. О имении бо сиротине и вдовичине помышляя и хотя взяти я (именья сиротня, ни вдовичья не восхищай), – силень бо есть Бог и мщает их, рекий (рече): аз есмь отец сиротам, и мститель вдовицам (оборонитель вдовичь), от рук силных избавлю я. Горе обидящему вдовицу или сироту: лучше бы ему огнь в дом свой вверегше, запалив, избегнути, нежели за сих воздыхание ввержену быти в геену огненную. Темже без испытания (испытание) не приемлите клеветы на сироты и вдовицы, и не вскоре имите веру обижающим (клевещущим), но блюдитеся сети дияволя. Послушайте же паче писания, глаголющаго: сироте буди помощник, и благословят тя уста вдовича, буди сиротам яко отец, и вдовицею попецыся в мужа вместо, и обидимаго моления послушай скоро. Се бо велика добродетель есть пред Богом, еже наделяти сироты и вдовицы и утешати в печалех сущая. Лучше бо приобрести мало добро со благословением, нежели богатство много с клятвою. Аще ли поставил тя царь в великий сан и идут к тебе малии и велицы, славнии и неславнии, приносяще ти дары и чести: то благо есть и от Бога даровано; но блюдися со грехом взятися. Се бо неправда есть, егда кто мзду даст хотя суперника своего препрети, и будеши неправедно осужая человека во образ Божии сотвореннаго, его же ради Христос кровь свою пролия. Проклят бо, рече, всяк судяй неправедно, ярость бо Господня не исцелна на них до века, и огнь снесть домы вземлющих мзду, и чада их не поживут нечестия ради мзды их. О властели неправеднии и мздоимцы! яже собрасте от вдов и от сирот, то в негасимом огни подгнета (подтопка) есть душам вашим.

45. Слово–наказание св. отец о помощи ближнему, погибающему в злых делах
Аще убо скота не презрим в калу грязнуща, то вси простираем руце извлещи хотяще, а брата в злых делах погибающа презрим, – но почто не наведем на истинный путь учением? Аще убо кого видиши душевредно что творяща, то наказати его лепо; аще ли ведый, а не накажеши, то содеянник, (причастник, соучастник) еси осужению его. Егда же видиши кто нетвердо в вере стояща, то научити его лепо, да небезчествует християньства. Егда же отженена (от жены) кого видим блуд творяща, то наказати его, да не блужению прилежа, а души нерадети начнет. Егда ли клирика или черньца видиши безчинно ходяща, учити я достоит, да образ жития инем даст, а не соблазняет мира. Господь бо о том рекл есть: горе человеку тому, им же соблазн в мир приходит; лучше бы ему камень жерновный обязан на выи его, и ввержен бы был в море, дабы един погибл, нежели бы соблазнил единаго от малых сих (Лк. 17:1–2). Соблазн бо есть еже безчинно начнет кто что творити, или поп или диякон, или чернец или дияк: ничто бо сему равно, иже от дияволя лсти душу на покаяние привести. Велика бо добродетель, иже видев кого на зло шествующаго и учением на истину привести душу на путь спасения; ничто бо есть равно души, ни мир весь; небеси бо и земли душа честнее есть. Аще бо и многа раздаси имения Бога ради, но се преболши (преболее) есть, аще едину душу кто приведет к Богу. Аще бо обратиши кого от погибелнаго пути, то честнейши есть камения (сокровища) многоценнаго; аще ли же видя кто зло, и умолчит, то осудится с ним. Бедно бо есть, еже что уняти от закона Божия, а не проповедати: то тии учители горши убийц осудятся, аще не вся заповеди Божия заповедует. Убийца бо токмо предлежащей смерти предает, а иже кто по дару глаголя и слабейша слышащая творя, – душу погубляет, и к безконечным мукам посылает, и сам лютее жидов осудится в день судный. Иже бо кто ведый слово Божия воля, а не наказает неразумнаго, то яко злато сокровенно на пагубу души скрывшим есть, тако же и неучай небрежением многу муку и лютое томление приимет в день судный.

