Поучения о разных истинах веры, благочестия и христианской жизни П.В. Владимиров ( 3)
19. Слово Иоанна Златоустого како подобает к церкви приходити с верою
Церкви небо есть, любимии. Что бо сих вещей страшнее: церковь бо небрегомее храма (простого дома) сотвористе? Велико бо в храме строение: дому господин седит, а рабыни ткут, а друзии прядут, и койждо раб свою работу творит, – а в церквах говор мног и смех и шепты (шептание). Несть бо се куповище (торговище), но ангельско место, а престол Божии самое небо. Аще ли не веруеши, то помысли, чего ради трапеза во олтари устроена есть и кому на ней возлещи есть. Сего бо не разумеет некрещеный и неверный, а вернии слышите, что пророк рече: сице глаголет Господь, от земля отступль взыди на небо. Церкви бо небо есть, ныне же вы паче скоморохом смеетеся и беседы и шепты творите. Позорище (место для зрелищ, театр) бо ваше без молвы стоит, ни глагола бо в нем, ни клича, – зде же Богу вещающу о страшных вещех, мы же горши есмы пес безстудие творяще. Или не имамы храмов, или домов, идеже беседовати, или со други совещатися, – се бо невозбранно в дому (или на пути), или на торгу, или в бани, а во церкви токмо Богу молитися: церкви бо дом Божии есть. Всяк, рече, верный муж и жены, приходяще во церковь, или вне церкви, или инде молящеся, да не без успеха трудишися вотще. Моляще же ся Богу внимай, егда что на кого имаши гнев или вражду, то неприятна ти молитва будет; но, яко Апостол Панел рече, без гнева и без помысла зла молитеся Богу, свое спасение содевающе (Флп. 2:12), Господню заповедь соблюдая, иже бо рече: аще оставите человеком согрешения, то и вам отдаст Отец Небесный согрешения ваши, аще же не оставиши, то и Владыка твой не оставит ти. (Мф. 6:14, 15). Оставите, рече, оставится вам, – прощая прощен будеши, – милуя помилован будеши. Вемы, яко Бог не лжет, и верен есть и истинен в словесех своих. Рече бо: неосужайте, да не осужени будете, – ею же мерою мерити, возмерится вам (Мф. 7:1–2). Якоже мнози жития (в жизни) размыслы (цели, соображения), тако и ко спасению различныя пути: аще богат еси, то буди милостив; аще ли не имаши ни хлеба, ни ризы подати, то не просит Бог, егоже несть у тебе, то часто преклоняй колени и бий в перси, моляся Богу, глаголя: Господи, помилуй мя грешнаго; не лжи, не кради, не завиди, да спасешися.

20. Св. Иоанна Златоустого о том же
Идеже бо, рече Христос, два или три совокуплени во имя Мое, ту есмь посреде их (Мф. 18:20). А мы бо аще снидемся во церковь, то (только) на кощуны (сойдемся в церковь и) о суетных и мимотекущих, о недостаточестве, о тщете имения, о прибытце (о прибытцех) и о прикупе, а о вечных ни памяти имуще, забывающе Господня гласа, еже рече: не лихо (много, слишком) глаголите в молитвах (Мф. 6:7), и паки: ищите преже царства небеснаго, сия вся приложатся вам (Мф. 6:33). Кий бо вам прибыток, именем точию слыти християньским (христианом), а дел злых не остатися? Како ли маловернаго научим, а сами (ся) грязнуще (погрязши) во сластех? Но никто тем похвалы имей, еже ко церкви повсегда приходим, но что добрая приобретаем. Кто добрее бысть добру ся научил, на кии иный успех есть (какой успех от того, что...), иже пророческия беседии слышите, и апостольская, и евангелист всех, отеческия учения и уставы спасеныя, – и не могу точен нрав (достойной образ жизни) уставити вам? Воин бо наученый грядый твержее будет о чину том, или купец, часто ходяй на торг, то хитрее будет, такоже и врач часто ходя ко учителю по истине хитрее будет и множае привыкнет. А вы что приобретаете, иже всегда имате издетска (с детских лет) приходяще, кий приплод духовный и который обычай злый преста в вас, гнев или зависть или злоба? Да аще не приплодим и никоего же добра стяжим во церкви, то лучше (унее и) не приходити; аще ли вествования деля (для обмена вестями), а не Бога ради, ни о души скорбя, – то лучше итти на торжища или на беседы, или ни из дому исходити. Но того деля велит приходити, да быхом о гресех воздохнули и добрейше быхом были и обычая злая отгнали быхом. Аще ли кто обыкл что зло творити, а не останется зла, учение слышав; то вотще есть прихождение, и ни на кий успех есть, но болий вред будет. Аще бо и всегда учение слышаще, а не творим, то болшему осужению повинни есмы; аще ли тоже вам творити, еже обыкосте, то почто и приходите во церкви; аще собирающеся в ню, а не сотворити никако же (никакого же) добра, – и учение святое не требе вам, но яко во утел сосуд вливающе, труды (труд ся) деяти. Но аще ли речет кто: книги вем, – то что есть ту? Слышите, еже Господь рече: не всяк глаголяй ми, Господи, Господи, внидет в царство небесное, но творяй волю Отца Моего, иже есть на небесех (Мф. 7:21). Многажды бо хотех умолкнути, видя, яко вотще вам учение сказую, но боюся осужения: неучившему суд прияти. Вы же аще учими, а не творите, то люте осужени будете. Аз бо, не умолкая, учю вы, да невотще труд ваш будет (1Сол. 2:9). Ни сего бо зрю, еже ко церкви ходите, но да бывше бы (что) добро притворивши (сделавши что доброе), и тако в домы своя отходили. Аще ли кто в вас гневлив; то да слышит, яко вся добродетели его вотще есть (суть). Глаголет бо Господь, яко всяк гневайся повинен есть суду (Мф 5:22). И аще кто имения не сыт, то да слышит, яко златолюбца несть беззаконнее. Аще ли кто завистлив или горд, то да слышит, яко Господь гордым противится. Аще ли кто блудник, или пьяница и мздоимец, то да слышит Апостола, глаголюща: не лститеся, ни татие, ни резоимцы, ни блудницы, ни пьяницы, ни служащии кумиром, ни лихоимцы, ни грабители: тии бо вси царства Божия не наследят (1Кор. 6:10).

21. Св. Иоанна Златоуста о молитве
Господи благослови!
И се есть разно наше с ангелы житие, еже есть мудрость. Молитва же одино дело есть ангелом и человеком. Тою бо скоро в житье их приступаем. Всѧк молѧйсѧ с Богом беседует. Что же есть того боле, еже есть, – человеку сущю, с Богом беседует? Аще бо с мудрыми человекы беседовати, то скоро в образ их приступаем; что оубо подобаеть рещи о беседущих с Богом в молитвах? Якоже бо град бес стены оудобь прият будет ратьными, тако и душа неогорожена молитвою, – скоровмещаеться в ню дьявол, и потом всѧкого зла наполнить. Молѧщижеся прилежно, не могут ничтоже недостойна сотворити молитве, но стыдѧщесѧ Бога. С нимь беседоваша, и всѧко лукавьство неприязнино отмечють от себе, помышлѧюще в себе – «колико зло есть с Богом беседующе, абие пакы (а затем опять) к дьяволу приступити и придти (в) душю мерзыя сласти». Якоже бо беседова с кнѧземь, не хотѧще (не захочет) беседовати со оубогыми и худыми, – такоже и беседовав с Богом в молитвах не хощеть слышати не приязнины беседы. Яко жилы тело сдержать, такоже и молитва оукрасить и хранить и оукрепляеть душю. Не глаголи, главы цесарѧ блещащисѧ веньци; доброта бо тех с семь житьемь светиться и оувѧдаеть, венчавай же душю духовны словесы, и ныне в веце семь хранением преходити (сохранно проходит) житие, и по кончине житья с дерзновениемь приступить к судищю Христову. И в евуангельи Христос судью немилостиваго нарече (называет), преклоньшагосѧ на милость мольбою, – да колико оубо Христос Бог нашь, хотѧй всегда миловати! Како ли не сподобѧться всякой благодати молѧщихсѧ Ему? О семь бо Павоул рече: сего бо ради покланѧю колене мои к Отцю Господа нашего Иисуса Христа, да вселиться Христос в сердца наша (Еф. 3:14, 16). Вижь силу молитвеную: Его же небеса не могут вместити, молитва может вместити в сердце человеку! И Павоул рече: «егоже бо не могуть многых рукы сильных потрѧсти, един муж свѧзан, молитвою взможе потрѧсти темницю и оузы, акы лев, растерза (ср. Тим. 4:17; Евр. гл. 11). Рци же ми: тако (верой и молитвой, – ср. Евр. 11:23 и сл.) и Моисей на бранех израильтѧны спасе, – не предасть ли оученику своего оружья? Сам же молитву постави противу ратных, оуча нас, яко велми болшюю силу имуть молитвы, паче оружья и коньник. Молѧщюбосѧ Моисееви, и одолеваху людье его, – престающи же молитве, хужьше и оубо враг бываху вой его.
Тако же оубо и мы: егда оубо молимъся, оудобь одолеем врагу-дьяволу, ленѧщежеся – сами попущаем на сѧ злодея.
Молитва оубо и пост и силе огненей сдеваеть (побеждает), и свирепство лвово оукротить (Евр. 11:33, 34). Сим бо яве Бог створил, – оудобь изойметь от належащих и напастий лютости, – якоже пишетъ: пожри жертву хвале, и въздай же Вышнему молитвы твоя, и призови мѧ в день печали твоея, – изму тѧ, и прославиши мѧ. (Пс. 49:14–15; 115:9); якоже бо и пророци (Зах. 13:9). Входѧщи в град, нужа есть поне и всему богатству входити; тако же и молитве, входѧщии в душю. Всяко доброе дело входить с нею. Богу же нашему слава. Вда (да будет позволено, – Микл.) оубо сице молвити: яко же извеси (весы) 2) не перетѧгнуть ни семо, ни овамо, тако и слово мое не падеть вотще, но якоже рку (реку), тако и будуть и всем семь человеком люба и Богови оугодна.

22. Слово от видениа Павла апостола
Тако глаголет Господь пророком. доколе согрешаете и прилагаете грехи на грехи и прогневаете сотворящаго вы. но останите неправде, и навыкнете добро творити и милостивии будете да спасетесь. вся бо тварь велению Божию повинуется. толико человецы преступают заповедь Божию. Солнце многажды моляшеся Богу глаголя. Господи вся содержай. и доколе неправд человеческих терпиши и беззаконий многих. вели Господи да их пожгу. да не творят зла. и глас ему бысть глаголя. аз вся си сведех и видит око мое. но трьплю им. покаяния дая время. ащели не покаются. то сужю им тогда. Месяц же и звезды моляшеся Богу глаголюще. нам Господи дал еси область светити в нощь. доколе призрим на беззаконное блудство и давление детей и разбойство и татьбы. повели нам. да погубим зло творящая человекы. и бысть им глас глаголющь. видит вся око мое. но чаю обращения их. ащели не(по)каются, сужю им тогда. Море-же и реки вопияху моляшеся Богу. рци нам Господи. да потопим злыя человеки. иже по нам плавающи разбивают и творят злая. и бысть глас к ним. аз вся та видех но аще не покаются. сужю им тогда. И земля же возопи и просящися на человекы. аз Господи паче тварей осужена есмь. не могу блуд разбоя татьбы и волъхвованиа клеветы и прочих трьпети злоб. яко сын досаду родителем творит. и дщи матери. и брат брату. многи неправды человецы творят. повели ми Господи. да не проращу всеянных за злобы их. да гладом изомрут. и бысть глас глаголя. аз убо видех вся. и ничто ся меня не утаит. вся бо суть обнажена пред очима моима. аще кто ся не покает, аз сужю ему. Слышите ли человецы. како вся тварь повинуется Богу. а мы почто воли его не творим, самохотно царства Божиа лишаемся. останем братие злоб наших, и на всяк час благодарим Бога. Яко бо солнцю заходящу вси людстии ангелы к Богу идут поклонитися. дела приносяще человеческия или добрая или злая. богобоязливаго человека ангел радуяся идет к Богу на поклонение. а злаго человека ангел плача идет к Богу и глаголет. Господи вся содрьжай. повели ми. да небуду со злым и грешным сим. токмо бо имя твое нарицает а угожает плоти. а грехи прилагает всегда ко грехам. и не единыя молитвы не творит от сердца ни во дни ни в нощи. и на подаяние согбени имать руце. токмо собирает а неподает. и глаголет Господь. не оставляйте и тех. егда (еда) и тии приимут покаяние. ащели ся не покают. егда ко мне приидут. аз сужю им. Такоже и заутра в 1 час дни ангели приходят людстии на поклонение Богу. ответ о человецех дающе. что в нощи будут сотворили. вся дела наша и мысли. нощная и дневная творения вся объявлена суть пред Богом. Того ради братия и сестры на всяк день и нощь благодарите Господа Бога. в конец бо дний и в конец нощи. во уреченный час всегда. ангелы всех нас на поклонение к Богу приходят. не мозем никто нас ни единое нощи преминути не молившеся Богу. да не опечалим хранителя нашего ангела. нощь бо на двое разлучена. телу на упокой. и души на спасение.

23. Слово Иоанна Златоуста кано возстати в нощи молитися
Щит приими о человече рекше святыа молитвы. оградися ими и востани от сна. и извлецы мечь. и въстани крепце и по силе своей. помолись от всея душа. и тако Бог поможет ти скоро. и подасть ти крепость и силу побежати врага невидимаго. на тя дръзающа. Не того бо ради братиа нощь сотворена. да спим и празднествуем. смотрите како тии востают полунощи рукодельницы, да и вы вси востаните кождо вас в нощи. и прьвие всех дел. молитву к Богу сотворите. да милость свою подаст вы. а егда ложися спати. то не погреши. ни единая нощи не кланявся. но елико мога по силе. тем поклонением побежает человек диавола и тем избывает грехов. иже согрешил кто в том дни. тогда бо нощию и ум телеси ти легчае есть. и к Богу могут тя на покаяние обратити нощныя молитвы. паче ти дневных молитв нощных послушает Бог. тогда ти душа чистейши есть. и ум твой легчае на мольбы. и помысли века сего кончание и отшествие. Да се ми есть слово к мужу и к женам. въстани нощию и преклони колени. и припади к Богу моляся. и паче ти дневных молитв приклонит ухо свое Господь в нощныя молитвы. въспомяни Давида царя. како ти глаголаше. семижды днем хвалих тя. и пакы. в полунощи востах исповедатись тебе. и утрудихся воздыханием на всяку нощь постелю слезами омочях. Помыслите братиа. аще и царь толику имый печаль и тако творящи по вся нощи. а мы же како ответ дати имамы к Богу. в лености пребывающе. И глаголю вы братия и сестры. въстанем нощию молитися Богу о гресех наших, исповедатися ему. тогда бо в нощь ни тщая слава мутит ума. како бо мутить хощет. а всем спящим. ни зрящим никомуже. не знает бо никто. ни пакостит, како может быти такова мольба в день. а уму видящему мног мятежь. и помыслы имущу многы. аще бо вельми ся крепиши в день. но не можеши таковых молитв принести к Богу. И буди храм ваш яко церковь обнощь мужи с женами составлен. рече бо Господь. идеже есть два или три собраннии о имени моем, ту есмь посреди их. добрее Богу един творяй волю его. нежели тма безумных и беззаконных. Аще у кого вас дети суть. возбуди я в нощь молитися Богу. и научи я. да тако творят всегда. несть бо ничтоже такого храма добрее. идеже в нощи мольбы творимы суть. слышите что пророк глаголет, аще поминах тя на постели своей и на утренних поучахся в тя. Да помолимся братия по вся нощи. разрешим узы греховныя. глаголю бо вам. въстанем нощию. аще не полунощию. ино к свету. нощь бо на двое разлучена есть. телу на покой. а душе на спасение. и востани убо в нощь и помолися Богу. и припади воздыхая о гресех. аще бо милостыня творим. а сами ленимся молитися. не можем спастися.