46. Поучение ленивым, иже не делают, и похвала делателем Великого Василия Кесарийского
Иже глаголю вы, братие, слышите. Нехотевшу бо ми о сих глаголати к вам, но боюся реченнаго: возбужайте спящая и подвизайте на дело ленивыя. Аще бо земныя страды (труда и забот) убегаете, то небесных благ не узрите. Делателем бо обещал есть Бог от труда убо здравие, а от страды спасение, ленивый же, да – по Апостолу – не яст. Земный бо делатель подобен есть иноких (инокых) пустынному житию и труду (их). Понеже, сон отрясше, на дело земное идет, и паче дому пустыню любит; зною же и зиме трудным делом сопротивитъся (супротивляется), и собирая плоды трудов своих, благословен Богом, от них же приемлет душевное спасение. От тех бо (трудов) и нищая накормляя, и неимущим подавая, яко самому Христу дает, иже бо плод (плоды) дает дождь, посылает ранн (рано) и позден. Всяк бо, делая землю, насытится хлеба, понеже сии стоги возвыси гумна. Благословен Богом иже трудом своим хваляйся, руце бо возстанливаго (усерднаго) обогатеют, неделатель же и пьяница не может быти богат, леность бо всем злым делом мати бысть (есть); аще бо что и доброты имаши, то леность погубляет, а инех добродетелей не даст совокупити; аще бо и богат будеши, а ленив, то оскудееши. Всяк бо ленивый, славя себе, проклят есть. Аще бо ленивыми пеклъся Бог, то повелел бы былию жито растити, а лесу всякий овощь. Всяк бо ленивый облечется в скудныя и раздранная портища. Аще убо кто на дело ленив, тот и о души своей не подвизается (не печется). О празднолюбцы и ленивии, которую мзду Богови принесете труда своего, яко не требует Бог жертвы, ни приноса от лихоимания, но яко (аки) пса заколаема гнушается! Лучше есть не творити (милостыни) чюжим, а не грабити. Не ленивым бо, ни много спящим, ни лихоимцам, ни пьяницам, ни крадущим обещал есть Господь вечную жизнь, – но тем, иже Бога ради тружаются, делающе своими руками, и от того участие (часть) Богови отделяюще. Инии же польским (земледельческим) прилежаще делом, а инии скот и кони пасут, и от того отдающе десятину Богови, спасаются; инии же сено секут и агньцы кормят и от того нищая и немощныя накормляют и одевают и приимут благословение от Бога; инии же по морю плавающе и в пути ходяще гостьбы (торговлю) деюще, и отделяйте (отделяют) душевную часть церквам и нищим. Тако же и рукоделницы творите милостыню, да от сюду по отшествии царство небесное приимете. А жены утвердите лакти (локти) своя на дело, а руце на вретено и от того милостыню давайте, да спасетеся. А не делающе бо, то кую мзду силы своея принесете Богови? Никто же бо без труда спастися может, но всяк кождо по делом приимет.