24. О посте
И се еще вы молъвлю (скажу), чада моя милая, послушайте. Пост честный имейте к Богу (пред Богом). Егда достоить поститисѧ в постныя дни да приимете светлость. Яко же Моисей и яко Илья постом и молитвою огнь оугасиша; тако же и вы постѧщесѧ нищим раздраблѧйте хлеб свой, оубогия милуйте, нищих и немощних и на оулицах лежащих и седяща присещайте (посещайте, навещайте), сущая же в темници и беде милуйте и оутешайте, нагыя одевайте, сирот (и) домашних ни обидите, но паче милуйте, гладом не морите, ни наготою: то бо суть домачнии твои оубозии; оубозии бо инде собе испросить (выспросят), а си в твоей руце токмо озмуть (возьмут). Правым же помогайте, грешныя милуйте, странныя в дом свой введите, вдовиць призирайте, в бедах сущая избавлѧйте, старца чтите, попы и дьяконы яко служителѧ Божия; челѧдь же свою милуйте и оучите на спасение и покаяние, старыя же на свободу отпущайте бес поткновения (без замедления), оуныя (юных, молодых) на послушание на добро пооучайте, яко же Аврам каза (поучал) от разбоя и татьбы и.

25. Слово св. отец о постах
Подобаеть, братье, всякому человеку крьстьянину, наченше (прежде всего) веровати Господу Богу своему, в коегож имя (во имя коего) крестившеся, ркуще (то есть) во имя Отца и Сына и Святаго Духа, Пресвятыя Троица, Господа Бога нашего истиннаго. Крещен (крещеный) бо человек акы (как бы) изново породиться, потом же, растый, (возрастая) в животе (в жизни) оскверниться (оскверняется), согреша Богу всяческы. Бог же милостив есть, хощеть да быша вси человецы спаслися; и не остави Бог человека в погибели, но дал ему есть Бог покаяние, да вси человецы прибегнувши к нему и воздохнувше из глубины сердца своего, и каются грех своих, волных и неволных, и приметь Господь всякаго человека кающегося грех своих. Обаче далных (далее) есть си заповедь: да слышаще, братье, держите и у себе в сердци своем; си сътворивше, спасетеся. Перваяж заповедь есть – еже любити Бога всем сердцем своим, трепетати словес Его, со страхом работати Ему, аки видяще лице Его. Втораяж заповедь есть еже любити друга акы себя. Несть бо нам лепо: призрети какого любо человека, ли рещи онь си (вот этот) праведен, а оны (а тот) грешныи; но рещи ны подобаеть: Бог вся свесть, а мне своими грехи (а у меня свои грехи) печаль есть, да несть ми требе никтоже (до других мне дела нет). Потом же, не блудить, но, аще подружие (жоны) имуще, то в подобно (дозволенное) время приближатися, а не акы скотом наслаждатися плосткых по своем хотению без устава, – но размерити (но так устроять) зде все свое житие, да Бог в туж меру отмерить на страшном суде. Аще кто и мнозими языци, вестить ти, то и всеми славить Бога и молить. Милостыню же творить к убогым яко постигнуще имением (сколько можно по состоянию). Первоеж великыи пост имеите с всею крепостию и верою, со страхом поклоняитеся до земли часто и с любовью. От суботыж Лазоревы не несуться проскуры в церковь за упокои и ни кутия, но въскресения образ творити и проскуры вынимати и кутия, крестити (благословляю): то-есть образ воскресения Господня; аще ли кто сего не творит, то с жиды осужден будеть. Се слышаще, братье, почтимся, чисто и чъстно проводити постныя дни с всякым воздержанием иже от всего зла. Всюж ту неделю проводивъше чисто, в великую суботу комкавшеи (причастившиеся) вкусять хлеба мало и тако пребудить всю ту нощь, моляся Богу. Також воскресение Господне да причащаются со всякою чистотою и причастившес в церкви тела Господня и крови, и шедше в домы своя, ядьше и пиють мало и поспят: тако бо творяще, истинни крьстьяне наречемся, храняще закон Божии и спасемся. Не того бо ради Христос вскресе пития или обьядениа, но сего ради воскресе, дая (чтобы даровать) радость всему миру, и веселие верным без конца; воскресением бо своим весь мир просвети, и вся верныя возвсели радостию духовною, да видевше вернии воскресение Христово и празднуют всю ту неделю, а не пьяньством, ни обьядением, ни песни бесовскыми, ни иными плотскими деянии и похотьми. Сех (сих) бо верных церкви принимают с чистотою входящих, разве же (и только) тех не принимают, оскверняющих (которые оскверняют) телеса своя блудом и лишним, питием, иж бес памети упиваются. Табо вся неделя (пасхальная) один день есть: Егда Господь воскресе, тогда слнце стояло не заходя 8 днии, всю ту неделю; егда же неделя та кончалася, тогда слнце зашло. Та бо неделя один день есть; темже вернии чисто провожають неделю ту воскресениа ради Господня, молящеся, с кресты ходяще всю неделю, а со женами блуда не творят. Се слышаще, братье, да празднуете первое пресветлое воскресение Господа Иисуса Христа и всяк празник его, таж (потом) и святеи Госпоже нашей Богородице и всех святых его. От великаж дни до пятидесятные недели не кланяйтеся до земли, не сего ради тело смилующе (не потому, чтобы тело щадить), но славяща Христово воскресение и кланяющеся иконе Христове и святыя Богородица и всех святых. И вся неделныя дни тако чтите: не поститеся тыи дни (в те дни), но дважды ясти хотяще брашно, но греха не творяще и не упивайтеся беспамети ни вкиеж дни; упивающебося погубять мзду труда своего. В тыж дни молитву творити часто, якож могуще противу (по) силе умней (ума). А причастие емлите, а сами ся чисто съблюдущеся; аще ли недостойни будя причастимся святых таинь Христовых, да осудимся вмуку. Аще ли Петрово говеныа будет, или Филипове, то в понедельник рыбы неясти, и в среду, и в пяток, но хлеб со овощем одиноя днем; а вторник и в четверг рыбы ясти двою днем, тако в суботу и в неделю. А поклонов на день по триста до земли: тако все говение правити Петрово и Филипово, а в великое говенье поклонов 50 на заутрени, 50 на обедни, 50 и на вечерни, а Господи помилуй по 50; аще ли будет кто немощен в кое любо говенье, то немощи деля како ему отец его душевньыи разгодав о сем. Нам бо достойно бы, братье, и оприче говенья, тако творити, поминающе съгрешенья своя великаа и множьство нашего согрешенья, яже сотворихом пред Творцем своим и Богом нашим. А про (за) наши уже было грехи (следовало бы нам) ни главы въскланивати, биюще челом пред ним, ни очию осушивати, льюще слезы своя пред ним, стенюще, скорблюще, о неподобных делех своих. О братье и сестры, оци и матери! Како ны было не боятися Господа своего и не трепетати словес его и не творити волю его! А тот есть створил небо и землю, и море, и вся яже суть в них, и возма от земля створил ны есть тело, не токмож тело, и душу вдохнул и живых ны створил есть. И видимыя створил, також створил ангелы и архангели, херувими и серафими и претоли господствиа, слнце и месяць, звезды, езера и реки, источныкы, вся горы и холмы, ветры и снези, дожди, скоти и звери, и птица, и гады и всяко древо земное. И то все Бога боиться и трепещет и не преступает повелениа его, но все то в уставе своем стоит, работая человечю естьству (роду человеческому), не преступая повелениа его, земля дает плоды своя наслед человеком, жита и траву, древа, цветы, плоды всякого овоща земнаго, на потребу нам, и на снедь скотам, и зверем, птицам, и гадам, всему земному дыханию. Свет же, освещая землю, творя (исполняет) повелениа Божиа; слнце, осияя и грея вся от земля, восходя и заходя и работая человеком, все творя повеланиа Божия и не преступая заповеди его; также луна и звезды, стражюще всю нощь, восходя и заходя и свет дая человыком, показующе всем шествующим путь (по) морю, по рекам, по озерам; а многая наша безакониа видяще, яже створихом пред Творцем своим, небоящеися его, ни останучися (не оставляя) злоб своих, то бо все терпят, Божия страха боящаяся. Також и море творить, и озера, и реки, и сточникы, работающе человеком: овех възяще (переносят) в караблех ветры, повелением Божиим, из града въград; пути творяще через море, носяще в лодьех, в челнех лете (летом), а зиме на возех; напояюще (напояют) водами, кормяще рыбами всякыми, омывающе нас; тако нам работают, боящеся Творца своего; також и огнь творить, повинуяся Господеви, работая человеком: грея и варя, пека, зноя, суша; все творя на потребу нам. Аще ли не повелит Господь чего творити, то все стоит во уставе своем, не смея ничтож сотворити; аще ли чему повелить Господь что створити, то створит, но по Божию повелению и по суду его, а собе (само по себе) ничтоже