47. Поучение святых отец к ленивым и нехотящым делати
Друзи и братия моя любимая! не уподобляйтеся ленивым рабом, – не долго спите, не долго лежите, въставайте рано, ложитеся поздо, молитеся Богу, да не внидете в напасть, яко-же рече Господь (Мф. 26:41. Мк. 14:38). Лежа добра не видати, а горя не избыти, и спасение не получити, Бога не умолити и грехов не очистити, чести и славы не получити, цветных риз не нашивати, медвенаго пития не пивати и сладкаго брашна не ядати. Безумному и ленивому и невостанливому добрым мужем не слывати, и господином в дому не бывати, и во власти себе не видати, к богу и ко князю и к государю милым не бывати. А еще беда его по голениям биет, а долг его в зашеек толкает, недостатки его в дому седят, а раны ему по плечам лежат; уныние его на главе, а посмех на браде; помысл на устех, оскомина на зубех; горесть на языце, печаль в гортани; в печенях его сухота, а во чреве алкота; убожество у него в калите (в кошельке) и гнездо свило. Таковый человек ленивый и лежливый в дому не господин, жене не муж и детем не отец, и добрыми людми не знаем; в деревне жити ленится, а на посаде не годится; в селе его не пустят, а во граде и места несть. Таковый, ходя по улице, скитаяся, и аки несытый пес, по окнам глядит, и аки оскорблая свиния о углы чешется, потому что привязалася к нему леность, аки пещер (простонародная дорожная из лык сума, носимая за плечами) за плечами; а нищета у него в пазухе и гнездо свила, а скорбь у него по бедрам висит, а тоска и ноги связала. О люте! привязалася к нему леность, как милая жена к мужу своему, – и часто воздыхает, а разстатися не хощет! окаянные же беси, аки любовные друзи; а сон тяжкий, аки милый отец; злая же слабость, аки родимая его мати; а упрямство и непослушание любит и держится, аки брата и сестры не лишиться; а укоры, и поносы, и безчестие ему воздают, аки снег на главу летит. И навыкнет, окаянный, чужими трудами кормитися, аки червь капусту ясти. И от многаго уныния спит без числа, и беси ему во сне сония кажут и видения являют; и, убудився от сна, разрешает мечтание и умышляет горшую погибель, и потом вечную муку наследит, – от неяже да избавит нас Господь Бог, молитвами пречистыя Его Матери и всех святых, всегда, и ныне, и присно, и во веки веком. Аминь.

48. Слова и поучения против пьянства
I. Святаго великаго Василия о том, како подобает въздръжатися от пьаньства
Многож и о томь пишеть в правилах святых отец. но разумным и се указание довлеет. а неразумным. аще бы им кто из всех книг писаниа предложил. ни тому веры имуть. ни обратят на то разума. Аще ли писанию веры не имете. помыслите свои злосмрадныи студа исполненыи пьянственыи дела. ими же Богу съгрешаете и Бога прогневасте. иже бо многа питиа пьете с трепари. Егда в начале бывает кротко мирно и благоутешно. по числу равеньство. почто стое (святое) устроение. пред стареишими молчание. премудрейших послушание. ядение и питие благочинно во время обеда. егда испьют кождо но заповеди святых отець. еже узакониша православным по три чаши. тогда начнуть брашно ово избирати. ово отлагати готовящеся на питие. Егда испиют  еже есть от неприязни. тогда и то самое избираемое брашьно оставят. и начнут беседы благы беседовати кождо о своеи потребе разумнеи. наказание любят. премудрых философ ищут. философи язык на ответ готовят. углубляют удицю слова в глубину божественнаго разума. простирают мрежу святаго писаниа в море словесных рыб. острят мысль заклати неразумныа в разум истинныи. господие же велиции начнут събирати ум и простирати любовь к всем. к нищим милование. и своя домочадным разсмотрение. И всем немощным и бедным помагати хотят. любят честь. тщатся на большая. и что много глаголати. кождо по числу своих сан устраяет. отци духовнии на спасение своих чад оучат. в покаяние зовут. к вышнему Иерусалиму путь кажут. таже и простая чада кождо свою потребу глаголют. Егда испьют 7-ю чашу. еже есть богопрогневателна. духа святаго оскорбителна. ангел отгонителна. бесов възвеселителна. ангелу же отшедшу от когождо человека а бесу приближшуся. и начнут бесы своя потребы вносити. ово зависти и клеветы. а ин свары и лаяниа. и за власы рваниа. ин кровопролитие и убииство. ин же любодеяние и блуд. и всяку нечистоту и студь. ин же высокоумие и гордость. ин же игры бесовьскыа и песни и плясание. и что потреба многа глаголати. всяку кознь сатанину. и всяко коварьство вражие исполнят. и обросят своим злосмрадием когождо человека чяшу. Егда же испьют бесовьскую чяшу. зажжет вся внутренняа его. и начнет утроба палима быти. гортань пресыхати. слины изгарати. устне слипатися. на губах смага спадеть. и тело все загорится. и в лице огнь явится. язык одеревянеет. гортань ожестеет. очем зрак минет. уму сила оскудеет. начят с хмелем братися акы на брани с супостатом. и по времени некогда едва одолеет своему супостату. и сядет на своем столе, акы царь от победы възвратився. И начнет тогда человек зинути на чяшу не зная своеа меры. и наимется тело хмелю. акы губа воды. и оскудеет сила. изнемогут жилы. съставы разступятся. и начнут ногы неправо ступати. и глядати развращенно. глаголати безумно. ничим раздно с изступившим ума. Тогда же и бес вся своя хотениа в нем исполнит. Суть же и неции сицево. пианицы ни беса требуют ни бес о них брежет. но сами себе беси. пропивающе заутренюю и часы и молитве время. О человече, что твориши. ум свои погубив бесчинно. и скаредно живыи. поганых нрав любя. то бо есть поганых веселие. еже упиватися без меры. а православным христианом взаконено. когда отобедати тогда и отпити. А ныне видим многым седящым весь день. погубляюще питием время покаяния. не могыи сътворити к тому подвига душевнаго ни телеснаго. но все предая на питии душу и тело томя. Дивно бо есть по истине. в един час брашна напитатися. а пиюще весь день погубити. Мню яко безсловеснии скоти и зверие. ни Бога ведуще. ни попечениа житеискых вещеи. и жизни вечныя не надеющеся. всего праздни. обаче и те смеются нам. аще не глаголют безсловесни суще. но вещию глаголют. Мы глаголем несмыслении. зде отядим и отпием. а тамо не надеемся жизни вечныя. а сии человецы несыти. иную ли устробу имуще на питие. а иную на ядение. льют акы в утел съсуд. дóндеже възбесится от пианьства. Две же есть различии пианьству. едино убо мнози хвалят глаголюще. то есть пианица иже не ляжет спати. но толчется и бьется и лается. а хощете ли слышати известно внимайте. Колми Бога прогневает кроткый пианица. и упивался съгрешает. аще и спати ляжет прогневает Бога. что реку кроткаго пианицу, скотину ли нареку. но и того скотие. свиниею ли прозову. но и того скареднее. Аки мертв. ни се мертв ни се жив. отпухл аки болван. валяется осквернився и домочився смердит. и блеванием огнусився. себе сам гнушается. в святыа праздники лежит не могыи двинутися. разслабев телом. налився акы мех до гортани. надомся акы бочка хотя разсестися. напрягся хощет прощькнутися. утопив сердце пианьством. ум погубив хмелем. Трезвии же и богобоязнивии. иже с страхом и любовию приходяще в церковь Божию. и наслажаются божественаго пениа и чтениа святых отець житиа. яко на небесех стояще мнятся пред Богом, а пианица лежит немогыи главы възвести смрад отрыгая от безмернаго питиа. И есть таковыи яко ничим же