не смеет створити, ни земля, ни море, ни озера, ни рекы, ни источникы, ни кладези, ни горы, ни пропасти, ни огнь, ни зверь, ни гади, ни рыбы, ни мрази, ни снези, ни ветры, и никакая тварь. Или пакы сему (или и этому) не имете веры, безумнии человеци? То помыслите и разгадайте о своем теле: чего в нашем теле нетуть? В нашем теле – огнь, зима, глисты, черви; но все лежит недвигома, бояся Бога, не смея ничтож створити телу нашему; аще ли повелит Господь чему встати, еже в нас недуг, то велику болезнь створить телу нашему, и смърть приводить, Божиим повелением. Все бо, братья, Бога боится и трепещеть повеление его: толико (только) мы человеци все преступаем повелении его, и заповеди его не творим, отець своих не слушаемь, по злому своему уму, по первому своему проклятьству и непокорливому безумию, и бегаемь от пути истиннаго спасенаго, еже ны ведеть в жизнь вечную и в райскую пищу, веселье вечное; но мы того пути бегаем, а на пути погибелны наступаем, ведуще ны в муку вечную и в тму кромешнюю. А никто ны то не введеть, но сами себе по своему злому обычаю, а Бога небоящеся, ни чтуще заповеди его, дьяволя дела творяще, грехи свершающи, Бога небрегуще, а дьявола возлюбивше и муку вечную: сами ся в работу предаем, свободни бывше. Сам бо Господь в еуангелии глаголетъ: всяк творяи грех раб есть греху (Ин. 8:34). Мыж Господа Бога своего забываем и нетворим волю его. А како ны было нечтити его. Сам бо ны в Пчеле глаголеть: «чему мя, человече, не умееши чтити? А яз тебя деля свет створих, небо распростох и землю на водах основах, море горстью нальях, песком оградих; тебе ради езера и рекы и источникы створих; тебе для слнце и луну и звезды украсих: тебе ради всяко древо насадих и траву прорастих; тебя деля огнь створих, дождь пустих и снег. И тъ (все это) меня боиться и трепещет и не преступает повелениа моего. Тыж человече небоишися и нетрепещеши мене, нехраниши заповедии моих. Почто мя не чтиши, человече. А яз твои Бог, а яз твои црь, а яз же твои дед, а яз же твои отець: чему мя, человече, не умееши чтити, ни боишися мене? Аще мя имееши Бога себе, то чему ми не служиши с страхом, якоже ми служат ангели и архангели и вся тварь? Аще ли мя зовеши царем, то чему мя не чтиши с боязнью, якож земному царю служат слугы? Аще ли мя твориши прадедом или дедом себе, то чему мя нечтиши, якожь добри уницы прадеды и деды чтят? Аще ли мя твориши оцемь себе, то чему мя не чтиши с боязнью, ни твориши воли моеи, якож добрии сынове оцемь творят волю? Аще ли мя твориши братом или другом, то чему мя нечтиши, якож добрая братья братью чтят и друзи?» Но на предняя возвратимся. Но нам бо, аще приидет пост – чистота душам и телом, прогнание всем делом злым, – мы бо печалуем и скорбнем и страдно творим (тяжким представляем) говение, и се помышляем на сердцих своих, како преити пост: не хотяще (не хотим) остати злоб своих: пьяньства, объядения, блужениа, непокоренья и всего безакония; пути спасенаго бегаем и ходим ко ереем, прашающе: что нам пити и ясти? что поклона? Аще нам ркуть правила святых апостол и чьстных отец, наводящих нас на пут спасеныи, и обращающе душа наша от погибельных злых дел и приводящих к страху Божию, глаголющим нам всю истину: тогда их услышим, право и достойно чин свои съблюдущим, и повелевающим нам честныи пост чисто и непорочно съблюсти, от всякаго зла отступити, а Богу приближитися, на дьяволю главу наступити и всю силу его посрамити и волю его попрати истинным и честным постом, божественых молитв силою, погружающи (омывая) честными слезами всяку злобу и помыслы воющя (воюющие), на душа наша; всех сетеи дьяволь велящим избегнути душам нашим, яко птицам да не увязнем опят в первых тех сетех по своему обычею творяще: и тако словеса слышавше душеполезна и еще нехощем послушати их. Глаголють бо нам добро, и (а) мы глаголем: се вельми тяжко, не можем сего понести. Ныне есмы слаби человеци на добрая дела, приближнаа (приближающиеся) к Богу, на та есмы немощни и лениви и слаби, имиж души спасаються и к Богу възвышаються; а на злая дела есмы крепцы и неможем ся их остати, и не лениви, и мощни, и бодри; творим я своим безумием, а добрая и полезная Божия заповеди тяжки си творим и страднеи всех дел земных. Но о чем ны (почему нам) суть тяжки заповеди Божия? Поведите ми, братья и сестры и чадци. По морю плаваем, или по езеру хожение или по рекам нужное восхожение, или по пути ходяще нужею в кия грады, разбоиник блюдущеся. Почто вся си меню? Несть бо в заповедех Божиих тяжко ничтож, ни трудно. Ереи бо обращают нас от пути погибельнаго, а на путь спасеныи наставляють нас. То мы бо творим вельми тяжко, оже велят нам покаятися прежних своих грех и злых дел отступити, к Богу прибегнути. А дьяволю волю себе отврещи, а мы глаголем: «мы есмы крестьяне, дел дьяволь нетворим». То вси ведаем, яко крещени есмы; но младым умом отрицали есмя ся сотоны и всех дел его и всего студа его и всех аггел его; ныне же състаревся опят есмы внерли (погрузимы), яко в сет, в первая отрицаниа дьяволя (в те дела дьявола, от которых отреклися), не хощем из них на старость вынерети (освободиться), ни остатися их в злом срдци своем. Да како хощем милость от Бога прияти, или суда его страшнаго избыти, тако творяще? Но на преднее глаголание възвратимся. Ереем бо нужно есть пещися о стаде своем Христовых овець; аще бо пастух пас стадо, а не ублюдеть его, тогда волк пришед распудить стадо и овцю восхитить: то велико зло бываеть пастуху тому, не блюдшему стада своего овчати: також и ереем блюдуще нас от волка мысленаго, еже есть дьявол. Того волка блюдуче нас, ереи велят нам бегати на горы, да быхом непостижени были волком и ведоми в дно аду; тех бо гор сам волк бегает; аще хощет погнати нас, да скоро устанеть и посрамлен бываеть Богом и лова своего в нас неимееть; аще бо на те горы возбежим спасемся. Горыж суть Христовы заповеди, святых апостол и пророк, и святых отець, еже указали ереи нам на ползу, на покаяние злых наших дел. Суть бо в мире вся наша дела, да мерою дел наших оправдимся. Я (же) обои меры явлю вам, боголюбимьцы человеци: (да) приложите уши ваши сердечныя. Се сут меры, имиж оправдимся и спасем душу от волка и въбежим на горы: еж (это) есть покаяние, пост, чистота, поклон, воздержание от всякаго зла, любовь, смирение, кротость, трезвость, братолюбление, нагым одеяние, молчание, послушание словесь и неосужение, не оклеветание, не обида, ни алкание, не врежда (зловредность), не резоимание, не блуд, не прелюбодеиство, не гордость, бдение, слезы, молитвы, к церквам хожение, болным посещение, к темницы прихожение и наделение, мертвым погребание, к отьцю честь и к матери любовь и ина многая дела добрая: сими бо деянии вся казни дьяволя проженем (рассеем) и главу его злочестивую попрем. Сеж суть другыя меры злая и скверьная дела, отступна от Бога, ихже велить нам Христос Бог отступити и взыти на горы, еж ереи велят нам бегати от них: сут бо вельми пагубна, Богом ненавидима и святыми проклята. Еж есть: свар, бои, свада, величание, гордость, немилосердье, зависть, злоба, братолюбия презорство, обида, дмение, лицемерство, непокорение, мздоимство, осужение, хуление, пьяньство, объядение, несытовъство, прелюбодейство, грабление, насилие, непослушанье Божиих словес, преступление Божиих заповедей, убийство, разбои, душегубьство, ноузъпоношение, кощюны, идолъслужение, моления кладезнаа и речнаа, песни бесовьскыя, плесание, будни (бубна) и сопели, козици, игранья бесовьскыя и вся злая дела. От сих бо дел велят нам отьци духовни бегати и ходити по правилом и по заповедем святых апостол и богоносных отець. Да то слышаще, братья и сестры, подвигнемся на добрая дела, а злых ся останем и отбегнем; а постныя дни духовною радостию проводим с чистотою, страх Божии имеющи в срьдцих своих, отьца духовнаго послушающе, заповеди Господня храняще, да достойни и упасени будем честными ереи, приемши постныя дни, чисти и непорочни будем прияти спасеное тело и кровь Господа нашего Иисуса Христа, на освящение душам и телом нашим, на оцещение грехов, на исцеление недугом. Молитвами святыя владычицы нашея Богородицы и святаго Иоанна прдтечи и святых апостол и всех святых молитвами умолен будеть Господь наш и помилуеть ны всегда и ныне и присно и в векы веком. Аминь.

26. Слово Святых Отец, како духовне праздновати
Иже кто верен и благочестив, лепо ны божественныя праздники имети в чистоте и духовне, а не на позоры и на игры упражнятися. Но мужы и жены, и старыя и юныя, мали и велицы, во церковь собирайтеся вси, на утренюю и на литургию и на вечерню, и весь день приходите ко церквам ходяще. А в церковь вниди, гнева не имей ни на кого, стой с молчанием, послушая божественых словес, да упомниши домашняя своя учити; аще ли что вестуеши, то не веси о чем чтомое глаголет. Паче же недели блюсти: та бо есть день воскресения Христова. Подобает бо в он всем честно и духовно праздновати, и покаянием очиститися от злоб, яже есмы во иныя дни сотворили, преспевающе друг друга добротою, яко же Господь учит ны пророком, глаголя: останите злоб ваших, и навыкните добро творити, – судии праведно судите, обидима избавите, богатии милостиви будите к неимущим, и к церкви не ленитеся, и Азь отдам злобы ваша (Зах. 7:9, 10). Такова имуще милостива владыку, неленитеся заповеди творити. К церкви же по вся дни приходите с любовию, зависть и гнев попирающе, вражду и гнев и всяку злобу отвергъше, да освятим душа и телеса. Паче же от кровоядения соблюдайтеся. Сия бо заповеди от Бога прияхом, преже реченныя Ноеви: да не снесте, рече, крови в мясе; Аз вам мяса предах ясти, рече Господь, а кровь всякаго животнаго зарезая пролиют на землю. Аще ли кто яст кровь, то повинен есть суду, и причастия несть достойно прияти ему, преслуша бо Господню заповедь. От Адама бо и до Ноя десяти (десятый) род суха бе пища, ни масла, ни мяс ядяху; по потопе же заповеда Господь Ноеви, глаголя: се дах вам ясти вся растущая от земля, а мяс ясти возбраних вы, ныне же повелеваю вам ясти мяса, точию душа его несьяжьте в крови (Быт. 9:3–5; Лев. 17:14); ядый бо кровь и давленину подобен есть ядущему мертвечину. Ияков брат Божий претит ны не творити блуда, идоложертвеная не ясти, и давленины, и звероядины, и крови скотия умершаго (Деян. 15:20, 29; 21:21). Вся бо сия едино имут различие. И Апостоли о том утвердиша, новый закон предающе, крестящимся глаголаху: чада, сохранитеся от блуда и треб идольских: блудник бо подобен есть идолослужителем (1Кор. 5:11). Бегайте же пьяньства и грабления; лихоимцы бо и пьяницы царства Божия не наследят (1Кор. 6:10). Гордости же и величания не имейте: и сперва бо Господь загордевшая ангелы в бесы преложи. Паче же всего гнева и зависти и клеветы останитеся, скупость и немилосердие отверзите и не мщайте себе любимии, полагайте на Бозе. Клятвы же отюд останите. Сам бо Господь Бог наш учит ны, глаголя: не кленитеся ни небом, ни землею, ни иною коею клятвою, ни главою своею не кленися, не можеши бо ни единаго власа черна, ни бела сотворити, но да будет слово ваше, аще вправду рещи: ей ей, а не вправду: ни ни, лише бо того, Господь рече, все от неприязни есть (Мф. 5:34–37). Тако же и Апостоли и святии отцы утвердили. Мнози же, не брегуще заповеди Божия, кленутся Богом и Его святыми, им же отнюдь горе будет. Темь бо паче гнев Божий приводят на ся. Иаков же, брат Божий, глаголет: аще кто мнится веру имый, а брат и сестра, нага будета и скудны, повседневныя пища не даст, имаже требе, то кий успех веры твоея: вера бо без дел мертва есть (Иак. 2:15–20), богатии же и немилостивии не спасутся.