разно от поганых. Да умолкните глаголющии. аще упиюся и кротко спя не створю зла. Виждь колико зла твориши пропивая праздникы. Кроткии убо пианица възлюби (в) пространьство упиваяся без меры. з богатым тем в огне имать искати устудити язык и не обрящет. Дръзливый же и некроткый пианица не токмо себе вредит но иных многых. Чим его нареку. зверя ли его нареку. но и зверя злее. бесным ли его прозову. но и того злее. говейным и боголюбивым поносит и укоряет. стужает и докучает, аще ли властелин. сугубо зло имать. наседает неправдами. хвалится. прогоняет. хощет бо всех своеи пагубе повинны створити. бояся от них укора и осуждениа. говейных ненавидит. любит же подобных себе. иже ему потакающе сведут себе в огнь вечный. потаковиа ему творящаа. блазняще и льстяще ласкающе на слабость. Но слышите братие апостола глаголюща. Не упиваитеся вином в нем же несть спасениа, но паче блуд. Пиай вино с трепари кою ползу имать. егда упиется не помнит трепарии. и тако ти начнет ползати на колену. и лице окалял валаяся в грязе. и блюя хощет пересестися. в ругание и в посмех дав себе и малым отрочатем. и хранителя души своеи ангела отгнав от себе. И кде суть трепареве тии сотворении к чашам, да быша избавили от беды тоя. бесящихся своею волею. Бесный (и) же стражет неволею избудет вечныя муки. пришед иереи к бесному. молитвою отгонит беса. а над пианаго аще (бы) и с всея вселеныя сошлися священници и молитву сътворили. не могут подняти от пианьства. ни самовольнаго беса прогнати пианьственаго. Того ради святии отцы не повелеша трепарии пети всегда. но токмо в нарочитыа праздникы. понеже трепарь плача не ражает. аще и в церкви поем в трезве уме. не ражает плачя. в питии же творим трепарь что ражает. не грех ли. не муку ли. не суть бо уставили богоработници. но чревоработници. их же бог чрево. и слава в студе их. еже святии мужи и жены бегающе получаша жизнь вечную. Буди же ведомо и нам. тако же творяще получим милость божию. Святии бо отци уставиша святыя дни постныа по научению Господню и по заповеди святых апостол. Рождество Христово Иоанн Златоуст. а крещение Василии и Григории рекомыи богослов. а пасху первыи събор всех святых отец, уставивше святыя и честныя праздникы господня. заповедавше духовно праздновати. а не телесно. чреву работающе безгодным пианьством. но господеви молящеся о своем съгрешении. нищих немощных и бедных питающе с собою в подобно время, тело кормяще земным брашном. то же брашно лежит в книжных съсудех. по заповеди святых отец снесено с небеси. о том брашне рече пророк. хлеб ангелскыи яде человек. брашно посла им до обилиа. рекше писаниа. да что ныне достоит в святом писании. и пакы рече. упиются от обилиа дому твоего. дом есть церквь божиа. а питие книжнаа словеса. а еже упиются рекше умудрятся божественым писанием. Да се слышавше братие подвигнемся тако праздновати святыя праздникы. яко же учит нас святое писание. и яко же заповедуют вси святии. Тако бо и сами праздновали, все же с любовию творяще. Бес тоя бо и ни которая добродетель приносится Богу. и мирно живуще и подарующе себе. и к учителем добре учащим приходяще. и потребная им приносяще. то бо яко в божии руце дающе. Мир же держите не токмо с любовными но и с врагы своими. И что есть врази. Аще кто кому или сына или брата заклал бы пред ним. отдати ему и простити его. то есть врази наши. А божии врази се суть. Жидове и еретици. дръжаще кривую веру. и съвращающеся на иноверие. и прящеся по чюжеи вере. и хваляще чюжую веру. и двоеверие любяще. С теми николи же мира дръжати ни любве дóндеже останутся того. И тогда умиритися с ними о Христе. И на праздники