27. О праздновании воскресного дня
(Слово о недели Иакова, брата Господня, епископа иерусалимского)
Христос Бог наш почи от дел своих в седмый день. В 1 день сотвори Бог свет, а в 2 день небо, а в 3 день землю, а в 4 день сотвори Бог солнце и луну и звезды; тогда и диавол свержен бысть с небеси со отступными его силами, и беси быша наречени за гордость. А сего мнози не ведуще плетут: «диавол не поклонися Адаму, ръка (сказав): аз огнь есмь, а сей перьсть». То лжа есть, а не истина: не бе бо еще Адам сотворен, а диавол на землю свержен бысть. В 5 день сътвори Бог гады, и птица, и скоты, и рыбы, и звери, и древа и семена вся, а в 6 день созда Бог человека от земля и дуну в лице его, и бысть человек в душу живу, и нарече имя ему Адам. И в 7 день почи Бог от всех дел своих, и благослови Бог той день седьмый: се бо почивания есть день благословеный. Того ради и нам реченно в той день от дел почивати, токмо Богу молитися и к церквам ходити, милостыни даяти. Елико бо церкви обыйдет человек в нощи или во дни, то и стопы ногу его чтомы суть от святых ангел: се же ходяй не пустошная мысли, но Богу моляся, ни зла никакого мысля, не досади же никому в той день; аще же и сотвориши когда что зло, то воскоре смирися и прощение возми, а не остани на нощь, гнев держа на кого любо, никогда же. Неделя же радость верным, есть воскресенья Господня день и почивания. Всяко дело оставльше, духовно празднуйте, а не пияньством, ни играми, ни пустошными беседами, яко невернии; но от злоб ся очистивъше, святем теле и крови Христове причаститися. Вернии, духовне воскресения день почьтите, яко лепо есть крестианом: воскрес бо Христос, радость всему миру дарова, низолжив ада и смерть попра. Тем, братие, славы ради въскресения Господня, и воплощения Его, и начала сверьшения мира сего, радующися, празднуем день сей; к церкви спешно тецем на утреню, и на литоргию, и на вечерьню без гнева и беспомысла злаго. Своя домашняя беспечали сотвори, нищая и бедныя милуйте, и церьковным слугам почесть творите: та бо вся яко вруце Богу влагаете; в церкви же с молчанием стойте, кождо своя грехи исповедая, въспомянув, а о чюжих не глаголи, песни и пений и чтений божественных насладите сердца и душа своя. Сам бо Господь Бог наш сей день възаконил Моисиови глаголя (Исх. 20:9): 6 дний делайте, рабы твоя, и рабыни твоя, вол и осля твоя, а в 7 день упражняйтеся на мольбы и собирайтеся во церкви. Та бо, братие, пристанище есть от буря и мирьскаго мятежа; ту бо душам и телом цельбы приемлем; ту Божий глас сердечнеи уши оглашает; ту страшная тайна неизреченно сътворяется за ны; ту греховный мрак от сердець наших отгоняется; ту Сын Божий предлежит на святей и чюдней трапезе, яко агнец непорочен закалается, и пречистую кровь свою изливая на оставление грехов верным, хотя ны своего царьствия наследники сотворити. Нашего ради спасения на землю Господь сниде и от девы воплощься, с человеки поживе, страсть плотию прият безстрастный Божеством, и волею смерть въкуси, въскресе же в третий день и в четыредесятный день възнесеся во славе на небеса, и седе одесную Отца, и дарова верным спасеное (спасительное) пристанище – святую церковь, – в ню бо вернии приходяще (приходят) слышати святая божественая учения, евангельска же и святых апостол деяние и учения, и прореченныя пророки и отеческая сказания, житие же святых и мучения. Та вся слышаще, богобоязнивии просвещают душа своя и на диавола и на бесы его въоружаются и побежают я силою Божиею. О сем пророк Давид глаголет: врагу оскудеша оружия в конец (Пс. 9:7). И пакы тоже пророк Давид глаголет: приидете възрадуемься Господеви и предварим лице его исповеданием (Пс. 94:2), – си рече, исповежьмыся часто, а не таим согрешений наших. Воистинну есть день, братия, веселия и духовъныя радости исполънен, воньже достоит, хвалы всылающе Богу, комуждо о спасении души своея молитися. Воскресениа Господня се есть день и неделя наречен, да всяк, дело оставль, духовно празднуем радующися, славяще святую Троицю, Отца и Сына и Святаго Духа. Рече бо пророк: веселися, сей день егоже сотвори Господь, възрадуемься и возвеселимься вонь (Пс. 117:24). Вопрошаим, возлюблении, Давида: един ли той день сотвори Господь? Вся, рече, сотвори, но сей день веселия, полон есть и радости о Бозе, понеже воскресения есть день, за то неделя наречен, много бо благая сотворишася вонь. Да и мы, возлюблении отцы и братие, възвеселимся духовно с святыми пророки и апостолы, и празнуем радостно духовен праздник светлаго и тридневнаго воскресения Господа Бога нашего, сшедшеся в церкви, псалмы и духовными пении. Воскресения бо есть день и неделя наречен. Оставляют бо дела человецы вернии и на мольбы и на духовная деяния упражняются. Той бо день есть прообразуя радость будущаго века. В шесть убо дний всяк верный человек потребная исполняйте житейская, а в седьмый день вся духовная совершайте; сей бо день извествует веселие, еже праведным прияти от Царя славы. Моисей бо, первый во пророцех, рече: благослови Бог день седьмый, зане вонь почи от всех дел своих. Да и мы, братие, дела оставльше, днесь на духовная спеем. Сей бо день память есть Господа Бога нашего тридневнаго воскресения. И мы празник составим спасеный (спасительный), а не на игрища, ни на позоры, но яко истиннии крестиане, а не слытием (по имени только) токмо, но делы добрыми, братолюбием просвещьшеся, страньнолюбием цветуще, любовию озаривьшеся, нагыя одевающе, нищая бедьныя с собою вподобно (в надлежащее) время накорьмляюще, обидимыя избавляюще: тако духовно торжествуем. А неверным же и поганым несть такия радости, но скорбь им на уме и сетование. Пророк бо Давид о неверных глаголет: не увидеша, ни разумеша, в тьме ходят. А нам верьным вся явлена суть угодная Богу. Вся, рече апостол Павел, в славу Божию творите; аще ясте или пиете или ходите, во славу Божию сотворите (1Кор. 10:31). Когда идеши в монастырь, неси им, яже требе, или к церквам хожение, а в славу Божию седение. Егда какия игры, или пианицы кличат, или скомороси, или плясание и кощюны сатаниньски, в тый час дома пребуди, неисходя: то в славу Божию седение. О, братие, во пианьстве или во играх слава Божия несть! Рече бо пророк: хлеб сердце человеку укрепит, а вино возвеселит. А мы же, егда пием, то не в веселие, супротив закону Божию творим: питие на веселие дано, а не на пианьство. А мы, егда пити начнем, то и к церкви нейдем, и захлебнутися хощем, не человечески пиюще, но и поган горее есмы пиюще. Что бо есть скареднее пианьчиваго? Седит забывся, ум свой погубль, яко неистов, нечюется, что творя. Да то ли, братие, веселие есть, тако ли в закон и в славу Божию апостол верным веселие творит? Ни убо, не льстимься сами, и отстанем пианьственаго проклятаго обычая, идеже диаволу есть радость, а души пагуба. О братие! аще и телу нашему немощь от многаго питиа, – кольми паче душю губим! Слышите писание, глаголющее: кому свары и скаредие, кому сини очи, кому сокрушение вотьще, кому суд и прение, – не пианьчивым ли? О, братие, почто душа губим, скотски живуще? Другие же всю нощь не усыпают, пиюще и пляшуще и многа творяще злая, лютейшу муку душам своим творят. Ум бо погубль, не весться, что творит, и в малоумии велик язык простирает, студная и срамная глаголя, не срамляется, и с похотьми жены чюжая любызая, и чего хощет, егоже бы волею не възговорил, то глаголет. Влезет бо тогда во ум его дух прелестный, сътворит его безстудная глаголати, и хвалитися безчестием, и учаще его не покарятися, мнетися добрая глаголя. Запивая – бо – ся, многа творит добру злая. Како не суть плача достойни запивающися? Люто бо есть скаредие, еже беспамяти упиватися! Аще бо пианьчиваго учиши и грозиши ему, то он не слушает и не творит (не признает) греха в том. Таковии да слышат великого апостола Павла, глаголюща: «не льститеся убо, ни тати, ни разбойницы, ни клеветницы, ни прелюбодеи, ни лихоимцы, ни пианицы, царства Божиа не наследят» (1Кор. 6:10). Слышите, братие, к каким злым приложено и равно есть пианьство. О, братие! Вечьныя муки убойтеся, останите упиватися. Аще бо в таковом зле кто умрет, с идолослужебники осудится, внегасимый огонь. Пианчивому бо век старость в неустав, житию порушение, маловременьная (скорая) смерть, а по смерти мука вечная, аще истинным, покаянием того не лишится (не освободится).

28. Поучение о милостыни Св. Иоанна Златоустого
Якоже в садех винограда (в виноградех) различны суть плоды; тако и во святых церквах (плодове) учения (святых отец) многа суть, и учители многи: ово (овии) о милостыни учат, а ино (иний) о смирении, вси же во един путь спасения наставляют нас божествеными учении.
Слышите, богатии, и не гордитеся во имении, тлеющими не хвалитеся. Един бо есть Бог богат имея богатство нетленное и всем изобилно подая (подавая), а ваше богатьство яко прах есть (и потому) дóндеже тихо есть и доволно о нем все есть тогда на спасение устраяй себе; аще ли бури подобна напасть взыдет, или смерть, или гнев царев, то по истине яко ветр имение развеет и не станет помогаяй тебе. Доколе бо в твоей области есть, то отдавай от него участие (часть, долю) Богу, да яко друг добр, и яко же вож, ведый право, в небесное царство приведет тя. Аще ли же держиши в скупости сокровено, то яко змиин яд в сердцы ти внидет большая собирати, да зде тело ти изсушит несытость имения, а в будущий век душу твою огню негасимому предаст. Люта бо есть велми похоть имения, мнози бо любяще ю, погибают и зле душу свою погубят (погубляют). Яко бо море ненаполнится многи реки приемля, тако и ум человечь несыт есть, многа имения собирая, и яко же ад не насытится, тако и человек непрестанеть хотя богатьства, донеле и (паки не) умрет. Собрания бо многа вся зде останут, а мы з(с)делы токмо отидем. О богатии и немилостивии, убойтеся грядущих на вы страстей! Богатство ваше изтлеет, а ризы ваша мольми изядени будут, злато и сребро изоржавеет, а вас смерть приимет, тело ваше черви изъядят, а души ваша в вечную муку пойдут, аще немилостивы есте и скупы. Почто, о человече, скорбиши, тленных подаяти нехотя (не хощешь), а за то от Бога царство небесное прияти (хошеш)? Что отвещаеши пред Богом, стены облачая, а человека неодежиши, коня украшаеши, а нищаго и вдовы и сироты не наделяеши? Аще еси не помиловал, и ты будеши не помилован; аще не отверзл еси убогому храма своего, то и от Тебе затворен будет рай; не даси ли алчющим хлеба, то и ты не приимеши вечныя жизни. Тем же потщитеся богатии на милостыню, десятое Богови отдающе имения вашего, да спасете душа ваша.

29. Его же о милостыни
Аще без печали желаеши быти, человече, то уклонися мятежа мирскаго; аще ли же невозможно ти того сотворити, то и в миру живи, не будеши бо лишен царства Божия, толко буди щедр и милостив, и уклоняйся всякия неправды, а имения не скрывай, иже Вышний дал тебе. Не родилося бо с тобою имение, но Богом поручено ти есть на малы дни, то яко ключарь порученная ти раздавай амо же поручивыи ти велит. А не рцы, яко детем совокупляю богатие (богатство), но поручи богатство свое Богови, доброму блюстителю, и тебе бо той же дал, тому предай дети и жену свою. А не глаголи: дети ми сотворят память; но сами каждо вас о души (своей) печалуйте, а не надейтеся чюжими приносы спасени быти, но своими руками раздавайте от своея силы. Дети бо того пособия души твоей не могут сотворити, якоже ты сам. Тем же в животе своем о души своей размышляй, и тою крепко попецыися (попецися), яко едина ти есть душа и едино время житию и едина смерть, и потом нелзе будет о души поскорбети (скорбети). Да того ради и ныне будем готови и быстра течения сотворим ногами нашими ко церкви и воспомянемся (вспомянем) от злоб наших (о злобах наших), покаемся о гресех наших. Ныне покаянию время есть, скоро бо преминующе житие се временное. Аще ли же ныне не покаемся, то отшед, что можем сотворити? Все бо имение наше зде останется, а мы токмо с делы отидем, и якоже нази родихомся, тако и пред Богом станем. Да аще кто глаголет: дети ми сотворят память: аще бо и сотворят память, но не тако, якоже сам. Аще же (а еще же, аще) дети твоя безумни будут, или пьяницы, или тати, или блудницы; то ничто успеет оставленое им имение. Всяк бо потщися наказаны дети оставити, неже богаты; аще бо богаты, а не наказаны, то всяку злобу покрывающе имением, оскудеют, и не будет ти памяти от них. Того ради сам даждь о души своей, а детям твоим многажды случается напасть, татба или поклеп (ложное обвинение) или усобный мятеж, – тогда погибнет оставленое им имение. О человече, даждь сам о себе, хваля Бога, давшаго ти, а детям твоим к тому-же взирати подобно; Той бо всем неоскудно подает! Того деля несть лепо щадити даяния Божия. Неимущих бо деля излише поручил ти есть Бог, да убогий богатым жив будет, а богатый убогим спасется.