великыа пиров не творити. и пианьства бегати. испити же мало. блюсти душа своеа и стрещи часа в онь же богу молитися трезвеным умом. а не пианым. яко же и Петр апостол глаголеть, братие будите трезви. яко супостат вашь диавол ищеть пианых. да их пожрет. Увы горе беда велика. Како пианым ухранитися от диавола. а лежащим на полу мертвым и от бога отбегшым пианьства ради. и удальшимся от святаго духа. смрада ради пианаго. и слова божиа не имущим. в устех своих. гнилиа ради пианьственнаго. и ангелу хранителю отбегшу от пианаго. и скорбящи о души его. тела же не щадящу. бесом же веселящимся о пианицах. и радующеся приносят жрътву пианьственую от пианиц диаволу. Диавол же радуяся глаголет. яко николи же тако радуюся. о жрътвах поганых язык. яко же о пианых христианех. всяко бо дело моего хотениа. суть в пианицах. и лутши ми суть пианици и запоицы христиане неже поганыя идоложръцы. яко и поганых бог набдит. ово покаяниа ждет. ово на казнь грешным. а пианиць бог не навидит и гнушается. аз же радуюся о них. яко мои суть пианицы. а трезвии божии. И се рек диавол. и паки бесом рече. Идете поучаите Христиан на пианство. и на всяку детель хотениа моего. Ангели же святии приходяще поведаху святым отцемь о всемь том печалию великою. да быша писанием отлучили христиан от пианьства. Святии же отци написаша чистое се и честное и верное и святое учение. и предаша христианом. на провожение жизни сеа. и на причастие жизни вечныа. да кто послушает сего правила святых отець и поживет в трезве уме. дела творя достоино богу. житель будет жизни вечныя. наслаждаяся вечных благ, а кто не слушает. осужен будет с диаволом в муце вечной. Се же слышаще братие подвигнемся трезвеным умом. работати богу. и заповеди его не ложно съхранити. И в законе его поживем день и нощь. славяще святую троицу... отца и сына и святаго духа ныне и присно и в векы веком. аминь.
II. Слово некого старца о подвизе душевнем и о пьянстве
Господи благослови!
Сице подобает кающемуся, кроме жити единому, попещисѧ и трудитися, и плакатися, и оупразднитися от мыслии неподобных. Сего ради ни единому досадити, себе блюсти, себе оскорблѧти, себе осужати присно, себе обличити, в тесноти жити, с болением многым, с болезнью сердечною взискати Бога, милости от него просити. Аще обленишися встати на оутренюю, не дай же ести (не дай пищи) телу своему, писано бо есть: «праздный да не ясть». Якоже бо кто крадеть, вину имать, таку вину причтет Бог всѧкому не встающему на заоутреню к церкви, – разве и недуга ради, или труда велика. Обаче не от недужнаго и от труднаго потѧзает Бог службы духовныя и молитвы, и никтоже не имать извета (не имеет оправдания).261 Якож в миру живый с женою и с детми, и печаль имея о дому, и не могу, глаголеть, оугодити Богу и заповеди Его сблюсти, – видим бо многыи оугодникы Божия в миру живут, а заповеди Божия творяща. Давид не бе ли богат, или не цесарь бе, и глаголаше Богу: седмишты хвалах тѧ, и пакы: полунощи встах исповедетися тобе (Пс. 118:62). Аще цесарь сы, седмиши днемь Богу пел и, полунощи встая, молился, – а толико печалий, а толико ратий, и о чюжих, и о своих, и в гонении, – то каку муку мы имамы прияти, во лготе живуще и ленѧщеся к церкви, и пропивающе вечернюю и заутренюю и час молитвы! Что створиши, человече, бещинно и скаредо (мерзко) живый, и поганых (язычников) нравы любѧ? Тех бо есть веселье, еже оупиватися, а крестьяным (христианам), егда отобедати, тогда и отпити, – а ты седиши весь день питиемь. Ни орудий могый ктому створити ни телесных, ни душевных, но все продая на питьи, душю и тело томѧ. – Дивно бо есть поистине: в час брашна