30. Св. отца нашего Афанасия о том же
И се же ведати потребно есть нам, яко дал есть нам Бог богатьство на искушение, токмо неимущих деля излише поручено нам. Избавление бо человеку от грех свое ему богатьство, несотворшим же милостыни суд без милости есть. Аще будет богат, а скуп, то не может спастися; а иже кто имением скуден, той нищеты деля и скорби и терпения и добронравием – спасутся. Могуще же творити милостыню, а не подающе, скупостию сребролюбия одержими; аще бо и вся добрая дела исправит богатый, а будет немилостив, то сам ся лстит (обманывает): суд бо есть без милости несотворшим милости (Иак. 2:13); богатый бо аще и зла не помнит (прощает обиды), а убогих и сирот не милует и презирает ближняя своя, – таковый бо услышит тамо судию Христа глаголюща: иди (те) от мене, проклятыи, во огнь вечный, уготованный дияволу и ангелом его: яко взалках, не дасте ми ясти, и вжадах не напоисте мя, наг бысть не облекосте, мене, странен и не введосте мене (Мф. 25 гл.). Кий паки тому прибыток, иже во обилии живый, смирен есть и неосужая, а нищая и голодная и наготою гибнущая презрит? То услышит таковый с богатым о нем, иже во пламени сыи: помяни, ты благая принял еси в животе своем, нищии же злая, – ныне же нищий утешается, а ты стражеши во пламени жгом. А иже мнящеися вернии, в молитвах и в пощении пребывающе, а злато и сребро скрывающе, и вопля (молеб) нищих не послушая – то кия милости сподобятся? К таковым бо зловерным и лжепостником и лицемером вопиет Апостол Павел, паче же и сам Христос Павлом глаголет: аще мудр буду и вем тайны вся, и весь разум, аще и тела мое предам на сождение, а без любви – ничтоже ползую, но бых яко медь звенящи (1Кор. 13:1). Се же глаголет любовь – иже непрезрети роду своего в скудости, и миловати сироты, и утешати плачющаяся. Немилостивых же богатых и жестокое (жеское) воздержание ничтоже успеет. Многи бо и в миру богоугодно живуще и достигоша тех меры, иже в пощении просияша в пустыни. Яко же о двою сыну Спандровому во отеческих житиях слышахом: един бысть отходник, а другий странноприимец и нищим питатель. По окончании же обою (их обоих) многу истязанию бывшу межи отцы: овии пустынника хваляще, а друзии милостиваго и странноприимца. И приидоша к великому отцу Паммову (Памве), от того истину хотяще уведати. Отец же преподобный помолися Богу три дни и приим извещение (от Бога), и поведаше братии, яко оба вкупе в раи во единой славе видех их и во едином веселии и радости.

31. Слово о страсе
Имейте, чада моя, страх Божии присно в сердцах ваших; писано бо есть: начало премудрости страх Господень. Страх бо Господень не велить творити лиха. Ничто же вера бо; страх бо Господень (Господним) поминать велит смерть на всяк час и страшное судище. Страх бо Господень приимше первое праведнии спасошасѧ, апостоли Господни с мученикы страха ради Господнѧ терпяще; в пещерах и в пропастех земных и в пустынѧх, тако же чающе мьзды великаго Бога. Тако же и вы, чада, страха делѧ Господня все добро творите спасения делѧ; грех же аще кто створить по дьяволю делу, да в томь же дни покайтесѧ. Блюсти бо сѧ смерти внезапну, – писано бо есть: в чем тѧ застану в том тя и сужю. Тем же, чада моя милая, буди вы всем страхом Господним спастисѧ.

32. Слово Святаго Отца Кирила о страсе Божии
Всегда, любимии, братие и сестры, имеем страх Божий пред очима своима, и час смертный воспоминайте, и оны страшныя муки уготованныя грешником; боимъжеся огненнаго родства (геенны), яко вечно есть, и огня яко негасим есть, боимъжеся грозы, яко непрелагаетъся в теплоту, и тма, яко небывает свет; боимъжеся червия, яко неусыпают и бсзсмертни суть, ангели же над муками злии суть и немилостивы. Люто бо будет осужение, братие, всем нетворящим воля Божия, и мук боящеся, останите злая деяти, иже есть на пагубу души, и потщитися в худом сем веце добродетелно пожити, царства небеснаго желающи. Вся бо света сего временна и тленна суть, богатьство и слава, и человеки смерть приемлет. А онамо все нетленно и конца неимать, ни летом числа, ни временем применения. Убоимся, братие, вечных мук, яже дияволу уготованы; негасим бо есть огнь, и ядовиты черви. Аще бо зде банныя горящия теплоты укропныя (укроп – теплая ванна, теплая вода) не может плоть наша терпети, то како стерпим он лютый огнь и кипящия смолы мучение; аще комары (комарова прещения) или мухи страшаще не торпим, то како, братие, неусыпающих червей лютость стерпим. Но потщимся убо вечных мук избыти делы добрыми, чистотою, милостынею, нелицемерною любовию. Се лицемерство (есть) наричет, иже богатых стыдитися, аще неправду деют, сироты же озлобляти (оскорбляти). Имейте убо истину ко всем человеком: то бо есть Божия любы; всяку же вражду и гнев отверзите, пьяньства бегайте. Во мнозе бе питии всяка злоба бывает; зависть же и клевету и прочая злобы покаянием отрините, да наследницы будете царствия небеснаго. Любимицы, когождо бо нас век скоро скончевается, друзии бо легше на одре вечер, а утро не восташа и отидоша жития сего; тогда что уже человек может добро творити, или исповедатися, или прияти тело и кровь Сына Божия? Но в нем же приимет ны смерть, в том Бог и осудит ны, в добре или в зле. Тем убо кождо вас внимайте себе, а чюжих грехов не осужайте, да не осужени будете. Кождо бо о своих делех ответ даст пред Богом. А не поможет тамо никто, ни отец сыну, ни сын отцу, ни брат брату, но дела когождо осудят или спасут.

33. Слово Святого Иоанна Златоустого о кротости
Господь рече: лучши есть искати кротости, нежели мудрости. Всякой бо мудрости мати кротость есть и всем добрым делом. Да аще первие саму обрящеши матерь, тогда мати совокупит ти и дети, и будут ти братия, и с ними обрящеши Отца небеснаго, иже прежде век без начала рождейся, и в последняя пришед, нас породи святым крещением и верою, и сотвори нас сыны себе, и облече ны во святыя и честныя ризы. Да аще, любимии, будем разгневили Отца и порты (одежду) крещения (чистыя) искаляли (оскверняли) злыми делы, и отгнахом матерь добрую кротость и прияхом мачеху (мачиху) злое величание, и дети ея, гордость и непокорение, прекословие, клевету, гнев, пьяньство, осужение, блужение, сребролюбие, скупость и прочая съними мачешницы (мачешенци – дщери мачихи), обрести отца диавола связаннаго во тме кромешней, с ними же будут и тии, иже волю его творят. Аще ли же злыя мачехи и с ея детми величания неотжнем от себе, то будут последняя горши первых. О, друзи, аще разгневисте отца и матери неприясте, но молю вы не отчайтеся, отжените мачеху, еже есть (злое) величание, и проклятыя дети ея, и окаляние (греховную нечистоту) покаянием омыйте, и тогда приимет вы отец и любити (паче) начнет. Порты же крещение именуется, а окаляние злая дела, имиже сами на ся гнев Божий приводим, и самохотением (и самохоть) царства Божия лишаемся злыми нашими делы, гневом и татбою, завистию и граблением, резоимством (ростовщичеством) и клеветою, пьяньством же и песньми пустошными и плясанием, горши же всех гордостию, сребролюбием и скупостию погибель душам содеваем. Злых бо ради дел наших казни многи от Бога на ны приходят: овогда ратию, иногда пожаром, и мором, и болезньми тяжкими и иными многими бедами. Но, о братие и сестры, останем злых дел и приимем кротость – матерь добрых дел, и окаляние омыем страхом Божиим и верою чистою и смиренным покаянием, пощением и поклонением, милостынею и послушанием божественных словес, и сотворяще реченная: аще бо и часто слышим, а не творим, то не можем спастися.

Слово Св. Иоанна Златоустого о гордении


Источник: https://www soika.pro/dok/veroispovedanie /rus samobjitnaja/
Категория: Святоотеческая литература | Добавил: сойка-soika (05.04.2022) | Автор: Сойка-Soika W
Просмотров: 13 | Теги: благочестия и христианской жизни П., Поучения о разных истинах веры | Рейтинг: 0.0/0
Всего комментариев: 0
avatar