наестись, а весь день погубити пьюще. Мню, яко ни бесловесныи зверие и скоти, ни Бога ведуще, ни суда чающе, ни орудий житискых имуще, и дел празни, – обаче смеютьны сѧ (смеются над нами). Аще не глаголють, то мыслью глаголють: мы – несмыслении – и отъемы и отпьем, а человеци не сытни. Еда ину имут оутробу питию, а иную брашну, еда и покоя не имуть пьюще? И льють яко в оутлу съсудину (сосудину, сосуд), дóндеже възбесеють от пьянства? – Два бо еста различия пьяньства: едино оубо есть, – се мнози хвалѧт, ркуще: то есть непьяница, оже оупивсѧ, а лѧжеть спат, но иже толчеться, и бьеться, и свариться, лаеть. Аз же покушаюсь оуказати, яко и кроткый, оупиваяся, согрешаеть, аще и спати лѧжет, – и недооумею, к чему ми сего приложити? Скотину ли ѝ нареку, но того скотее; зверѧ ли прорку, но того зверее и неразумнее; кроткы оубо пьяница, акы болван и акы мертвець валѧетьсѧ и, многажды осквернивъсѧ и омочивъсѧ, смердитьсѧ. Егда оубо кроткый пьяница в святыи праздники лежить, не могый и двигнутисѧ, раслабив свое тело, налья в сѧ и до горла; богобоязнивым же, в церкви наслажающимъсѧ сердца пении божественными и чтении, и акы на небеси пред Богом мнѧтьсѧ стояще. Се же, не могый главы възвести, смрад отригая от многаго питья, чим есть разнопоганых да оумолъкнет глаголющеи: аще оупьюсѧ, но не створю лиха (лихо – зло). Вижь колико лиха твориши, пропивая праздникы. Кроткый оубо пьяница, възлюбив (оу) пространьство, с богатым онемь в огни имать искати оустудити язык и не обрѧщеть, аще смерть его застанеть тако живуща. – Дерѧживый (буйный, дерзкий)262 же пьяница не токмо себе врежаеть, но и инех: говейным и боголюбцемь поносить и оукоряеть, аще бо есть властель, то сугубо зло, – хощеть бо повинути всѧ свои злобе и пагубе, боясѧ оурока (осуждения) ненавидить же говейных, любить же подобныя себе, и всадить и в неугасимый огнь, потквы (ссоры) творяща, блазнѧще, лестѧще (обманывая) вы. Но мы, братие, сдраваго оучения послушающе, оулучим в вечную жизнь о Христе Иисусе, Господе нашем.
III. Слово святых отец о пиянстве
Иже бы не пити отюд (отъинудь) того велми возбраняет. Святии бо отци не возбраниша нам того, еже пити и ясти взаконе и в подобно время; но отрекли суть объядение и пьянство. Не яде (ясть) убо, ни пия (не пиеть) диавол, но спаде долу; а Павел Апостол яде и пия, но взыде на небо. А еже бо не пити отнюд: то досаждение есть бывшей твари от Бога. Питие убо умным на веселие есть, а несмысленным, иже упиваются часто во пьянство (до опьянения) – на не избытныя злыя грехи. Не рече бо писание, еже не пити, но не упиватися во пьяньство. Сим бо подобает пити, иже может скрыти пияньство во утробе своей, а злая словеса во устех своих удержати. Аще бо безумный упился, а не блудил, то могли быша (могли бы ся) сему и мертвыя подивитися. А о много пиющих речено бысть: кому горе, кому мятеж, кому молва, кому скаредня, кому мерзость, кому сини очи, кому сокрушение вотще: не пребывающим ли вкорчме и назирающим, где пирове бывают? (Прит. 29:29–30). О братие верная и сестры, бегайте пьяньства, а не пития, иже в законе питие мало страхом Божиим востязающися, и стерегите молитвеннаго часа, в оньже Богу помолитися, вечер, утро и полудне трезвым умом, а не пьяньством. Якоже Петр Апостол глаголет: братие, будите трезви, а непияны, яко супостат ваш диавол ищет пьяных, да пожрет их. О горе, како пьяным ухоронитися лежащим, яко мертвым, и от Бога отбегшим, пияньства ради, и удалившимъся от святаго Духа, смрада ради пьяньственнаго, и слова Божия не имуще во устех своих, гнилаго ради пияньства (гнилиа ради пьянственнаго), ангелу хранителю отвегшу и плачущуся, пьянства ради, бесом же веселящимся и радующимся о пияницах. Приносят бо жертву пьяньственую ко дияволу от пьяниц, диявол же радуяся глаголет, яко николиже тако веселюся и радуюся о жертве поганых человек, яко же о пияньстве християных; во пьяницах бо вся дела хотения моего суть, и лучше ми есть (суть) пьяницы и запоицы от християн, нежели от поганых идоломолец, якоже бо и поганыя Бог соблюдает, а пьяниц Бог не навидит и гнушается их, аз же радуюся о них, яко мои суть пьяницы, а трезвыя Божии. И сия диявол рече к бесом: идите и поучайте християн на пьяньство и на всяку детель хотения моего. Ангели-же Господни приходяще ко святым отцем (поведаху) о том с великою печалию, дабы християн от пьяньства отлучали и от злаго запойства, а не от пития, еже вподобно время. Святии отцы написаша чистое се и честное и святое учение, и предаша християном на превожение жизни сея, да аще кто послушает правила сего и поживет во страсе Божии, той наследит царство небесное, а иже кто неслушает святых отец учения, то осужен будет с бесы в вечную муку. Да то слышавше, братие и сестры, потщимся сотворити заповеди Господня, и трезвым умом славити Бога и молитися Ему.

49. Слово Св. Иоанна Златоустого о играх и о плясании
Земная вся злая смышления отвергше, приидите и услышим духовная учения, и размыслите како зло творим. Христос бо нас созва и хоте равны ангелом сотворити, но мы сами прилагаемся во звери. Еже бо безчинно жити и работати мамоне неправедному, рекше, многа имения собирати, – то зверино есть безсытство; а еже величатися, а иного укоряти и обадити (оклеветать), и красти, и лгати, – то ни человеческо, ни зверско, но бесовско дело и хотение. Тии бо нас соблажняют, дабы им неединым мучимым быти. Ового поваживают (подстрекают) на клевету, а иного на зависть, а иного на блуд ласкают, а другаго на ярость учат, а иного на гнев, а другаго скупостию омрачают, и на грабление и на разбой, а иного на пьяньство устремляют, иного же на кощуны и на песни сатанинъския, и на плескание, и на гудение, и на плясание учат. А всех же играний проклятее есть много вертимое плясание: то бо отлучает человеки от Бога и во дно адово ведет. Пляшущая бо жена невеста сатанина нарицается, и любовница дияволя, супруга бесова; не токмо сама сведена будет во дно адово, но и тии, иже с любовию позоруют (позорити – быть зрителем чего-либо) и всластех разжигаются на ню похотию, прелщающе святыя мужи плясанием, яко же дщи Иродиада. Пляшущая бо жена многим мужем жена есть; тою диявол многи прелщает во сне и на яве. И вси любящеи плясание со Иродиею в негасимый огнь осудятся. Грешно бо есть и скверно и скаредно (отвратительно) и своему мужу с таковою женою совокуплятися. Седоша бо, рече, людие ясти и пити, и быша сыти и пьяни, и восташа играти плясанием; и по плясании начаша блуд творити с чюжими женами и с сестрами; и потом приступиша ко идолом и начаша жертву приносити им; и в том часе разступися земля и пожре их две тмы и 3000. Сего бо образ мучения показа (это послужит примером) всем согрешающим и не творящим воли Божии. Того ради, братие и сестры, блюдитеся и нелюбите бесовских игр беззаконных, паче же плясания удаляйтеся, да не зле в муку вечную осуждени будете. Богу нашему слава.
Против разных нехристианских привязанностей и пороков в христианском обществе




 

Источник: https://www soika.pro/dok/veroispovedanie /rus samobjitnaja/
Категория: Святоотеческая литература | Добавил: сойка-soika (05.04.2022) | Автор: Сойка-Soika W
Просмотров: 14 | Теги: благочестия и христианской жизни П., Поучения о разных истинах веры | Рейтинг: 0.0/0
Всего комментариев: 0
avatar